課程名稱：台灣語言源流演變及特色
講師：Dang Hōng-Zing 董峰政/國立高雄餐旅學院
網站：www.dang.idv.tw(鯤島台語文園地)
e-mail：dang1109@yahoo.com.tw
手機仔：0936-351-888
＊本文使用通用拼音自然調＊
壹、台灣語言源流演變
前言：
一般人的見解是，目前佇台灣所使用的語言，至少有「原住民語」、「福佬語(河洛語)」、「客家語」、「北京語」，所以「台語」是袂使(bhe-sai-)予「福佬語」、「閩南語」來專用。其實「福佬語」被稱呼做「台語」，是有伊的歷史淵源佮(gà-)一寡客觀的條件，後來才約定俗成變做即塊島嶼的專有名詞，所以毋(m-)是今仔日雄雄走出來，抑是佇石頭空逼(biāk--)出來的(eo)，更加毋是用命令、用規定的。比如：連雅堂(1878∼1936)佇伊的「臺灣語典」自序(二)文記載，「即碼的囡仔(ghin-à)，七歲開始上學堂讀冊，天真浪漫又古錐，開始咿咿(ī-i)哦哦(ōr-or)唸冊歌仔的時陣，學堂的先生煞禁止使用『臺語』。另外一寡知識青年，一路迢迢(tiāu-tiau)到日本留學，學習現代化的知識，勤學扑拚(pà-bian)十外冬，完成學業轉來台灣，煞袂記得家己(dī/gī)的母語─『臺語』。」(註一)顯然至少佇(di-)一百冬前，『臺語』已經是一個日常生活的語詞囉。
•泉州話
為何佇台灣的「閩南語」，咱共(gā-)稱呼做「台語」？這參台灣四百冬的移民歷史有密切關係。佇福建閩南地區的「閩南語」基本上有兩大語系：「泉州話」、「漳州話」佮後來形成的「廈門話」。
西晉永嘉之亂(西晉懷帝．西元311年)後，中原(主要是河南為主)的「衣冠八族(林黃陳鄭詹丘何胡)」等士紳避難南方，擱再對(ùi-)江蘇、浙江逃到福建，著(dorh)佇泉州為中心的晉江流域一帶徛(kia-)起，因此怹(īn-)所帶來的話被稱呼做「泉州話」。原本蹛佇(dùa-di-)福建南部的族群主要是「百越族」，所以「泉州話」是四世紀的中原音(漢語)攙(cām摻)著大量「越語」所形成的。越語比如：童乩(dāng-gi)、查某(zā-bhò)、查甫(zā-bo)、塗跤澹(dăm)、屘囝(bhān-giàn)。另外「泉州話」嘛(ma-)是後來台語「白話音」重要的來源因素。
•漳州話
另外佇唐高宗時期(總章2年．669年)，朝廷派河南光州固始人陳政、陳元光父仔囝(giàn)率領軍隊南下平定福建「泉州」佮廣東「潮州」之間的「蠻獠之亂」(畬(siā-)族作亂)，平亂後佇泉州佮潮州之間設立「漳州」郡，即批人帶來了七世紀的中原音(漢語)。到了唐僖(hī-)宗發生了黃巢之亂(乾符2年，878年)，仝款(gang-kuan-)徛佇河南光州固始人王潮、王審知兄弟攻入福州，統一全閩地區。即批隨王氏兄弟南下的族群，帶來了九世紀末的中原音(漢語)。唐朝前後兩批由中原來到閩南的移民，大多數是河南光州固始人，所帶來的語言後來著稱呼做「漳州話」，這也是台語「文言音」重要的來源。比如：「五花馬」，文音讀做「ngo-hūa-mà」，白音讀做「gho-hūe-bhè」。
•廈門話：
