主題：替阿公話青春，為阿媽寫童年
地點：高雄市苓雅國中會議室
日期：2003年7月17日
主講人：董峰政/高雄餐旅學院/手機：0936-351-888
網頁：http://www.dang.idv.tw e-mail：dang1109@yahoo.com.tw
大綱：
前言：替阿公話青春，為阿媽寫童年
本文：對(ùi)「留仔佮不看」講起
附件一：台灣歌謠
附件二：台灣國風─褒歌
附件三：台灣歌仔冊
附件四：布袋戲
附件五：歌仔戲
附件六：漢學仔冊
附件七：古詩詞
附件八：台灣故事(一)(二)
附件九：講好話
替阿公話青春，為阿媽寫童年
主講人：董峰政
前言：
1930年台語文前輩黃石輝講：「汝是台灣人，汝頭戴台灣天，跤踏台灣地，目珠看的是台灣的光景，耳空所聽的是台灣的消息，生活所過的是台灣的經驗，喙舌所講亦是台灣的話句，所以汝愛用感情的筆，來彩繪台灣的文學。」伊擱講：「用台灣話做文、用台灣話做詩、用台灣話做小說、用台灣話做歌謠，描寫台灣的代誌。」社會學家講：「愛消滅一個國家，先毀掉伊的文化；愛毀掉一個文化，先埋葬伊的語言佮文字」。
有人講：「甘願賣祖公產，毋願阿娘的話烏白掞(dan)。這是一句何等莊嚴的話。但是今仔日母語的跤跡(kā-riāh)已經是漸漸濛霧去矣(ao)，土地的聲嗽嘛勻勻」仔失聲去矣。過去的統治者(日本、國民黨)所強制推行的「國語政策」，致使台灣各族群母語的處境變成：「早前的學生囡仔，人人會曉講母語，毋過袂使(be-sai-)講家己阿娘的話；即碼的學生囡仔，會使自由講母語，煞袂曉講家己的母語」，少年朋友開喙(cui)合喙攏講「國語」─北京語。「不忘祖宗言」早著(diorh)被當做馬耳東風囉。
俗語講：「老人無講古。少年毋捌寶」，所以今仔日高雄市舉辦「替阿公話青春，為阿媽寫童年」的活動，對親情倫理的互動、本土文化的認識、土地的關懷，攏有相當的幫贊，是一件真有意義的工課。
．感恩．
抱著感恩的心，將本文獻予
1903年出世的阿媽：董汪糖女士
1924年出世的阿母：董吳不看女士
雖然行過日據時代佮國民政府兩個時期，
但是兩位老大人
到今只會曉講正宗原汁的
台灣話
這是我行入母語的田園上大的源頭
【本文】
「不看」佮「留仔」
早前
生後生著講「好下」 (下ē)
生查囝喙講「生著好」
四界全是
「罔飼仔」佮「罔留仔」的名字 (仔ā)
阿母生來毋著時
厝內全是小女兒
大人無愛伊
「不看」變做出世的名字 (共gā，不˜/m)
送乎別人卡規氣
別人兜袂四是
吼無停，緊送還 (吼hàu)
外媽只好擱收留 (留liŭ)
「留仔」變成阿母此後的名字 (留lău)
即碼厝內全是小女兒
毋過生來真著時
一家大小疼命命
阿媽牽阿孫四界行
有時行甲無看影
看怹一日一日大
毋知大漢了
厝內敢留會稠
即碼
生後生講「恭喜」
生查囝嘛是「賀喜」
阿母講「查甫著惜，查某嘛著成」
因為相仝一款命 (相仝siō-gāng)
「阿媽」是太祖
董 峰 政
1903年阿媽(董汪糖)今年已經一百○一歲，兒孫滿堂，內外孫加起來，攏總有六十幾名。以內外孫來講早著「五代同堂」，阿媽是阮兜的國寶，嘛是講正港「台灣話」的國寶。
阿媽出世佇西元一九○三年，歲次癸卯年，清光緒29年。當初時中國是「滿清時代」，台灣是「日據時代」。所以一出世就活佇被殖民統治的年代。阿媽親目看著1915年轟動海內外，發生佇玉井的「噍吧哖事件」，一陣一陣的阿兵哥揹銃行過阮的庄頭─蕃薯厝。
阿媽雖然外表看起來有老邁的現象，但是耳空、目珠、行路等，猶原看有、聽有，家己行路，毋免別人牽。一般講起來，日常生活攏家己發落，包括洗身軀、洗衫褲、食飯、掃地、洗碗、行樓梯，毋免別人扶持，家己攏料理甲足好勢。
阿媽出世佇今仔日叫做永康市(舊名叫埔羌頭)的永康里林氏家庭，出世四個月了後，過養予今永康市西勢里「蕃薯厝」汪氏夫婦，汪氏夫婦並無生育任何子女，所以全心養飼阿媽大漢，無奈養父工作受傷，煞長期倒佇床中靜養，佇阿媽十歲的年紀煞來過身。從此阿媽過著伊「台灣式阿信生活」，做過短期的乞食、做過查gàn等工課，會使講誠淒慘。一直到十六歲的時，才以「招翁」的方式，佮蕃薯厝庄頭的散赤人董姓男子結婚。
