課程名稱：(台灣鄉土語言)台語教學導論
講師：Dang Hōng-Zing 董峰政/國立高雄餐旅學院
網站：www.dang.idv.tw(鯤島台語文園地)
e-mail：dang1109@yahoo.com.tw
手機仔：0936-351-888
＊本文使用通用拼音自然調＊
一、何謂母語：
1廣義：本身族群祖先所使用，通行佇家己族群的語言。比如：客家話、福佬話、原住民話等。
2.狹義：自細漢對父母所學的語言（The language that one learns from one’s parents
when one is a baby）。
二、學習母語的重要性（族群語言保存的理由）：
1.族語是本土文化的活化石，是文化的光碟。。
2.族語是國家的資產，促進社會的多元化。
3.族語保存，會凍維護一個族群的尊嚴佮信心。
4.對傳統文化的保存有所幫贊。
三、台語教學的三大要素：
一、Why：為啥乜(物)
─為啥乜卜教母語？
─母語教育的基本觀念。
二、What：教啥乜
─母語教育卜教啥乜？
─母語教材的內容佮編輯。
三、How：按怎教
─卜怎進行母語教學？
─母語教學觀、教學法
四、母語教育師資的培訓
1.九年一貫課程有關母語教育政策是由九十學年度開始實施。並且國小六年級被列做必選的課程，所以母語師資的培訓著非常的緊急。
2.母語教育培訓師資的對象：現此時佇國中、國小任教，對家己母語使用有一定程度的老師。對母語有相當程度佮興趣的社會人士，另外電台台語節目的主持人佮電視台台語新聞的主播者。
3.培訓的管道：由現此時各地區的師範大學佮學院，抑者設有文學院的各大學，同齊開設有學分的課程，培訓在職各級老師，修了一定學分(以修輔系的標準)，經過考試合格，取得台語教師資格證書。但是就長期的師資培養來講，應該愛佇各院校成立各種母語的語文系，比如「台語語言/文學系」、「客語語言/文學系」等。另外像社區大學、社教館、有立案的各母語學會，會當大量舉辦台語文的研習班，提供對母語有興趣的社會人土進修。對社會人士取得母語師資的管道，會使參考「英語教師認定資格」的方式來辦理，經過各種的檢定測驗來取得母語師資的資格。
五、母語教材的編寫：
(一)母語教材編寫的目標：
1.引起對台語文之興趣並養成主動學習的動機。
2.培養學者聽、講、讀、寫等基本能力，在日常生活中靈活運用、表達情意。
3.提升學者了解本土文化佮欣賞母語文學之能力。
(二) 母語教材編輯參與人員：愛結合各專業的學者佮作者共同參與編輯。比如：母語文創作者、語言學者、心理學者、社會學者、國中、小的老師、母語文推動者等集思廣益，作伙參與。
(三)母語教材編輯型態與內容應多元化：童謠、童詩、民謠、韻文、故事、猜謎、俗諺、繞口令（盤喙錦）、笑話、相聲（答喙鼓）、新詩、散文、短篇小說、戲劇等。並製作錄音帶、錄影帶、電腦多媒體、書本、圖片、幻燈片、戲尪仔。
六、結論
台灣有史以來，不管是就原住民的觀點，抑者四百冬來移民的觀點，各族群的母語第一擺有機會進入教育體系，這是千載難逢的機會。佇即個關鍵的時機，是毋(m)是會當順利來推廣各族群的母語，師資培訓佮教材的編寫，著扮演了重要的角色。尤其長期以來台灣各族群的母語受著輕視，所以對台灣的認識一片的空白。因此對有關本土文化的資料收集、編輯是上蓋重要的工作，才會當予咱的國中、小的老師有物件通好教學，所以請逐家共同來重視即兩項工課。
台語教學的困境
Dang Hōng-Zing (董峰政)