廈門是漳泉港口外的一個小海島。宋朝稱呼「嘉禾嶼(sū)，明朝稱呼「思明州」，一直攏屬於同安縣的管轄。廈門的地位是明末、清初才開始受著重視。後來鄭成功捌(bhat-)退守廈門做為抗清的基地，後來嘛成做征服台灣重要的基地。到了清朝鴉片戰爭了後，佇南京條約廈門被英國指定做五個「通商口岸」之一，因此變成閩南地區對外貿易佮進出海外的中心。
廈門小島的住民主要來自泉州佮漳州的移民。隨著朋友往來、生理買賣、文化交流，甚至通婚，因此「泉州話」佮「漳州話」互相影響透濫(lām)，形成了「不漳不泉」、「亦漳亦泉」、「漳泉濫」的一種閩南話，因為廈門的重要地位，使得漳泉地區的人會當接受，慢慢形成了所謂「廈門話」，變成閩南地區「閩南話」語系的代表語言。
•台灣話：
仝款的歷史背景，佇西元1624年荷蘭人佔領台灣，為卜(bhe)取得經濟利益，需要大量開墾土地種作，所以派人到福建、廣東沿海招募移民來台灣開墾。到了西元1661年4月底鄭成功爸囝率領蹛佇(dùa-di-)福建沿海的三萬六千大軍，前來台灣趕走了荷蘭人，除了即兩擺因為經濟佮政治因素大量的移民，後來一直到滿清佔領台灣的時，為著生活的因素，嘛是一波一波的唐山公來台灣討趁(tan)。佇遷徙(sùa)的過程，著將福建故鄉的「泉州話」、「漳州話」佮後來的「廈門話」，帶來到台灣，這著是「台灣話」的源頭。目前的「鹿港腔」算是保存了卡純正的「泉州話」；另外「宜蘭腔」是保留了卡完整的「漳州話」。台灣其他地區的住民，因為長期的相處、語言交流，嘛形成了所謂「漳泉濫」。
•台語主要腔調
•南部腔─台南腔：(漳泉濫偏漳。分佈佇嘉南、高屏地區、山線)
•北部腔─台北腔：(漳泉濫偏泉。北部地區)
•海口腔：(來自泉州腔。分佈佇西部沿海佮河口的所在。)
•內埔腔：(來自漳州腔。分佈佇內陸平原佮近山的所在。)
南部腔：中南部(沿海地區除外)是以廈門音(漳泉濫)偏漳州音的混合區，形成目前台灣上優勢的「南部腔」，以台南腔做代表。南部腔：以濁水溪做隔界，濁水溪以南，語調較輕。
北部腔：台灣北部的淡水(滬尾)早期參廈門通商來往密切。沿淡水河開墾、通商的移民，是以廈門音(漳泉濫)偏泉州音的混合區，，形成了所謂「北部腔」以台北腔做代表。北部腔：濁水溪以北，指北部、中部，語調較重。
海口腔：來自閩南地區泉州、同安(dāng-uan)一帶的腔調，早前稱呼「泉州腔」。分佈佇台灣西部沿海佮河川交界的所在。比如：大台北的淡水、林口、萬華、大稻埕、新竹、梧棲(ngō-ce)、沙鹿(sūa-lak)、鹿港、清水、台西、金門、澎湖(白沙鄉除外)…等沿海地區，保留卡正統的「泉州音」。其中以「鹿港腔」上有代表性。所謂：「鹿港人講話無相仝(găng)」(海口腔陰上調變調成中升調)「短短də」，「食魚hə」、「卜去kə」。p.213/360
內埔腔：宜蘭、九份、基隆、桃園一帶保留卡特殊的「漳州音」，其中以宜蘭上有代表性，稱呼做「宜蘭腔」。譬如：白飯(būin)、滷卵(lūin)、酸酸(suin)、軟軟(lùin)、光光(guin)。
【附】
關廟腔：捾(guan)菜(sài)籃仔，去菜(sài)市仔，買紅菜(sai)。
永靖腔：枝仔冰(bing→bian)；冷冷冇冇(lìng→liàn；dīng→diān)
•台灣話的海洋性格