阿媽雖然出身寒微，但一生樂觀，對神明信仰虔誠，所以精神有所寄託，個性相當溫和，常常替別人設想來委曲家己，勤儉一生，刻苦耐勞，身體健康，予家族的人帶來足大精神倚靠。一生中，上大的打擊是大漢後生(我的老爸)發生車禍來死亡，到今(dan)猶原傷心偷偷流目屎。阿媽雖然無受任何學堂的教育，是一個毋捌字的人，但是伊有足濟生活常識佮人生的智慧。常常對阮孫仔輩的人講一寡古早話佮趣味的代誌，攏是相當的有道理，嘛足心適的。後來我會對台語發生興趣。主要是對(ùi)阿媽的日常生活中發現著台語的特色。特別是「食茶講好話」即部份，發揮上大的功能。下面舉例予逐家做參考：
講好話 口述：董汪糖阿媽
逐家好，生活無煩惱，名聲通全島，四界受人呵咾。
逐家爻早，好睏無人吵，早頓食飽飽，人人真乖巧。
行到厝大埕，予恁一家有出名。 (埕diăn、恁lìn)
行到厝大廳，予恁一家好名聲。 (予hō)
大門開開開，予恁錢銀規大堆。 (規gui)
茶杯圓圓圓，予恁富貴萬萬年。
茶杯深深深，予恁翁某會仝心。 (仝găng/gāng)
茶杯捧正正，予恁會得眾人疼。 (眾zing/ziong)
茶杯捧懸懸，予恁囝孫中狀元。 (懸/峘gŭan；囝giàn)
茶杯捧下下，予恁趁錢無地下。 (下gē；下hē)
茶杯捧過來，予恁逐家大發財。 (逐家dak-ge)
茶杯捧過去，予恁逐家有福氣。 (捧păng)
茶米啉落喉，予恁逐家會出頭。 (啉lim)
茶米啉一喙，予恁榮華兼富貴。 (喙cui)
逐家愛用菜，新娘嫁著好翁婿。
逐家愛啉酒，新郎娶著好牽手。 (娶cūa)
燒酒啉一杯，名利財富褿開花。 (褿ziău)
酒菜大喙吞，予小姐嫁好郎君。
燒酒真正芳，予小姐嫁才情翁。 (爻ghău)
燒酒逐家愛，予汝娶著好太太。
燒酒啉乎噍，予恁財富年年加。 (噍da)
逐家食乎飽，囝孫個個攏乖巧。 (攏lòng)
一銅佮一金，翁某會仝心。 (佮gāh)
翁某若仝心，烏土變黃金。
炮聲若霆，囝孫仔起厝佮蓄田。 (蓄hāk)
炮聲若響，囝孫仔前途無限量。
今日轎門雙爿開，金銀財寶規大堆。
新娘囝婿入房內，生囝生孫進秀才。
新郎手牽予好，新娘早做老母。
新娘聊聊仔行，明年緊做阿娘。
手牽手天長地久，喙拄喙萬年富貴。
茶盤金金，茶甌深深，新郎新娘愛相唚，即杯甜茶我才啉。
眠床四角，蠓罩空殼，新娘睏袒笑，新郎睏袒扒(pāk)。
今日好日子，兩家結連理。今年先開花，明年才結子。
門當擱戶對，榮華兼富貴。今暗心花開，趕緊送做堆。
逐家緊起行，予怹去輸贏，著愛較扑拚，連鞭做阿娘。
台語詩─祝福新人的歌 作者：董峰政
牽手情
手一牽一世人，織一張有情夢 (lăng-bhāng)
雙人鬥陣行，永遠無驚惶 (giăn-hiăn)
兩人手牽手，天長擱地久 (ciù-giù)
有汝疼惜的日子，生活上蓋嫷 (zì-sùi)
有汝雜唸的日子，事事嘛如意 (zì-i)
結合是天意，鬥陣是福氣 (i-ki)
無論風佮雨，有偌爾粗 (hō-cō)
此後牽手的道路，猶原擱遠遠遠
汝我相愛的時間，嘛是擱長長長 (h¤g-dňg)
兩人牽手繼續行，行出代代翁某名 (giăn-bhiăn)
歡喜的心
一世人作伙行，食了鹹酸抑苦汫 (giăn-ziàn)
一句話，道真情
一句愛，說分明 (zĭng-bhĭng)
袂孤單，因為有汝作伴 (duan-pūan)
袂稀微，因為汝是靠岸 (hūan)
牽手的路，有跋倒的傷痕
牽手的路，有扶持的情份 (hŭn-hūn)
日出到黃昏，我會永遠感恩 (hun-un)
感恩的心，有汝相拱
歡喜的心，有汝同行 (gīng-hīng)
蕃薯厝5號 董 峰 政
蕃薯厝5號
郵差送批的番號
伊是阮老父做長工
流汗錢疊起來的厝
一間有伸手仔的
台灣厝
細漢一家伙仔趶的岫 (趶u) (岫siü)
透風落雨會當覕的大欉樹 (宓bhīh)
蕃薯厝
埔羌頭內底的小庄頭
許縣溪流過的小田庄
是我出世的家園
囡仔時代的記憶攏佇遐
溪仔底拍蓬泅 (蓬泅pong-siŭ)
蓖麻園掠蟋蟀
埕斗拍干櫟 (干櫟gān-lok)
埕尾拈田蠳 (拈liam)
嘛有搖檨仔、挽龍眼仔的
笑聲
大漢的時
佇外口徛起趁食 (徛kiā)
蕃薯厝的故鄉
不時出現佇夢中
伊是古早的番社
番仔寮、番仔田
佇伊的隔壁
是故鄉嘛是原鄉
蕃薯厝5號
是我做一條蕃薯仔
永遠的住址
永遠的番號
蕃薯厝：
亦寫作「番薯厝」。佇「西勢」東邊的庄頭，早前叫做「番租厝」。永康鄉志─第三章聚落記載：「蕃薯厝」佇西勢東爿，是廣儲西里近中心點，庄名原叫做「番租厝」，係漢人向口埤一帶平埔族人租田耕種租戶的厝，後來才轉音叫「蕃薯厝」，佮一般所講的蕃薯無關係。
