課程名稱：台語文寫作指導

課程名稱：台語文寫作指導

講師：Dang Hōng-Zing 董峰政/國立高雄餐旅學院

網站：www.dang.idv.tw(鯤島台語文園地)

e-mail：dang1109@yahoo.com.tw

手機仔：0936-351-888

＊本文使用通用拼音自然調＊

一、台語文教材試寫

de it kor：ghāu-zà！lāi-zē！

tàu-zà ghāu-zà no-su dōng-hak

za-dng ziah bà bhē dōr-sia lāng-kēh

lāi-zē iong-dĕ ling-rit u-ĭng

li-kui sun-giăⁿ zài-hūe

lāng-kēh lāi zē人客來坐(調取狀元樓)

lāng-kēh na lăi ciaⁿ iong-dĕ人客若來請用茶，

ciaⁿ m¤g li si ziah bà bhē請問汝是食飽未？

ling-rit u-ĭng gor lāi zē另日有閒擱來坐，

li-kui ē sĭ gong zài-hūe離開的時講再會。

第一課爻早！來坐！

tàu-zà透早。ghāu-zà爻早。no-su(lau-su)老師。dōng-hak同學。za-dng早頓。

ziah bà bhē食飽未。多謝dōr-sia。人客lāng-kēh。lāi-zē來坐。iong-dĕ用茶。

ling-rit另日。u-ĭng有閒。li-kui離開。sun-giăⁿ順行。zài-hūe再會

二、 台語童詩試寫

狗蟻搬山

zit dè t¤g-à zit liap suaⁿ一塊糖仔一粒山，

zit zià gau-hiā gā-di buaⁿ一隻狗蟻家己搬，

būaⁿ ga gūi-sīn-kū dang-gūaⁿ 搬甲規身軀重汗，

bhe dàng būaⁿ zau zit liap suaⁿ 袂當搬走即粒山。

zit dè t¤g-à zit-liap-suaⁿ 一塊糖仔一粒山，

zit din gau-hiā zòr-hue buaⁿ 一陣狗蟻作伙搬，

būaⁿ lāi būaⁿ ki bhe gō duaⁿ 搬來搬去袂孤單，

būaⁿ zau zit-liap t¤g-a-suaⁿ 搬走一粒糖仔山

zit gē lăng一家人(調取留傘調)

ā-gong ā-gong seh līng long阿公阿公踅玲瓏

ā-mà ā-mà siong gōr ngà阿媽阿媽上高雅

ā-ba ā-ba si zūan-ga阿爸阿爸是專家

ā-bhù ā-bhù si zāi-lù阿母阿母是才女

ā-zīk ā-zīk bhe la-zīk阿叔阿叔買蠟燭

ā-go ā-go bhan hiōⁿ-go阿姑阿姑挽香菇

ā-ĭ ā-ĭ ài ziah hĭ阿姨阿姨愛食魚

ā-gū ā-gū liah gīm-gu阿舅阿舅掠金龜

rit-si^o gah àm-sĭ日時佮暗時

de-giŭ dng-seh zīn cù-bhī地球轉踅真趣味，

hūn zòr rit-si^o gah àm-sĭ分做日時佮暗時

de-giŭ bak-bĭng si ruah-tiⁿ地球北爿是熱天

lām-bĭng biàn zòr si gūaⁿ-tiⁿ南爿變做是寒天

三、台語現代詩試寫

牽手情作者：董峰政

手一牽一世人，織一張有情夢 (lăng-bhāng)

雙人鬥陣行，永遠無驚惶 (giăⁿ-hiăⁿ)

兩人手牽手，天長擱地久 (ciù-giù)

有汝疼惜的日子，生活上蓋嫷 (zì-sùi)

有汝雜唸的日子，事事嘛如意 (zì-i)

結合是天意，鬥陣是福氣 (i-ki)

無論風佮雨，有偌爾粗 (hō-cō)

此後牽手的道路，猶原擱遠遠遠

汝我相愛的時間，嘛是擱長長長 (h¤g-dňg)

兩人牽手繼續行，行出代代翁某名 (giăⁿ-bhiăⁿ/miă)

牽手路作者：董峰政

一世人作伙行，食了鹹酸抑苦汫 (giăⁿ-ziàⁿ)

一句話，道真情

一句愛，說分明 (zĭng-bhĭng)

袂孤單，因為有汝作伴 (duaⁿ-pūaⁿ)

袂稀微，因為汝是靠岸 (hūaⁿ)

牽手的路，有跋倒的傷痕

牽手的路，有扶持的情份 (hŭn-hūn)

日出到黃昏，我會永遠感恩 (hun-un)

感恩的心，有汝相拱

歡喜的心，有汝同行 (gīng-hĭng)