仝款是漳、泉音的透濫，佇中國閩南地區叫做「廈門話」、佇台灣地區著叫做「台灣話」。「廈門話」佮「台灣話」雖然攏是漳、泉的混合音，但是因為時間的久長，差別就愈來愈明顯。簡單講着是，「台灣話」雖然是由閩南方言傳來台灣的，毋過(m-gu/gor-)「台灣話」是佇台灣特殊的地理、人文環境，加上長期一再受外來政權的統治，經過三、四百年所形成的一種「海洋性的語言」，所以融入佇生活用的外來語特別豐富，除了原本的「漳泉濫」、「文白濫」以外，擱有平埔族、荷蘭、西班牙、日語、英語、北京語以及佇台灣土地本身所產生的詞彙(lūi)，攏被吸收做台語的語詞，所以參閩南地區的「閩南語─廈門話」已經是大不相同。比如：
平埔族語：mūa-sat-bhat虱目魚、阿西assey、檨仔、走標、台灣、打狗、阿猴、干豆gān-dāu、雞籠、沙鹿sūa-lak」、北投、南投、bhang-gāh艋舺、òr(h)-ghiŏr(薁蕘/愛玉)。
高砂族語：ōng-lăi(bunglai)、na-buat(lapat)。
荷蘭語：甲、甲萬(袋子)、紅毛土。
西班牙語：sap-bhŭn雪文(傳自馬來語)、高麗菜(cole)、三貂角、富貴角。
葡萄牙語：pàng(bread)。
日語：bian-dong便當、「料理」、「壽司」、「便所」、ki-mo起毛、「柔道」、「郵便局」、「見本」、「玄關」、「注射」、「護帶」、「派出所」、「不渡」、「結局」、「手續」、「組合」、藝旦ghe-duan、注文、途合、寄附、衛生、hò-su。
英語：「show」「KTV」、「7-11」、「pup」、「high-color」、「all-back」、「roast」、「bus」、「rear-car」、「bye-bye」、「ok」
北京語：「東西」、「饅頭」、「動不動」、「反正」。
台語：「正港」、「生番」、「番仔刣」、「等路」、「食飽未」、烏頭仔車、打馬膠。
混合詞：鞏gū-lì(kong gū-lì)。kī-mo ghiang (鈃)。
有關「台語」的淵源，綜合頂面所講，咱會當了解，今仔日將台灣的「閩南語」、「福佬語」稱呼做「台語」，除了一百外冬來約定俗成的講法，另外伊是台灣上主要、上普遍的語言(台語人口佔74%)，尤其就歷史的源流來看，「台語」的音素吸收真濟(ze)在地語(越語、平埔語)佮外來語(日語、英語…)，所以台語會使講是一種海洋性的語言，當然毋是用傳統的「閩南語」抑是「福佬語(河洛語)」的名詞會當來代表的，當然最近有學者主張共(gā)稱呼做「福台語」，嘛是另外一種看法，總是毋管是用「台語」抑是「福台語」，攏是建立台灣主體性的第一步。
【註】
註一：「今之學童，七歲受書，天真未漓，咿唔初誦，而鄉校已禁其『臺語』矣。今之青年，負笈東土，期求學問，十載勤勞而歸來，已忘其『臺語』矣。今之縉紳上士，乃至里胥小吏，遨遊官府，附勢趨權，趾高氣揚，自命時彥，而交際之間，已不屑復語『臺語』矣。顏推之氏有言：今時子弟，但能操鮮卑語，彈琵琶以事貴人，無憂富貴。噫！何其言之婉而戚也！」─連雅堂先生全集，臺灣語典(自序二)，連橫，臺灣省文獻委員會，81年3月。P.3
註二：臺語佮漢語的淵源
漢語：是漢族的共同語言。隨著時間的演化，有七種漢語的分支─官話(北方官話、下江官話、西南官話)、吳語(蘇州話，上海話)、贛語、客語、湘語、粵語(廣州話、廣東話)、閩語。
(1)單音節(mono-syllabism)：基本上是用一個音節表示一個概念，比如，hue(花)。
(2)類別詞(classifier)：又稱單位量詞。比如，一蕊花，一欉樹仔、一棟厝。