即個庄社大約有三、四百戶，庄民主要是林、董兩姓：庄頭的廟宇是「廣興宮」，服祀「謝府元帥」，俗稱「元帥廟」，創建雍正十三年(一七三五)，廟前有一條溪水叫「許縣溪」，佇同治三年(一八六四)佮光緒十二年(一八八六)淹二遍大水，遭受著嚴重的破壞，所以陸續重建。現此時的元帥廟是一九八○年所建，廟埕曠闊，有二欉大欉榕，對廟前看去有山有水，風景優美。
元帥廟早前有六角頭，其中「英仔甲」佮「後庄」已經廢庄，目前所轄是「蕃薯厝」、「西勢」、「新庄仔」、「崙仔頂」等四庄。每年農曆正月廿日「元帥爺生」，廟內各庄頭攏有「分餅」的風俗。
「分餅」風俗的傳說是：一百外冬前，庄民為著祈求生「查甫囡仔」，聚集佇廟內向謝府元帥下願，若會當「一舉得男」，著佇千秋聖誕時搬戲答謝神明，並且「擔餅」分送庄民。所分的餅叫做「水果餅」，簡稱「水餅」，佇逐冬的正月廿日中午以後開始社內家家戶戶分送，分登記有案的「福份餅」佮滿六十歲的「老大餅」兩種，即個風俗一直延續到現在，成做一個特色。
附件一：【台灣歌謠】
雪梅思君(歌唱版)
正月算來春酒芳 家家戶戶門聯紅 紅男綠女滿街巷 迎新正心輕鬆
只有雪梅心沈重 犧牲青春好花欉 為君立誓袂嫁翁 甘願來守節一世人
二月算來霆新雷 山前山後草青翠 好命有翁伴相隨 賞風景心花開
講起雪梅上克虧 每日怨嘆流珠淚 一片純情全枉費 無緣份佮君來做堆
三月算來是清明 人人掃墓上山頂 雪梅抱囝到墓前 墓桌上排三牲
見景擱來想舊情 傷心目屎流袂停 郎君那通迹僥倖 害著阮孤單過一生
四月算來春天後 無寒無熱風透透 雪梅心肝亂操操 想郎君情意厚
目屎已經毋願流 一心望囝會出頭 較苦也愛來等候 甘願來拖磨到年老
五月算來扒龍船 河邊人馬亂紛紛 雪梅有囝無郎君 對啥人來議論
當做註定的命運 迫阮空過好青春 一生伴囝守厝門 忍耐著滿腹的苦悶
六月算來是半年 農村收冬喜沖天 只有雪梅暗傷悲 又寂寞又空虛
坐佇床前想迄時 暗中唱著斷腸詩 成汝的囝會成器 表明著對君的情義
七月算來日頭燒 看見後庭樹落葉 雪梅堅心像鐵石 守貞節無動搖
日日思君開聲叫 夜夜夢中看會著 名聲第一愛保惜 毋願予閒人來恥笑
八月算來是中秋 人人賞月心清幽 雪梅目屎稠目珠 怨舊恨嘆新愁
徛佇窗前對月娘 誠心誠意來懇求 千辛萬苦願接受 予囝兒將來有成就
九月算來是重陽 拜祭亡夫情意重 一拜想起君面容 心又酸斷肝腸
即世佮君命相沖 恨天怨地啥路用 雪梅對君來參詳 望後世會通結成雙
十月算來秋風寒 為囝補衫穿針線 窗外鴻雁雙做伴 引起人心空彈
鴛鴦已經來拆散 毋願擱來嘆孤單 看囝一年一年大 怎拖磨心也真快活
十一月算來是冬節 手來搓圓心怨切 自嘆孤單囝擱細 目屎又滴落地
對囝句句講訓話 勸伊認真來讀冊 管伊透風落霜雪 有立志成功無問題
十二月算來過年關 柴空米盡心憔煩 遵守婦道心袂亂 枵寒餓也甘願
雪梅心內有拍算 教囝做人愛正端 為非做歹萬人怨 做好事名聲萬世傳
喔嗊嗊(蘭陽民謠)
十三十四電頭鬃，(啊喔嗊嗊，啊喔嗊嗊。)阿母(仔)毋知囝輕重。親像牡丹花當紅。(啊喔嗊嗊，啊喔嗊嗊。)
十五十六轉大人，(啊喔嗊嗊，啊喔嗊嗊。)阿母(仔)毋知囝輕重。睏著會寒佮會凍。(啊喔嗊嗊，啊喔嗊嗊。)
十七十八當活動，(啊喔嗊嗊，啊喔嗊嗊。)阿母(仔)毋知囝輕重。希望予囝早嫁翁。(啊喔嗊嗊，啊喔嗊嗊。)
十九二十半內行，(啊喔嗊嗊，啊喔嗊嗊。)阿母(仔)毋知囝輕重。親情卡緊共阮放。(啊喔嗊嗊，啊喔嗊嗊。)
安 平 追 想 曲 詞：陳達儒 曲：許石 (1951年發表)
身穿花紅長洋裝，風吹金髮思情郎，想郎船何往，音訊全無通，伊是行船誅風浪。放阮情難忘，心情無地講，想思寄著海邊風，海風無情笑阮戇。啊....，毋知初戀心茫茫。
想思情郎想自己，毋知爹親二十年，思念想愛見，只有金十字，予阮母親做遺記。放阮私生兒，聽母初講起，愈想不幸愈哀悲，到底現在生也死。啊....，伊是荷蘭的船醫。
想起母囝的運命，心肝想爹也怨爹，別人有爹疼，阮是母親成，今日青春孤單影。全望多情兄，望兄的船隻，早日回歸安平城，安平純情金小姐。啊....，等汝入港銅鑼聲。
病囝歌(七字仔版) (今dan。啥乜sian-mih)
正月算來桃花開，娘今病囝無人知，君今問娘愛食啥乜，愛食山東芳水梨。
二月算來田草青，娘今病囝面青青，君今問娘愛食啥乜，愛食生蠔來拍生。
三月算來人播田，娘今病囝心艱難，君今問娘愛食啥乜，愛食老酒卡大罐。
四月算來日頭長，娘今病囝面帶黃，君今問娘愛食啥乜，愛食仙草滴白糖。
五月算來人扒船，娘今病囝心憂悶，君今問娘愛食啥乜，愛食五香雙糕潤。
六月算來碌碡天，娘今病囝倚床邊，君今問娘愛食啥乜，愛食新出紅荔枝。