蕃薯厝5號董峰政

蕃薯厝5號

郵差送批的番號

伊是阮老父做長工

流汗錢疊起來的厝

一間有伸手仔的

台灣厝

細漢一家伙仔趶的岫

透風落雨會當覕的大欉樹

蕃薯厝

埔羌頭內底的小庄頭

許縣溪流過的小田庄

是我出世的家園

囡仔時代的記憶攏佇遐

溪仔底拍蓬泅

蓖麻園掠蟋蟀

埕斗拍干櫟

埕尾拈田蠳

嘛有搖檨仔、挽龍眼仔的

笑聲

大漢的時

佇外口徛起趁食

蕃薯厝的故鄉

不時出現佇夢中

伊是古早的番社

番仔寮、番仔田

佇伊的隔壁

是故鄉嘛是原鄉

蕃薯厝5號

是我做一條蕃薯仔

永遠的住址

永遠的番號

【註】

趶的岫：u ē siü。宓bhīh。拍蓬泅pà pong-siŭ。干櫟gān-lok。拈liam。徛kiā。

四、七字仔詩試寫

好言好語【四句聯仔】董峰政 08/03/2003

【健康】(調取狀元樓)

好言好語社會興， hor ghiăn‧hor ghù‧sia hue hing

壽比南山嫷光景， siu bì‧lām san‧sui gōng gìng

福如東海好心情， hok rŭ‧dōng hài‧hor sīm zĭng

歡歡喜喜過一生， hūaⁿ hūaⁿ hi hì‧gùe it sing

【職務】(調取南光調)

步步高昇靠扑拚， bo bō‧gōr sing‧kòr pà(h) biaⁿ

鴻圖大展向前行， hōng dŏ‧dai diàn‧hiòng ziān giăⁿ

獨佔鰲頭好名聲， dok ziam‧ngō tău‧hor miā siaⁿ

年年有餘穩當贏， nī nĭ‧iu ŭ‧un dàng iăⁿ

【家庭】(調取留傘調)

愛河永浴好姻緣， ài hŏr‧ing iok‧hor īn iăn

麒麟送子個個賢， gī lĭn‧sàng zù‧gōr gŏr‧hiăn

圓滿豐足有體面， ūan bhùan‧hōng ziōk‧u te bhiān

平安如意慶新年， bīng an‧rū i‧kìng sīn liăn

(註：為台南郵局佇台南國立社教館所舉辦「好言好語」的郵展而寫)

五、台語文試寫

卜去烏影，毋去吊鼎

「卜去烏影，毋去吊鼎。」即句俗語是咧描寫討海人生活的困苦佮心酸。想卜出海掠魚的時，烏雲罩霧擱起大湧，予人看著心驚惶，想卜歇睏等好天才出海；毋過厝內已經無半粒米，某囝著會枵腹肚，只好喙齒根咬咧，冒險出去討海來維持家庭生活。

「天這麼黑，風這麼大，爸爸捕魚去，為什麼還不回家……」，卡早佇國小的課本捌讀過即課，到今印象猶原誠深。因為伊將討海人的扑拚、冒險佮對親情的期待相結合，所以深深印佇咱的頭殼內。台灣雖然號稱經濟奇蹟，但是佇咱的社會，猶原有一寡人，生活相當的困苦，往往為著三頓上山落海，有人佇涵空接水管、有人佇峘樓釘枋模……，做迄款上粗重、上危險的工課。

一個多元的社會，所有對社會有貢獻的人，特別是基層的勞動者，攏值得咱共伊尊敬、呵咾，予怹卡濟的噗仔聲。

【新詞】

1.烏影ō-iàⁿ：天色黑暗或壞天氣，此指惡劣的環境。

2.吊鼎diàu-diàⁿ：炊具掛在牆上，此指斷米之炊。

3.掠魚liah-hĭ：指捕魚。

4.枵腹肚iāu bak dò：指餓肚子。

5.喙齒根cùi ki gin：指牙根。

6.捌bhāt：曾經的意思。

7.到今gàu daⁿ：到現在。

8.一寡zit gùa：一些；一部份。

9.涵空ām kang：指涵洞。

10.呵咾ōr lòr：稱讚、誇獎。

11.噗仔聲pōk a siaⁿ：掌聲的意思。

五、台語布袋戲戲文試寫

讀聖賢冊．行光明路 (節錄)

台文：董峰政

第四場人物：沈光文、校尉、周蘭謀、康祥、許瓜、李上穩

沈光文：一朝天子一朝臣，萬里江山萬里塵。文官一筆安天下，武將提刀定太平。」老夫沈光文，今年是大比之年，國姓爺封我為主考官，總理挑選天下文才。傳令，大開明倫堂院門，按考生報名順序進場。正是：

三月桃花紅，九月菊花芳，

年頭有向望，年尾好收冬。

校尉：傳…大開明倫堂院門，按報名順序進場。

(周蘭謀上台)