依筆者最近二、三冬來，佇各縣市(1999-2003)小學所實施的母語教學抑是有關母語演講過程中，所拄著(dù-diorho)的問題佮所觀察的情形，發現目前母語上重要的課題是母語的認知佮母語交談的環境。另外是母語教學的生活化、趣味化佮歌謠化，才會當予學習者產生興趣。母語的教育千萬毋通(m-tāng)一開始，予(ho)初學者(小朋友)為著漢字的用法、羅馬拼音的拼法、變調佮文白音咧頭疼，應該使用母語直接教學法。
前言
對(ùi)今年(2001)九月開始，國民小學一年級已經開始實施母語教學，雖然一禮拜只有一節課40分鐘，但是對(dùi)母語的落實，已經大大向前踏出一大步，這對族群的自我認同佮和諧有重大的意義。雖然政策的方向真明確，但是長期母語的拋荒，煞造成教學上的混亂，種種的問題浮出抬面上，若無好好解決，會造成教學者佮學習者的困擾佮反感。以台語(2001)作例：台語的口頭語有所謂漳州腔(宜蘭腔)、泉州腔(鹿港腔)、漳泉濫腔(南部腔佮北部腔)、澎湖腔、等腔口，所造成發音標準的困擾。書面語更加混亂，首先漢字的使用，有主張用本字、訓讀字、擬音字、漢羅並用字等相當無一致。擱來是音標的使用，更加是一人一套，有人主張用「教會羅馬字」、有人主張用「台灣語言音標」(俗稱Tlpa)，有人主張用「通用拼音」，會使講是五花十色，即款母語的教學環境袂(bhe)輸像「春秋戰國」。除了腔口、漢字、音標使用的混亂以外，另外欠缺對母語教學重要性的認知佮母語師資培養的不足，使得母語的教學方向有所偏差。下面我著提供母語教學的幾點看法，予母語教學者作參考：
一、台語教學觀念的加強：
佇母語的教學中，除了教材的編輯以外，上重要是教師的認知佮家長的心態。因為一節課只有40分鐘而已，所以一般的學校攏安排由級任的老師家己教學，真濟老師有的是專業能力欠缺，有的是對母語的認知無夠，總以為「語言只是溝通的工具而已」，所以毋免傷認真。另外一般的家長因為長期受著升學主義的影響，所以對「毋免考試」的母語課程，普遍的心理是凊彩(cìn-cai-)教教著好，根本無當做一回事。咱攏知影，落實母語的教學愛參生活相結合，如果徛佇母語第一線的老師佮家長無正確的觀念，安爾母語著無法度生澶(tuan)、釘根。
母語的功能除了有「溝通的工具」以外，伊嘛是一種「感情的交流」、「思考的方式」、「文化的傳承」、「族群的符號」、「尊嚴的維護」等功能，所以一個族群若失去了家己的語言，即個族群著永遠無法度建立家己的主體性。所謂「卜消滅一個國家，先毀掉伊的文化；卜毀掉一個文化，先埋葬伊的語言佮文字」著是咧講即款的道理。教育的目的之一著是「認識家己」，所以學母語、講母語是一種的人權，是袂使受著剝削的，所以一個重視親情倫理的家庭，是無法度容允厝裡的序細袂曉(bhe-hiau-)用阿公阿媽的話來交談。
二、創造講台語的情境
語言一定愛佮生活相結合，換一句話來講母語毋是干礁(gān-dā)佇教學的時陣才講。台灣長期以來，實施國語政策相當的成功，所以即碼受過教育的人開喙、合喙攏是以所謂的「國語(北京語)」咧發聲，簡單講規個頭殼攏是「國語」的思考，國語成做每一個人的主要語言，所以造成上課的時學「台語」，私底下抑是下課的時著隨轉國語咧開講，即款的現象是因為多數人干礁慣勢使用國語所致，煞將母語當做「外國語」咧看待，這是推廣母語上大的困境佮挑戰。