七月算來秋風來，娘今病囝心礙礙，君今問娘愛食啥乜，愛食豬肺炒鳳梨。
八月算來是中秋，娘今病囝面憂憂，君今問娘愛食啥乜，愛食麻豆文旦柚。
九月算來厚葡萄，娘今病囝無奈何，君今問娘愛食啥乜，愛食羊肉炒烏棗。
十月算來人收冬，娘今生囝腹內空，君今問娘愛食啥乜，愛食麻油炒雞公。
十一算來是冬天，娘今抱囝倚床邊，君今問娘愛食啥乜，愛食我囝滿月圓。
十二算來是年邊，娘今抱囝靠門墘，君今問娘愛穿啥乜，愛穿綾蘿來紡絲。
附件二：【褒歌】
火車行到 (花鼓調)
火車行到阿公店， hue cia•giān gàu
ā gōng diam
無試海水毋知鹹， bhōr cì hai
zùi•m zāi giăm
阿君揣娘無走閃， ā gun•cue niŭ•bhōr zau siàm
阿娘揣君海摸針。 ā niŭ•cue gun•hài•bhōng ziam
天頂落雨 (南光調)
大隻水牛細條索， dua
zià sui ghŭ•sè diāu sōrh
大漢阿娘細漢哥， dua
hàn ā-niŭ•sè hàn gor
大漢阿娘毋捌寶， dua
hàn ā-niŭ•m bhat bòr
細粒干櫟卡爻遨。 sè
liap gān lok•ka ghāu ghŏr
娘仔生媠
(萬基調)
娘仔生嫷十八歲， niŭ-à•sēn-sùi•zap-bè-hue
親像京城牡丹花， cīn-ciun giān-siăn•bho-dān-hue
將身配伊袂得過， ziong-sin•pùe-I•bhe-dit-gue
親像犀牛咧望月。 cīn-ciun
sāi-ghŭ•le bhang-ghueh
阮厝踮佇 (搭車調)
阮厝踮佇娘厝後， ghun
cu•diàm di niū cù āu
不時看娘咧探頭， but
sĭ•kùan niù•le tàm tău
情意總有九分九， zīng
i•zong u gau hūn gàu
路邊相撞頭勾勾。 lo
bin•siōr d¤g•tău•gūa gau
附件三：【歌仔冊】
周成過台灣
台文：董峰政
台灣原本南島族，000 dăi-ŭan•ghūan bùn•lām-dor-zok
滿山遍野梅花鹿， mua-suan•biàn-ià•mūi-hūa-lok
稻香果子滿山谷， diu-hion•gue-zì•mua sūan
gōk
生活簡單真幸福。 sīng-uah•gan-dan•zīn hing-hōk
唐山原鄉真偓促，001 d¤g-suan•ghūan-hiong•zīn ak-zāk
生活艱苦受束縛， sīng-uah•gān-kò•siu sok-bak
台灣錢銀淹跤目， dāi-ŭan•zīn-ghŭn•īm kā-bhak
向望田園相紲蓄。 ǹg-bhang cān-hňg•siōr sùa hāk
周成佇厝真有孝，002 ziu-sĭng dī cu zin iù hau
愛別妻父目屎流， bheh
biat ce bē bak sài lău
台灣初次才來到， dăi-ŭan
co cu ziah lăi gau
伊對淡水起錠頭。 i
tui tām-zùi kì diān tău
周成不仁佮不義，003 ziu-sĭng
but rĭn gah but ghī
娶著月裡人慈悲， cūa
dioh ghuat-lì lăng zŭ bi
替君厝邊共借錢， de
gun cu bin găng zioh zĭn
到台發達無想伊。 gau
dăi huat dat bhŏ siūn i
父死過台愛探聽，004 be
sì gue dăi bheh tam tian
望君伊會來歡迎， bhāng
gun i ē lăi huan ghiăn
手抱兩歲親生囝， ciù
pō ¤ng hue cin sin
giàn
揣無周成佮親情。 cūe
bhŏ ziu-sĭng gah cin ziăn
換講泉州安溪縣，005 ūan
gòng zŭan-ziu an-ke-gūan
蹛佇三都龍河村， dua
dī sam-do liŏng-hŏr-cuan
周溫佇咧教武館， ziu-un
dī leh4-0 ga bhù gùan
怹囝想愛過台灣。 in
giàn siūn bheh gue dăi-uăn
附件四：【布袋戲】
讀聖賢冊．行光明路
(節錄)
台文：董峰政
第四場人物：沈光文、校尉、周蘭謀、康祥、許瓜、李上穩