閩語：是「漢語」其中的一種。又分閩南語(廈門話)、閩北語(建甌話)、閩東語(福州話)、閩中語、莆仙語等。
閩南語：是「閩語」其中的一種。指在福建南方所使用的語言稱之，一般是指「泉州話」、「漳州話」、「廈門話」等。分佈地區有：海南島、雷州半島、浙江南部溫州、舟山群島、廣東東部潮汕地區、江西(廣西、四川)局部地區、台灣澎湖全島，另外菲律賓、印尼、新加坡等各地的僑區。
泉州話：指四世紀五胡亂華後，對北方帶到福建南方的「漢語─中原音」，另外吸收一部分當地百越族的「越語」，稱呼做「泉州話」。
漳州話：指七世紀唐高宗時閩南發生「畬族」作亂，陳元光父子率兵南下，同時將北方「中原音」帶到福建南方，平定叛亂了後，著佇當地設立「漳州郡」。後來黃巢之亂，王潮兄弟率領家族逃難到福建南方，最後定居佇「漳州」，稱呼「漳州話」。
廈門話：指講泉州話佮漳州話的族群，經過長期交往、生意、婚姻等交流，語言也互相影響交流透濫，產生了一種新的語言，稱之「廈門話」
台灣話：有廣義與狹義之分。廣義指台灣島內各種方言；狹義指「福佬話」。佇遮專指狹義的講法。台灣話是屬閩南話的一支。因為台灣話除了泉州話(含越語)、漳州話等外，另外還有「平埔族語」、「荷蘭語」、「日語」、「北京語」、「英語」、「文白音異讀」等詞彙。所以「台語」佮「閩南語」已經有所差別囉。
□有關台語用字的問題；
(1)有一寡台語(俗稱福佬語)，特別是外來語佮現代語是有音無漢字。
(2)漢字本字、正字是一件粗重的文化工程，卜解決是愛擱一段遙遠的時間。一直堅持完全使用漢字，往往會造成其他的問題。
(3)借音字(擬音字，如查某)、借義字(訓讀字，如：黑板)、方言字(民間用字，如lim啉；tăi刣；tŏr迌)。
(4)借字、造字等造成台語漢字的負責，即款的結果，對台語的推廣是不利的。
，
貳、台灣語言的特色
踏話頭
佇全世界的語言當中，咱的台語(前身河洛話、福佬話、閩南話)會使講是屬於上優美的語言之一，即款的講法，除了因為台語是咱的母語，是阿娘的話，所產生「主觀的感情」以外，主要是有足濟「客觀的事實」，會當來證明。佇遮咱著對台語的音樂性、趣味性、古老性、文學性、思想性來搵(ùn-)一下仔豆油，做簡單的說明：
一、音樂性：台語的音節2217(台南音)；七聲八調；變調
．七聲八調
台語上大的特色是「八音七調」加上「變調」，所以用台語講話親像咧唱歌。因為，台語本身有伊的「音樂性」。比如講：
「佇溪邊」、「五千箍」、「唸詩經」就是「Do-Mi-So」的調。
「買新褲」、「討分數」、「好佳哉」就是「So-Mi-Do」的調。
「阿公食西瓜」就是「Mi-So Do-Mi-So」的調。
「我加汝三歲」就是「So-Mi-So Mi-Do」的調。
「八音七調」有峘(gŭan)、有下(gē)、有牽長、有收束等種種的音調，是非常豐富的音樂性語言。比如講：
dong東、dōng洞、dong棟、dòng黨、dŏng同。dok毒、dōk督 dok□。
gun君、gūn郡、gun棍、gùn滾、gŭn裙。gut滑、gūt骨、gut□。
如果若完全掌握了台語的聲調，用唸的(eo)着那像用唱的(eo)仝款，比如囡仔歌：
貧憚仙 (bin duan sian)
一天過了又一天，身軀無洗全全鉎
走去溪邊洗三遍，毒死烏仔魚數萬千。 (毒死tau-sì/si..)