所以母語的落實，除了增加學習時數以外，擱較重要的是無論佇教室、佇學校、佇厝裡隨時隨刻創造一個講母語的環境。今仔日，咱發現一般的社會人士抑是即碼(zit-mà-)的青少年朋友佇聽的部份攏較無問題，主要的原因是受著電視節目、廣播節目佮選舉的影響，比如：「飛龍在天」、「親情勿(mài-)計較」、「鐵獅玉玲瓏」、「台語新聞」、「政見發表會」，簡單講著是咱有聽台語的環境，所以自然地著有聽的能力。但是對母語來講，干礁會曉聽是無夠的，安爾是「被動的」、「消極的」，因為語言上重要的是咧用來表達思想、意志、見解、感情等物件，所以「想卜講」、「會曉講」才是母語教學的重點。
為著達到想卜講、會曉講的目標，愛擱轉來母語第一線的關鍵角色─老師佮家長，所以老師佮家長本身愛先具備母語使用的能力，能力不足者，著趕緊去請教別人抑是參加母語的研習班，加強母語的使用能力佮深度。指導者有專業能力了後，佇教材、教學方面，著愛把握語言的「生活化」、「趣味化」、「歌謠化」、「故事化」、「多媒體」的特性，簡單講著是引起學習的動機。
(一)生活化：著是佇學習者(小朋友)的生活中看會著、聽會著的話，比如：(a)數字教學：1、2、3、4、5、6、7、8、9、0數字佮電話號碼。
(b)各種器官：頭、鼻、耳、面、手、跤、目珠、指頭、身軀等。
(c)日常用品：齒膏、雪文、衛生紙、面巾、簿仔、冊包、筆記、紙等。
(d)招呼語：爻早(ghāu-zà)、食飽未、來坐、用茶、順行、請安等。
(e)親情：阿公、阿媽、阿伯、阿叔、阿姑、阿姨、阿舅
(f)學校人物：老師、校長、主任、組長、同學、班長等。
(g)地號名：台灣、台南、台北、永康、美國、中國等。
(h)教室的設備：烏枋、粉筆、水桶、窗仔、門、掃帚、電風、開關等。
(i)學校的設備：運動埕、禮堂、實驗室、電腦教室、音樂教室等。
(j)電化產品：電話、電視、電冰箱、電腦、電鍋、瓦斯爐、手機仔等。
先對(ùi)身軀邊具體的代誌佮物件講起，由單字、語詞、規句話到對話，一步一步學起。
(二)趣味化：著是愛針對學習者的心理來引導伊行入母語的田園，每一種的語言攏有伊的特色的所在，依台語來講，除了台語笑話，另外像：
1.謎猜：二個姊妹平峘(gŭan)平大，一個佇內，一個佇外。
2.盤喙錦：和尚弄破鼓，提褲來補鼓。鼓破，褲補…。
3.答喙鼓：「123唱袂離」。(董峰政2001)
4.喝場：來來來，看看看，緊來緊看，慢來減看一半…。
5.激骨仔話：烏矸仔貯豆油─無地看。
6.台灣俗語：細漢偷挽匏，大漢偷牽牛。
7.食茶講好話：茶米飲落喉，早日會出頭。
(三)歌謠化：音樂性是台語語言的特色之一，加上有旋律化的內容好唸、好記，所以用歌謠旋律來教母語，是上有效的教學方式。歌謠化除了變成歌曲以外，另外像押韻鬥句嘛是屬於歌謠一種。歌謠化方式有用新作曲的，用套曲的方式，抑是另外用自然吟唱的方式來表現，當然配合動作來表演效果一定擱卡好。比如：
【套狀元樓】
人客若來請用茶，請問汝是食飽未、
另日有閒擱來坐，離開的時講再會。
【自然吟唱】
一天過了又一天，身軀無洗全全銑，
走去溪仔邊洗三遍，毒死烏仔魚數萬千。
(四)故事化：毋管大人抑囡仔攏愛聽故事，藉著講故事引起囡仔對母語興趣佮好奇心。
(a)台語典故：正港，牽手，食飽未、佗位去、鴨仔咧聽雷等
(b)說唱：自彈、自唱、自演等，台灣民間的故事(虎姑婆、好鼻師等。
總講一句，無論「生活化」、「趣味化」、「歌謠化」、「故事化」等方式，攏是卜引起囡仔兄學習母語的動機佮興趣。
三、純正台語語詞的加強
台語(指閩南語)的人口，雖然佔整個台灣人口的74%，但是一百冬來因為語言政策的偏差，為卜提倡日本話佮北京話(攏叫做國語)，煞(sùa-)佇國民義務教育的期間，全面禁止講母語，學生囡仔講家己(dī/gī-)的母語不但受著輕視，而且愛擱罰錢，講阿娘的話親像做毋著(m-diorh-)代誌。學生囡仔變成母語失聲的一代。