沈光文：一朝天子一朝臣，萬里江山萬里塵。文官一筆安天下，武將提刀定太平。」老夫沈光文，今年是大比之年，國姓爺封我為主考官，總理挑選天下文才。傳令，大開明倫堂院門，按考生報名順序進場。正是：
三月桃花紅，九月菊花芳，
年頭有向望，年尾好收冬。
校尉：傳…大開明倫堂院門，按報名順序進場。
(周蘭謀上台)
周蘭謀：主考大人在上，學生周蘭謀參拜。
沈光文：第一號聽者：
十口心「思」，思鄉、思里、思父母。
周蘭謀：言身寸「謝」，謝天、謝地、謝君王。
沈光文：哈！哈！哈！答得好。
千里為「重」，重山重水重富貴。
周蘭謀：一人稱「大」，大邦大國大人君。
沈光文：請改寫「港都夜雨」的歌詞，並且押仝韻
今日又是風雨微微，異鄉的都市，
路燈青青照著水滴，引阮的悲意，
青春男女毋知自己，愛行佗位去，
啊…漂流萬里，港都夜雨寂寞暝。
周蘭謀：遵命
今夜看著月亮天星，浪漫的城市，
有緣作伙吟唱歌詩，憂愁隨風去，
心情輕鬆歡歡喜喜，過著好日子
沈光文：有本土味，通曉古今，雅俗共賞，問一答十，歌詩典雅，真是不世之才，在龍門聽點。
周蘭謀：學生遵命。(下台)
沈光文：傳二號生員，獻上文章。
康
祥：文章在此，請大人觀看。(大人看文章)
沈光文：本官出題目，請汝回答，斟酌聽來。
康
祥：是是，請大人出題。
沈光文：二位舉子聽者，何謂：「五倫」？
康
祥：君臣者有義，父子者有親，夫婦者有別，長幼者有序，朋友者有信，謂之「五倫」。人無五倫，禽獸不如。
沈光文：再來，何謂：「四民」？
康
祥：士、農、工、商謂之「四民」。「三百六十五行，行行出狀元」。
沈光文：再來，「弗去」指何意？
康
祥：「佛法無邊」。
沈光文：第二號康祥退下，聽侯指示。
康
祥：多謝主考大人教示，學生先退下。(下台)
沈光文：傳三號、四號舉子進場。
校
尉：傳第三號、第四號舉子進場。
(許瓜、李上穩上台)
許
瓜：(跋一倒)哎喲！無要緊，跋一倒，抾著一隻金雞母。
校
尉：汝是咧生狂，抑是咧爭墓壙。
許
瓜：我是咧跳龍門。
校
尉：連戶橂都迒袂過，猶想愛跳龍門，跳屎礐空嘛卡差不多。
(戶橂：ho-dīng；迒袂過：han-bhe-gue)
李上穩：大人在上，學生李上穩答禮。
許
瓜：大人在上，學生許瓜，慘…慘敗(參拜)。
沈光文：啥乜慘敗？口齒不清。本官看恁二人文章平常，不知學問如何？
許
瓜：「台灣蟳上有膏，毋是無膏」，阮的學問深深深，深甲用竹篙插落去揣無底。
沈光文：二位注意聽：「富在深山有遠親」。
李上穩：貧在鬧市無人問。
許
瓜：「有錢烏龜坐大廳，無錢秀才人也驚」。
沈光文：再來！紅花、白花、菊花、牡丹花─花花世界。
李上穩：紅毛、白毛、烏毛、鬢邊毛─自由戀愛。
許
瓜：紅酒、白酒、燒酒、高樑酒─天天酒醉。
沈光文：舉子汝開口著是酒，汝為人「好酒」。
許
瓜：大人汝開口著是花，汝為人「貪花」。
校
尉：放肆！
沈光文：無所謂，即位舉子反應誠緊。
許
瓜：大人做汝來。
沈光文：紅花袂芳，芳花袂紅，牡丹花芳又紅。(紅ăng)
許
瓜：臭屁袂響，響屁袂臭，相紲屁響又臭。
沈光文：粗俗！粗俗！
許
瓜：大人，俗擱省錢，大碗兼滿墘，食一遍數念數十年。
(錢：zĭn；墘：gĭn；年：nĭ；數念siàu-liām)
沈光文：哼！不對、不對。再一次予汝機會，汝平常讀啥乜冊？
許
瓜：昔時賢文、人生必讀。
李上穩：諸子百家、千金譜。
許
瓜：四書、五經攏總讀了了。
沈光文：第三號許瓜，三字經讀予我聽。
許
瓜：三字經喔，我上熟，著是「人之初」！
沈光文：是，正是三字經。
許
瓜：汝親家(人之初)，通管通（tang）(性本善)，
通相近(性相近)，佮相倚(習相遠)
顧鼎灶(苟不教)，先來煎(性乃遷)
拐柔道(教之道)，做伊旋(貴以專)
沈光文：好矣、好矣，亂來！是「人之初，性本善，性相近，習相遠，苟不教，性乃遷」。啥乜(物)顧鼎灶，先來煎。真是「四書讀透透，毋捌黿鼇龜鱉灶(ghūan ngŏ gu bīh zau)。轉去故鄉好好研讀，後科才擱來。
許
瓜：唉！掠準講「煠麵煮麵，穩當妥當」，啥知「魚還魚，蝦還蝦」，我一時糊塗煞「水龜共濫田螺」。主考大人毋捌貨，害我無采工擱兼連回。唉，轉來，轉來，擱再等三冬，大人再會。
(下台)
沈光文：傳四號李上穩舉子進場。
李上穩：學生李上穩在此。
沈光文：第四號聽者，「九橫六直，孔子公想三暝三日」
李上穩：水晶的「晶」。
沈光文：天有一年。(天：tian。有：iù)
李上穩：人有一身。(人rĭn)
沈光文：答得好。天分陰陽。
李上穩：人分男女。