周蘭謀：主考大人在上，學生周蘭謀參拜。

沈光文：第一號聽者：

十口心「思」，思鄉、思里、思父母。

周蘭謀：言身寸「謝」，謝天、謝地、謝君王。

沈光文：哈！哈！哈！答得好。

千里為「重」，重山重水重富貴。

周蘭謀：一人稱「大」，大邦大國大人君。

沈光文：請改寫「港都夜雨」的歌詞，並且押仝韻

今日又是風雨微微，異鄉的都市，

路燈青青照著水滴，引阮的悲意，

青春男女毋知自己，愛行佗位去，

啊…漂流萬里，港都夜雨寂寞暝。

周蘭謀：遵命

今夜看著月亮天星，浪漫的城市，

有緣作伙吟唱歌詩，憂愁隨風去，

心情輕鬆歡歡喜喜，過著好日子

沈光文：有本土味，通曉古今，雅俗共賞，問一答十，歌詩典雅，真是不世之才，在龍門聽點。

周蘭謀：學生遵命。(下台)

沈光文：傳二號生員，獻上文章。

康祥：文章在此，請大人觀看。(大人看文章)

沈光文：本官出題目，請汝回答，斟酌聽來。

康祥：是是，請大人出題。

沈光文：二位舉子聽者，何謂：「五倫」？

康祥：君臣者有義，父子者有親，夫婦者有別，長幼者有序，朋友者有信，謂之「五倫」。人無五倫，禽獸不如。

沈光文：再來，何謂：「四民」？

康祥：士、農、工、商謂之「四民」。「三百六十五行，行行出狀元」。

沈光文：再來，「弗去」指何意？

康祥：「佛法無邊」。

沈光文：第二號康祥退下，聽侯指示。

康祥：多謝主考大人教示，學生先退下。(下台)

沈光文：傳三號、四號舉子進場。

校尉：傳第三號、第四號舉子進場。

(許瓜、李上穩上台)

許瓜：(跋一倒)哎喲！無要緊，跋一倒，抾著一隻金雞母。

校尉：汝是咧生狂，抑是咧爭墓壙。

許瓜：我是咧跳龍門。

校尉：連戶橂都迒袂過，猶想愛跳龍門，跳屎礐空嘛卡差不多。

(戶橂：ho-dīng；迒袂過：haⁿ-bhe-gue)

李上穩：大人在上，學生李上穩答禮。

許瓜：大人在上，學生許瓜，慘…慘敗(參拜)。

沈光文：啥乜慘敗？口齒不清。本官看恁二人文章平常，不知學問如何？

許瓜：「台灣蟳上有膏，毋是無膏」，阮的學問深深深，深甲用竹篙插落去揣無底。

沈光文：二位注意聽：「富在深山有遠親」。

李上穩：貧在鬧市無人問。

許瓜：「有錢烏龜坐大廳，無錢秀才人也驚」。

沈光文：再來！紅花、白花、菊花、牡丹花─花花世界。

李上穩：紅毛、白毛、烏毛、鬢邊毛─自由戀愛。

許瓜：紅酒、白酒、燒酒、高樑酒─天天酒醉。

沈光文：舉子汝開口著是酒，汝為人「好酒」。

許瓜：大人汝開口著是花，汝為人「貪花」。

校尉：放肆！

沈光文：無所謂，即位舉子反應誠緊。

許瓜：大人做汝來。

沈光文：紅花袂芳，芳花袂紅，牡丹花芳又紅。(紅ăng)

許瓜：臭屁袂響，響屁袂臭，相紲屁響又臭。

沈光文：粗俗！粗俗！

許瓜：大人，俗擱省錢，大碗兼滿墘，食一遍數念數十年。

(錢：zĭⁿ；墘：gĭⁿ；年：nĭ；數念siàu-liām)

沈光文：哼！不對、不對。再一次予汝機會，汝平常讀啥乜冊？

許瓜：昔時賢文、人生必讀。

李上穩：諸子百家、千金譜。

許瓜：四書、五經攏總讀了了。

沈光文：第三號許瓜，三字經讀予我聽。

許瓜：三字經喔，我上熟，著是「人之初」！

沈光文：是，正是三字經。

許瓜：汝親家(人之初)，通管通（tang）(性本善)，

通相近(性相近)，佮相倚(習相遠)

顧鼎灶(苟不教)，先來煎(性乃遷)

拐柔道(教之道)，做伊旋(貴以專)

沈光文：好矣、好矣，亂來！是「人之初，性本善，性相近，習相遠，苟不教，性乃遷」。啥乜(物)顧鼎灶，先來煎。真是「四書讀透透，毋捌黿鼇龜鱉灶(ghūan ngŏ gu bīh zau)。轉去故鄉好好研讀，後科才擱來。

許瓜：唉！掠準講「煠麵煮麵，穩當妥當」，啥知「魚還魚，蝦還蝦」，我一時糊塗煞「水龜共濫田螺」。主考大人毋捌貨，害我無采工擱兼連回。唉，轉來，轉來，擱再等三冬，大人再會。

(下台)

沈光文：傳四號李上穩舉子進場。