甜粿過年
甜粿過年，發粿發錢，
包仔包金，菜頭粿食點心。
打馬膠(da-ma-ga)
打馬膠黏著跤，叫阿爸買豬跤，
豬跤箍仔焄爛爛，枵鬼囡仔流喙瀾。
【註】跤(ka)。豬跤箍仔(dī-kā-kō-à)。焄爛爛(gūn-nūa-nua)
枵鬼囡仔(iāu-gui-ghin-à)。流喙瀾(lāu cùi-nūa)。
二、趣味性
台語本身是一種心適、趣味的語言，咱會當隨時用身驅邊的物件，對四周圍的親友、同事，講一寡感謝的話、祝福的話、呵咾的話，甚至創治的話。比如：咱用茶(酒)杯來做例；
．講好話，祝福的話：
「茶米啉落喉，祝汝事業早出頭。」 (啉lim；汝lì)
「茶米啉一喙，予汝榮華兼富貴。」 (喙cui。)
「酒杯圓圓圓，予汝富貴萬萬年。」 (予hō)
「酒杯深深深，在座各位會仝心。」 (仝gāng)
「酒杯捧峘峘，祝福子弟中狀元。」 (峘/懸gŭan)
「酒杯捧下下，逐家趁錢無地放。」 (下gē，地de。放hē )
「酒杯捧正正，個個事業大捙拚。」 (捧păng，拚bian)
「酒杯囥一爿，共人借錢毋免還。」 (囥kng。爿bĭng。還hĭng)
「手牽手天長地久，喙對喙萬年富貴。」
三、古老性─讀書音、入聲字、古漢字
台語保留了一千三百外冬前唐朝時代的官話，也着(diorh)是「讀書音」佮「入聲字」，以及「古漢字」，這佇語言學來講，是人類一種足寶貴的文化遺產。下面分別做說明 ：
■讀書音
「登高必自卑，行遠必自邇。」
(卑bi；邇nì)」
「近朱者赤，近墨者黑。」 (赤cīk；黑hīk)
「酒逢知己飲，詩向會人吟。」 (飲ìm；吟ghĭm)
「兩人一般心，有錢堪買金。」 (般buan；錢ziăn)
「人情似紙張張薄，世事如棋局局新。」(紙zì；薄bok)
「近山識鳥音，近水知魚性。」 (鳥niàu；水sùi；魚ghŭ)
楓橋夜泊 張繼
月落烏啼霜滿天，江楓漁火對愁眠，
姑蘇城外寒山寺，夜半鐘聲到客船。
【註】天tian、眠bhiăn、寺sī、船sŭan/siăn
夜雨寄北 李商隱
君問歸期未有期，巴山夜雨漲秋池，
何當共翦西窗燭，卻話巴山夜雨時。
【註】期gĭ、池dĭ、燭(ziōk)、時sĭ
■入聲字
江雪 柳宗元
千山鳥飛絕，萬徑人縱滅，
孤舟簑笠翁，獨釣寒江雪。
【註】絕zuat、滅bhiat、(翁ong)、雪sūat攏是屬於跤(腳)擋手擋的入聲字。
滿江紅 岳飛
怒髮衝冠，憑欄處，瀟瀟雨歇。
抬望眼，仰天長嘯，壯懷激烈。
三十功名塵與土，八千里路雲和月。
莫等閒，白了少年頭，空悲切。
靖康恥，猶未雪；
臣子恨，何時滅？
駕長車，踏破賀蘭山缺。
壯志飢餐胡虜肉？
笑談渴飲匈奴血。
待從頭，收拾舊山河，朝天闕。
【註】
「歇hiāt」、「烈liat」、「月ghuat」、「切ciāt」、
「雪sūat」、「滅bhiat」，「缺kūat」、「肉riok」、
「血」hiāt、「闕kūat」等攏是屬於跤(腳)擋手擋的入聲字。
■古漢字
「箸dī」、「伊i/ī」、「汝lì」、「走zàu」、「鼎diàn」、「糜mŭe」「枵iau」、
「烏o」、「剉cor」、「晏uan」、「冊cēh」、「穡sīt」、「倩cian」、「芳pang」、
「殿den/din」、「湧ìng」、「甌au」、「卵¤ng」、「吊脰diàu-dāu」、「凊飯cīn/cīng」、
「新婦sīn-bū」、「有身u-sin」、「斟酌zīm-ziōk」、
四、文學性
有關台語的文學性，我着用流行佇台灣民間數百年的「褒歌」來簡單證明台語是有文學的。褒歌又被稱呼做「台灣國風」，伊的特色是「七字仔」、「四句聯」、「全鬥句」，哪親像詩經的「十五國風」一般。比如：