沈光文：天有甲子。
李上穩：人有情理。
沈光文：紲落注意聽：天有不測風雲。
李上穩：人有旦夕禍福。
沈光文：天有日月。
李上穩：人有兩眼。
沈光文：天無日月，草木難生。
李上穩：人無兩眼，寸步難行。
沈光文：有來歷。天有三寶：日、月、星。
李上穩：人也有三寶：精、氣、神。
沈光文：啊，天會霆雷、落雨。
李上穩：人會放屁、放尿。
沈光文：誠好…再來：此木是「柴」，山山「出」。
李上穩：白水是「泉」，日日「昌」。
沈光文：風聲、雨聲、讀書聲，聲聲入耳。
李上穩：家事、國事、天下事，事事關心。
沈光文：謎猜一題，「我的手攬汝的腰，汝的尻川放乎火燒」
李上穩：臆「食薰」。
沈光文：激骨仔話一題，「胡蠅戴(dì-)龍眼殼」
李上穩：臆「蓋頭蓋面」。
沈光文：哈哈，對答如流。雅俗皆通，古典、民間文學皆曉，請到龍虎門聽點。
李上穩：學生遵命。(下台)
沈光文：左右啊，狀元、進士挑選完備，啟奏東寧王知情。
校
尉：大人請了。(雙下台)
附件五：【歌仔戲】
浮沈紗帽(節錄)
台文寫作：董峰政
【清閒調】
子虛府，烏有縣
新官未到舊官竄
衙門放空無人管，
衙役閒甲跤蹺峘。 (蹺峘kiāu-gŭan)
艾春蘭：民婦冤枉啊！
王 七：哎唷！前任太爺已經走，新任的太爺著猶未到。
李 六：汝即碼來叫喝冤攏無效，枉費汝冤枉叫到吐腸頭。
王 七：老兄，我聽講新任的縣老爺，是一個色鬼。
李 六：色鬼！哎唷，安爾烏有縣的百性，著死甲好睏囉。著啊，前任的太爺貪財，新任的太爺好色，即聲百姓又擱通好抄摵(ciāu-cīk)！
眾 人：太爺到！
王 七：講著太爺，太爺就到。緊、緊、緊，徛乎齊、徛乎齊。
【音樂演奏】
艾春蘭：太爺伸冤，小人王七、李六拜見太爺。夫人，夫人。
夫 人：免禮。起來，起來。
王七等：.謝太爺，
太 爺：夫人，咱愛離任的時陣，有人毋甘佇咧哭送。即碼到了上任，有人佇咧笑迎。看來我的威風猶擱佇咧！
夫 人：哎！啊汝擱卡威風，也是一個落職的官。
太 爺：夫人汝錯了，是「清明官」。
夫 人：啊若清明官，也著應該落職囉。
太 爺：清明官著該落職。即個小衙門的生理擱袂bhài，尻川著猶未坐著椅咧，講隨時著開市。
夫 人：老爺，我看咱路頭行赫爾遠，汝還是先歇睏，明仔載才審較要緊。
艾春蘭：冤枉啊！
王 七：太爺拄上任，佇遐咧喝啥乜？待屬下共喝走！
太 爺：小等咧！食了皇家五斗米，著愛解決百姓千家愁。秋菊，汝先陪夫人入去內堂歇困。
夫 人：老爺汝…，
太 爺：來呀，升堂。
眾 人：升堂！升堂…
太 爺：傳擊鼓人，上堂！
眾 人：擊鼓人，上堂！
艾春蘭：民婦叩見太爺，民婦冤枉！民婦冤枉！
太 爺：小婦人啊！算汝共老爺開一個「早市」。講！有啥乜冤枉？
艾春蘭：民婦翁婿去予人扑死，請太爺伸冤！
太 爺：啊！是一層命案，敢有狀紙？
艾春蘭：民婦一心喝冤，著袂赴叫人寫狀紙。
太 爺：無，安爾，汝用喙講，老爺替汝抄，替汝省一條狀紙錢。
艾春蘭：是，太爺，容稟！
太 爺：來！
艾春蘭：
【雜唸仔】
民婦名叫艾春蘭，配夫三林蹛東關。
經營生理做茶販，時常出外離家園。
昨夜阮翁拄好轉，看著賊仔撞入門。
伊愛掠賊，家己煞氣先斷！予我一瞑哭到光！
太 爺：哎呀，美哉少婦，冤哉少婦。小婦人，我問汝，兇手何時作案。
艾春蘭：三更時陣。
太 爺：敢有偷提啥乜物件？
艾春蘭：紋銀三百兩，
太 爺：敢有看清楚兇手的面目！
艾春蘭：迄個時陣烏天暗地，根本我著看袂清楚。
太 爺：哎呀！
狠心賊子手段殘，劫財害命罪如山。
太爺專審即號無頭案，替汝伸冤無為難。
艾春蘭：謝太爺！
太 爺：來，打道往東關！
王 七：報！稟老爺。三省巡按出京，路過烏有縣境。金太尊有命，請老爺長亭迎候。
太 爺：即個巡按，早毋來，慢毋來，偏偏佇即個時陣咧鬥熱鬧。哎，恁看覓咧，到底是審官司要緊，抑是接巡按要緊？
王 七：太爺，前程事大，當然是接巡按要緊。
艾春蘭：太爺，官司為重，審案要緊！
王 七：接巡案要緊！─審案要緊！
太 爺：勿嚷，勿嚷！ (勿mai借字)
提起前程我英雄氣短，伊個巡按佮我有前世冤，
我偏偏愛將官司先來辦，我看伊猶愛將我降做啥乜官。
太 爺：來呀！打道東關！
【落幕】
官 員：巡按出京，山搖地動。
官 員：十里錦屏，八面威風。
官 員：送送迎迎，迎迎送送。
官 員：但求通權達變，變達權通！
太 尊：諸位大人。聽說，巡撫大人今日過境，恁看，都將近愛晝了，
為何到今未見蹤影？
官 員：太尊！聽講巡按大人年輕剛直，真厲害呀！