佇台語長期的拋荒之下，致使厝裡的家長、學校的教師，絕多數已經無法度用家己母語做主體性來交談、討論、上課、演講等，今仔日一般人講台語出現了三種無正常的現象：
(一) 用北京語的音來發台語：比如「佇厝靠父母，出外靠朋友」，「靠kor」讀國語音「kàu」變成「哭」的音。
(二) 半精白的台語：雖然定定聽人講「台語嘛會通」，其實多數人差不多講十句話，三、四句愛轉北京語才會當來表達。比如電腦「網路」、褪「口罩」、汝的「行照」、參加「朗誦」比賽、「甲車」的人綴我行、食飽三粒「多喝水」、「噴霧器」換三千箍，其中「網路」、「口罩」、「行照」、「朗誦」、「甲車」、「多喝水」、「噴霧器」等字詞著自動轉北京語來講，咱共(gā)稱呼做「半精白仔」的台灣話，那(na)像「雞母屎半烏白」，這著是長期無用台灣話做主體性，所以一寡話講無路來，尤其新出的名詞，咱的政府無專門的機構來做對照的工課，所以若毋是變外來語著是用國語咧發音。
(三) 硬拗的台語：過去一般人總是感覺台語無啥物好學的，尤其是受過高等教育的人，所以講台灣話攏用家己的想法來唸台語音，其實國語佮台語的語詞是無仝款的所在，袂使一對一硬拗硬翻。比如「由於」天氣的關係，台語講做「因為」；高雄市花叫做「木棉花」，台語講做「斑芝(脂)花」；安平外海出現「鯨魚」，台語讀做「海翁」；「北上」參加會議，台語讀做「上北」等，其他猶有台語本身的講法：「太太─牽手」、「情人─搭心个(兄)」、「相聲─答喙鼓」、「歇後語─激骨仔話(孽畜仔話)」、「繞口令─盤喙錦/箍喙舌」、「聊天─開講/話仙/破讀(pòr-dāu)」、「前言─踏話頭/扮仙/起鼓」、「最後─煞尾/尾齣」、「螢火蟲─火金姑」、「蝌蚪─肚拐仔」、「黑面琵鷺─烏面撓抔(la-bue)/飯匙鵝」、「夜鷺─暗光鳥」、「老婆─牽手」、「玉米─番麥」、「花生─塗豆」、「口罩─(牛)喙掩仔」、「壓歲錢─硩(dè-)年錢」、「漲潮─飽流/滇流(din-lău)」、「退潮─洘(kor)流」、」…等，咱攏愛用正宗原汁的台灣話，袂使直接對(ùi)北京語翻做台語。目前即款用準的、硬拗的、硬翻的情形，相當的嚴重。
四、台語專有發音的加強
筆著佇母語的教學過程佮近年來擔任多次的母語演講中，發現年紀輕的老師佮參賽的小朋友，因為長期使用國語做表達工具，所以對台語專有的發音，毋是「走音」著是「袂輾轉」，所以拄著即款音，愛特別加強練習，即款的發音有：
「bh」(雙唇濁塞音)：阿母(ā-bhù)讀做(ā-bù)
「gh」(舌根濁塞音)：台語(dāi-ghì)讀做(dāi-ì)
「ng」(舌根濁鼻音)：優雅(iū-ngà)讀做(iū-nà)
「r」(舌尖前濁塞擦音)：燒熱(siōr-ruah)讀做(siōr-luah)
「m」(雙唇鼻音韻尾)：心肝(sīm-guan)讀做(sīn-guan)
「p」入聲字(雙唇塞音韻尾)：氣壓(kì-āp)讀做(kì-a)
「t」入聲字(舌尖塞音韻尾)：肉骨(bhà-gūt)讀做(bhà-gū)
「k」入聲字(舌根塞音韻尾)：大學(dai-hak)讀做(dai-hà)
「h」入聲字(喉塞音韻尾)：好食(hor-ziah)讀做((hor-zià)
五、「文白音異讀」的認識不清
「文白音」本成是語言上無仝場合的兩種音讀，伊的來源是來自無仝的語言層，當初產生「文白異讀」的時，會使講是「田無交，水無流」。但是時間一下久，加上教育的普遍，文白音著開始產生透濫的現象。所以，當講話的人，無法度分別文白的時，著是文白音競爭、融化、合併的時陣。這著是目前咱的口話音所使用的情形。(1996楊素芳)