半暝月娘
半暝月娘入紗窗，偏偏照我守空房，
關窗將月緊緊送，送去隔壁照別人。
(暝mĕ/mĭ。守ziù/ziu-。)
佮君約佇
佮君約佇甘蔗溝，蔗葉拍結做號頭，
夭壽啥人共阮敨，害阮一人淪一溝。
(佮君gà-gun。拍結pà-gāt。啥人sian-lăng。敨tàu。淪nng。)
門口一欉
門口一欉相思欉，相思病落毋知人；
先生來看講無望，搭心來看好噹噹。
(毋知人m-zāi-lăng。搭心dà-sim。)
阿君卜轉
阿君卜轉阮卜留，留君神魂用紙包。
等君去後提來敨，日日見君佇阮兜。
(卜轉bhe-dǹg。提來敨teh-lāi-tàu。佇阮兜di-ghun-dau。)
一尾好魚
一尾好魚毋食釣，泅到江中尾直搖，
掠汝袂著予汝笑，堅心做網拋甲著。
(毋食釣m-ziah-dior。泅sĭu。掠liah。袂著bhe-diorh。拋甲著pa-gah-diorh)
千里路途
千里路途無嫌遠，見面親像蜜攪糖，
苦毋時鐘行倒轉，好話未講天先光。
（無bhŏr/bhōr-。攪糖giau-tňg。苦毋ko-m-。未講bhe-gòng）
五、思想性
俗語是一個族群生活經驗的智慧，亦是一個族群的風土民情佮思想信仰的縮影，反映迄(hit-)個族群的個性，透過祖先的「古早話」予咱會當了解本土文化的源頭。台灣的俗語，除了充滿人生智慧佮哲理外，另外配合語言本身的音樂性，使得台灣俗語到處看會著、聽會著「押韻」的旋律，若像一首短短優美的歌詩。
．目珠(ziu)看粿，跤(ka)踏著火。
．九頓米糕無上算，一頓冷糜抾去囥(kng)。
．人情世事陪甲夠，無鼎佮無灶。
．卜去烏影，毋去吊鼎。
．大工一下指，小工磨半死。
．食糖算頓，食水久長。
．緊紡無好紗，緊嫁無好大家。
．不孝新婦三頓燒，有孝查囝路上搖。
．媠花佇別人欉，媠某佇別人房。
．做雞著筅(cìng)，做人著反(bìng)。
．有錢姑半路接(zīh)，無錢姑喙那覕(bhīh)。
．一箸喙裡哺，一箸佇半路，一箸金金顧。
尾聲─收話尾
有人講語言干礁(只有)是一種溝通的工具而已，會通着好。即款的觀點，對家己的母語來講是相當偏差的。因為語言不止是「溝通的工具」，伊嘛是一種「思考的方式」、「感情的交流」、「族群的標記」、「文化的延續」、「尊嚴的維護」，會使講一個語言就是一個「族群的符號」。
附錄：
將進酒ziōng
zìn ziù 李白Li-bik
君不見黃河之水天上來 gun•but gian•hōng hŏr•zī sùi•tiān siong lăi
奔流到海不復回 pūn liŭ•dòr hài•but hiu hăi
君不見高堂明鏡悲白髮 gun•but gian•gōr dŏng•bhīng ging•bī bik hūat
朝如青絲暮成雪 diāu rŭ•cīng si•bho sīng sūat
人生得意須盡歡 rīn sing•dik i•sū zin huan
莫使金樽空對月 bhok sù•gīm zun•kōng dùi ghuat
天生我材必有用 tian•sing•ngo zăi•bit iu iōng
千金散盡還復來 ziān gim•sàn zin•hūan hiu lăi
烹羊宰牛且為樂 pīng iŏng•zai ghiŭ/ngiŭ•ciaⁿ ūi lok
會須一飲三百杯 hue su•it ìm•sām bik bai
岑夫子 丹丘生 ghīm-hū-zù dān-kiū-sing
將進酒 杯莫停 ziōng zìn ziù bue•bok tĭng