官 員：是呀！伊一到咱即省，莫州知府鄭則清就被伊扭落落來二級，變成了咱烏有縣令了。
官 員：巡按大人聲言：「賢者褒，庸者貶」。太尊素有賢名，看來升官有望。
官 員：是、是、是，升官有望啊！
太 尊：諸公過獎了。周大人。
官 員：太尊！
太 尊：汝是佇咧看啥乜？
官 員：太尊，迄個新任的縣令鄭太清，毋知擱走去佗位摸飛囉，到即碼猶未來呀！
太 尊：啊！鄭知縣猶未來？
旁 白：開道！巡按來了！
太 尊：巡按來了！
巡 按：
【七字快板】
奉聖旨巡二省才俊青年，清吏治革政風重任在肩。
明賞罰將則清貶為知縣，查良莠方不負巡按代天。
附件六：【漢學仔冊】
昔時賢文， s„k sĭ. hiăn bhŭn
誨汝諄諄。 hue
lù. zun/dun dun
集韻增廣， zip
ūn. zing gòng
多見多聞。 dor
gian. dor bhŭn
觀今宜鑒古， guan
gim. ghĭ gam gò
無古不成今。 bhŭ
gò. būt sĭng gim
知己知彼， di
gì. di bì
將心比心。 ziong
sim. bì sim
酒逢知己飲， ziù. hōng. di gì ìm
詩向會人吟。10 si. hiong. hūe rĭn ghĭm
相識滿天下， siong
s„k. bhùan tian hā
知心能幾人。 di
sim. lĭng gì rĭn
相逢好似初相識， siong
hŏng. hò° sū. co siong s„k
到底終無怨恨心。 dor
dì. ziong bhŭ. uan hūn/hīn sim
近水知魚性， gūn/gīn
sùi. di ghŭ sing
近山識鳥音。 gūn
san. s„k niàu im
易漲易退山溪水， ī/ī° diong. ī tue. san ke sùi
易反易覆小人心。 ī
hùan. ī hōk. siàu rĭn sim
運去金成鐵， ūn. ku. gim. sĭng tiāt
時來鐵成金。20 sĭ. lăi. tiāt. sĭng gim
讀書須用意， tok
su. su iōng i
一字值千金。 „t rū. dit cian gim
逢人且說三分話， hōng
rĭn. cià° sūat. sam hun hūa
未可全拋一片心。 bhī
kòr. zŭan pau. „t pian sim
有意栽花花不發， iù
i. zai hua. hua. būt hūat
無心插柳柳成蔭。 bhŭ
sim. cāp liù. liù. sĭng im
畫虎畫皮難畫骨， hūa/ūa
hò. hūa pĭ. lăn hūa gūt
知人知面不知心。 di
rĭn. di bhiān. būt di sim
附件七：【古詩詞】
周南-關睢 詩經 gūan-zu
sī-ging
關關雎鳩，在河之洲， gūan- guan•zū-kiu , zai hŏr•zī ziu。
窈窕淑女，君子好逑。 iau tiàu•siok-lù，gūn-zù•hòn giŭ。
參差荇菜，左右流之， cām cu•hing-cai , zor iü•liŭ zio，
窈窕淑女，寤寐求之。 iau tiàu•siok-lù，gho
bhī•giŭ zio。
求之不得，寤寐思服， giŭ zio
•but dīk，gho
bhī•sū pīk (hok)，
悠哉！悠哉！輾轉反側。 iŭ
zaio，iŭ zaio，dian zùan•huan
cīk。
【操琴調】
短歌行 duan-gōr-hiňg 曹操 zōr-cor
對酒當歌， dùi
ziù•dōng gor
人生幾何。 rīn
sing•gi hŏr
譬如朝露， pì
rŭ•diāu lö
去日苦多。 kù
rit•ko dor
慨當以慷， kai•dōng i kòng
憂思難忘。 iū
su•lān bhŏng
何以解憂， hōr
ì•gai iu
惟有杜康。 ī
iù•do kong
【留傘調】
春日偶成 cun rit ghòⁿ sĭng
程顥 tiăⁿ-hōr
雲淡風輕近午天， ŭn dăm /hong king /gūn ghòⁿ tian
傍花隨柳過前川。 bōng hua /sŭi liù
/gor ziăn cuan/cian
時人不識余心樂， sĭ rĭn /but sik
/ŭ sim lok
將謂偷閒學少年。 ziong ūi /to hăn /hak