現代漢語方言中，以台語(閩南語)的文白異讀現象上豐沛，除了一般文白音一字二讀以外，有的是一字三讀，一字四讀。比如：
一字兩讀：「水」sùi─zùi；「山」san─suan；「名」bhĭng─miă。
一字三讀：「生」sing─sin/cin；「額」ghik─ghiah/hiah。
一字四讀：「成」sĭng─ziăn/ciăn/siăn；「下」hā─hē/ē/gē。
佇台語的口頭語當中，因為表達的需要，目前已經是文白透濫，甚至有的語詞干礁使用「文音」做口頭語，比如：「十全(sip-zŭan)」，「zap-zňg」的白話音煞拋荒去。雖是文白音透濫，但是必須愛遵照「約定俗成」的講法，袂使依家己的想法凊彩使用。
(一)文白異用，意思不同：比如「山水(sān-sùi)文文音」、「山水sūan-zùi」白白音」，佇遮文文音讀指景色、白白音讀指山頂流落來的水。「交易(gāu-ik)文文音」、「交易(gā-iah)白白音」，文文音讀是指買賣往來，白白音讀是指鬧熱、生理好的意思。
(二)文白音互用，意思相同：比如「變成(biàn-sĭng)文文音」，「變成(biàn-ziăn)文白音」，「變成(bìn-sĭng)白文音」、「變成(bìn-ziăn)白白音」等四種講法攏有人咧講，嘛攏指仝一個意思。另外親像「迎接(ghiān-zih白白音)」、「迎接(ghĭng-ziah文文音)」 ；「希望hī-bhāng/bhōng」、「夢想bhang/bhong-siùn」等攏屬於即種文白音互用，意思無改變的例。
(三) 文白音專用，意思有相通：比如「教師(gau)文音」佮「教冊(ga)白音」；「拋棄(pāu-ki)文音」、「拋荒(pā-hng)白音」；「孝順(hau-)文音」、「帶孝(ha)白音」，雖然意思有相關，但是音讀的時袂使互相透濫使用。
(四)使用「文白音」抑是「白文音」的疊字，來加強意思：
接接：zìh-ziah(白文音讀) 迎接(ghiān-zih白) ；接受(ziàh-siū文)
倚倚：i-ùa(文白音讀) 倚賴(i-lāi)；倚靠(ua-kor)
敢敢：gam-gàn (文白音讀) 勇敢(iong-gàm)；敢死(gan-sì)
延延：iān-ciăn(文白音讀) 延遲(iān-dĭ)；延傷久(ciān-siūn-gù)
語言是文化之一，文化有伊的起源、發展佮演變。讀書音有文字做根據，白話音雖然卡少用文字紀錄，但也是代代相傳的，是有根據的，並毋是亂寫亂說的。除了一寡「外來語」的白話音外，讀書音和白話音攏是以漢語為主體的，二種之間，是有伊一定的對應關係。所以咱若了解文白音異讀的情形，著會當讀出正確的音佮寫出正確的漢字。
結論：
自古以來，對家己無信心的族群，怹(īn)的統治階層佮讀冊人攏會拚命去學別人的強勢語言，因此失去了家己族群的尊嚴。但是當(d¤g)一個族群倒轉來家己母語的田園種作的時，著是即個族群文藝復與的開始。所以今仔日，咱的母語教學會當正式進入教育體系，會使講千載難逢的機會，對台灣各族群的文化傳承佮尊嚴的維護有相當大的幫助。但是長期拋荒的母語，毋是一時間有法度恢復，母語的建立是一件重大的文化工程，所以佇咱踏出母語教學的第一步的時，咱需要對母語有「正確的認知」、「專業的師資」、「活潑的教材」、「趣味的教學」、「音樂性的配合」、「提供母語的環境」，安爾母語的教育，才會當釘根、生澶。