與君歌一曲 u(i) gun•gōr it kiōk
請君為我傾耳聽 cing gun•ui ngò•kīng ni ting
鐘鼓饌玉不足貴 ziōng gò•zùan ghiok•but ziok gui
但願長醉不願醒 dan ghuan diōng zui•but ghuan sìng
古來聖賢皆寂寞 go lăi•sìng hiăn•gāi zik bhok
惟有飲者留其名 ī iù•im zià•liū gī bhĭng
陳王昔時宴平樂 dīn ŏng•sik sĭ•iàn bīng lok
斗酒十千恣歡謔 do ziù•sip cian•zù hūan hiōk
主人何為言少錢 zu rĭn•hōr ūi•ghiān siau ziăn
逕須沽取對君酌 gìng su•gō cù•dùi gūn ziōk
五花馬 千金裘 ngo-hūa-mà•ciān-gīm-giŭ
呼兒將出換美酒 hō rĭ•ziōng cūt•huan bhi ziù
與爾同銷萬古愁 u(i)
nì•dōng siau•bhan go ciŭ
20
秋風辭ciū hōng sŭ 漢武帝Hàn bhu de
秋風起兮白雲飛 ciū hong•kì heo•bik ŭn•hui
草木黃落兮雁南歸 cor bhok•hōng lok heo•ghān•lām gui
蘭有秀兮菊有芳 lăn•iù•siu heo•giōk•iu hong
懷佳人兮不能忘 hūai gāi rĭn heo•but līng bhōng
汎樓船兮濟汾河 hùan lŏ•sŭan heo•zè hūn hŏr
橫中流兮揚素波 hīng diōng liŭ heo•iōng sò por
簫鼓鳴兮發櫂歌 siāu gò•bhĭng heo•huat dau gor
懽樂極兮哀情多 hūan lok•gik heo•āi zĭng•dor
少壯幾時兮奈老何 siàu zong•gi sĭ heo•nai no hŏr
周南-關雎 詩經 gūan-zu sī-ging
關關雎鳩，在河之洲， gūan-guan zū-kiu , zai hŏr zī ziu。
窈窕淑女，君子好逑。 iau tiàu siok-lù，gūn-zù hon giŭ。
參差荇菜，左右流之， cām cu hing-cai ,zo iū liŭ zio，
窈窕淑女，寤寐求之。 iau tiàu siok-lù，gho bhī giŭ zio。
求之不得，寤寐思服， giŭ zio but dīk，gho bhī sū pik (hok)，
悠哉！悠哉！輾轉反側。 iŭ zaio， iŭ zaio， dian zùan huan cīk。
【參考資料】
台灣話講座 王育德 前衛
台灣話通論 許極燉 南天
台語文學與台語文字 洪惟仁 前衛
閩客方言史稿 張光宇 南天
語言學概論 謝國平
語言、社會與族群意思 黃宣範
【編著】
台語實用字典(台北：百合，2003)
台語文天地(台南：鼎雅，2002)
母語的田園(台南：鼎雅，2002)
台語歌仔冊(台南：鼎雅，2001)
台灣褒歌 (台南：鼎雅，2001)
唐詩三百首(羅馬字版) (台南：鼎雅，2001)
漢學仔冊選─昔時賢文、千金譜 (台南：鼎雅，2001)
母語的稻穗─學員寫作集(台南：鼎雅，2002)
全鬥句的台灣俗語(台南：鼎雅，2001)
台語文寫作集(台南：鼎雅，2000)
台語囡仔歌(台南：鼎雅，2001)
千家詩(羅馬字版) (台南：鼎雅，2000)
華台語對照典(台南：鼎雅，2002)