siau liăn
附件八-1：【台灣故事】
打狗山的傳說
佇明朝嘉靖年間，有一個對潮州來，蹛佇打狗山的海賊，名叫林道乾，不時佇沿海地區搶劫。
有一工，一個叫做吳金仙的提三枝神箭予伊，講：「汝若想愛做皇帝，著愛佮恁老父葬佇蕭壠（佳里）的龍穴內底，祭即三枝神箭，喙裡含一百粒的白米，睏一百工。一百工了後的五更，向京城射即三支箭，按爾，汝著會當做皇帝！」林道乾聽甲耳仔趴趴趴，隨交代伊的小妹金蓮，共伊佇山頂掠著的迄隻五更著啼的大神雞顧乎好，時到才袂誤時辰。
一百工一目瞬仔著到矣，金蓮想著大兄的交代，規暝攏毋敢睏，蠟條點咧，共神雞抱稠稠。毋過到半暝的時陣，金蓮煞無張持磕(kah)著迄隻大神雞，神雞雄雄精神，看著光，若準是天光矣，著展翼大聲啼，林道乾一聽著雞仔咧啼，抽出寫著「林道乾」三字的神箭，bè上山頂，向京城連射三箭，著歡歡喜喜行轉去營寨。
啥知影千算萬算毋值天一劃，三枝箭攏射佇龍椅頂懸，皇帝看著，誠受氣，派水師都督俞大猷帶領大軍欲來剿滅。林道乾聽著消息，非常驚惶，毋過金蓮毋甘藏佇山內迄十八籃半的金銀財寶，行袂開跤。時間一下延，大軍已經來到山跤，林道乾姑不而將家己一個趕緊逃命。伊走到鹹水湖，發現湖邊攏是老咕石，實在是進無步，退無路，只好趕緊祭出寶劍，向西爿剖落去，一時山崩地裂，打狗山煞裂作兩爿，中央崩一大隙，變做即碼的旗后山、壽山佮高雄港。
這著是人講打狗山有埋十八籃半黃金佮旗后山、高雄港的由來，汝敢愛相信？
附件八-2：赤牛換衫
早當時，牛的形體是百百款。喩穿的衫仔褲嘛無相仝。蹛佇虯(kiū)毛仔國的種、烏人國的種、佮咱台灣本地的種攏無仝。聽咧講，台灣的牛有兩款。一款是會堪得沐(bhak)水，佫有力草的牛，號做「水(sui)牛」。兩枝角是發甲誠粗、佫長、牛角尾翻倒後，彎甲誠媠頭。是落田作穡、擔重擔的好跤數(siau)。
另外一款是漢草看起來無赫粗勇、牛角直溜溜，較湙堪得浸水，毋過車重擔、拖粗穡依員是「一對手」，人咱共號做「赤牛仔」。
赤牛佮水牛來到凡間的時，攏真拍拚，替人做湙少的工課(kāng-kue)。玉皇大帝歡喜著賜予喩各一領真媠的衫仔褲，通好遮寒遮熱，穿蹛身軀真顯(hian)頭，予別款生相的牲牲(zīng-sēn)仔看著足欣羨个。
迄當陣水牛穿个是一軀合軀仔合軀、塗柑仔色的衫。益(iah)赤牛穿个是一軀塗糞色透鳥鼠仔色的衫，看著足無範(bān)个。
有一工，兩个做工課做煞。蹛樹仔跤食草歇困秋凊(cin)嘍。兩个浸啊浸，泅啊泅。一時仔赤牛煞起野心，想講：「水牛迄領衫，有影有夠媠頭，塗柑仔塗柑，和(hām)我足有四配，我若穿出去街路，庄頭庄尾攏嘛予人呵咾，後日仔主人著會佫較疼惜我，迄當陣毋知愛偌銃(cìng)氣咧──。」
就安爾心肝掠坦橫，一𡌅起身毋管三七二十一，起手將水牛的衫仔褲挈(hiahn)咧著走，目瞬(nih)仔久就無看著尾溜。水牛迄時陣，高戕(ciăng)大漢是無路用，較輸跤手都湙扭(liu)掠，姑不衷，將赤牛的衫仔褲𤪱(mōh)咧，那行那咻喝噢，一路行甲跤不離步，一直咻到赤牛蹛的所在。
毋過赤牛仔確實壓(à(h))霸，媠衫仔褲共一下予穿過面矣！任伊水牛安怎喝講：「換啊！換矣啊！──」，伊干那共回講：「毋換啊！毋換矣──」，這就是咱即馬聽著水牛唅赤牛仔的叫聲的由來。
猶佫有，水牛的皮繃繃(bēn-ben)，佫是鳥鼠色个，益赤牛仔是塗柑仔色，頷仔頸(gùn)佫落落(làu-lau)，嘛就是安爾來个。
尾手聽講即層代誌予凡間的灶王公神知影，伊著去投予玉皇大帝知影。大帝一下受氣著共處罪。罰赤牛永遠驚去沐著水，佫共促(cik)一寡歲壽掉，連愛死的時嘛愛受刀光之災。毋才會即馬的人較毋甘得刣水牛，佫將死去的水牛，好禮仔好禮共收埋(bhāi)甲好勢。
附件九：【講好話】
炮聲若霆，囝孫仔起厝兼蓄田。
炮聲若響，囝孫仔前途無限量。
行到厝大埕，予恁一家會出名。
行到厝大廳，予恁一家有名聲。
新郎手牽予好，新娘早做老母。
新娘聊聊仔行，明年緊做阿娘。
乾杯！乾杯！
親情朋友捧酒杯，趁錢若那像錢樹咧開花。
酒杯捧峘峘，生囝生孫中狀元。 (峘gŭan)
酒杯捧下下，翁某趁錢無地放。 (下gē)
酒杯捧過來，祝恁逐家大發財。
酒杯捧過去，祝恁逐家有福氣。
用菜！用菜！
逐家愛用菜，新娘嫁著好翁婿。
逐家飲燒酒，新郎娶著好牽手。
酒菜大喙吞，新娘嫁著好郎君。
燒酒真正芳，新娘嫁著才情翁。
一代乾坤，兩姓合婚。
三元及第，四子千孫。
五子登科，六甲進士。
七子八婿，八仙過海。
九門提督，十家團圓。