課程名稱：漢字與漢羅文字選讀
講師：Dang Hōng-Zing 董峰政/國立高雄餐旅學院
網站：www.dang.idv.tw(鯤島台語文園地)
e-mail：dang1109@yahoo.com.tw
手機仔：0936-351-888
一、
踏話頭─語言和文字關係
．有族群著有家己的溝通語言。
．全世界現存的語言大約有五千幾種。
．先有語言才有文字，語言有文字化無到一百種。
．語言數量遠多於文字。
．文字附屬佇語言身上，語言是有機體，所以文字永遠無夠用。
．語言若是消失，文字的使用也綴伊消失抑者拋荒，比如拉丁語。
．用漢字記錄閩南語，上早的文獻是對(ui3)明朝嘉靖年間(1566年)，流傳落來的潮州「荔鏡記」戲文。
．1880年後，泉漳地區韻書相接出現，閩南語的漢字才聊聊仔形成固定的寫法。
．台灣閩南語(俗稱台語)，因歌謠戲曲、歌仔冊記音的需要，漸漸才形成固定的寫法。
目前台語的文字表現方式有三種：全漢字、羅馬字佮漢羅並用。
「全漢字」的書面語至少有四百冬的歷史，伊的缺點是有一寡語詞無法度用準確的文字來表達伊的音義。
「羅馬字」自1865年英國傳教士馬雅各醫生，被委派來台灣傳教，同時將羅馬字傳來台灣，到今已經一百三十外冬，留落了袂少的文獻佮白話字聖經。
「漢羅文字」是以漢字為主，羅馬字為副，為現代台語寫作、教學佮推廣，解決一寡有爭議的漢字佮外來語的問題，但是因為書寫無符合傳統的習慣，所以一直無法度普遍化。
二、台語的流浪記佮台語的多元性
(1) 外來語加上在地語：外來的「古漢語」佮閩南在地的「越語」相透濫，形成了所謂的「閩南語」。後來外來的「閩南語」佮台灣在地的「平埔語」相透濫，形成了所謂的「台語」。
(2) 漳泉濫：漳州音佮泉州音的交流透濫，形成了「不漳不泉」、「亦漳亦泉」的南、北部腔。比如：皮鞋pūe-ĕ/pe-ŭe。汝去li-ki/lu-ku。
和尚看鴛鴦，咬薑尻川癢(siūn/siōn。iun/ion。giun/gion。ziūn/ziōn)
(3)文白濫：變成(biàn-sĭng/bìn-ziăn)；小學sior-orh/sior-hak。老師no-su/lau-sai
三、漢字使用的原則
(1) 漢語語源字：台語漢字的本字，一般習慣利用「中古切韻系統─集韻、廣韻」來驗證。但是語言是有機體，有創造力、有生命力，所以「韻書」、「說文」等干礁會當反映漢語當代的雅言系統，所以除了借用傳統聲韻學、文字學、訓詁學外，嘛愛有新的語言學的觀念。
(2)台語漢字的選用：基本上愛符合三個條件，(1)聲韻、(2)聲調、(3)意思。尤其聲韻、聲調是根據台語發音才有準算。台語發音根據「文白音異讀對應」佮「反切音的使用」，總是愛有社會基礎佮聲韻的根據，是袂使濫糝使用，比如：
ō-bang：若寫「黑板」是訓讀用，意思有對(dui)，但是聲韻、聲調無正確，因為讀做「hik-bàn」，所以毋是台語的用字。愛寫「烏枋」才有符合選用的三個原則。
u kāng bhōr sùn：若寫「有孔無筍」，是烏白鬥的字。因為「孔」讀做kòng(文)─kàng(白)二音，聲調無對；「筍」是聲韻、調有對，但是意思無正確。愛寫做「有空無榫」。
ziah hòr•dàu siōr bor：若寫「呷好道相報」，是烏白鬥的字。「呷」hāp，音義攏不對。「道」dōr音義攏不對，是借用華語音dàu。愛寫做「食好鬥相報」。
四、台語書面文字的用法
(1)使用本字：着是古漢字。
■共同使用語：日、月、山、風、星、雲、天、地、金、木、水、火、土、春、
夏、秋、冬、雪、霜、雨、川、河、江、海、魚、城、寒、冷、
燒、熱、夜、耳、鼻、手、目、頭、毛、花、柳、心、年、樹、
■台語獨自保留古漢語：
箸dī、伊i/ī、汝lì、走zàu、鼎diàn、糜mŭe、枵iau、烏o、剉cor、
晏uan、冊cēh、穡sīt、倩cian、芳pang、殿den/din、湧ìng、甌au、
卵¤ng、晝dau、搵un、食ziah、細se、俗siok、跤ka、喙cui、
吊脰diàu-dāu、凊飯cīn/cīng-b¤g、新婦sīn-bū、定定dian-diān。
有身u-sin、斟酌zīm-ziōk。
(2)非漢語語源字：使用方言字：方言字著是各地區，按照家己的口音所使用的文字，所以台灣話特有的語詞，是愛用方言字做根據。方言字借字有二個基本原則：一、借音字原則、二、借義字原則。比如：
(a)借音字：方言特有的詞，語源已經無法度考證的時，才照約定俗成的擬音字。不爾過「擬音」愛用台灣話的本音。比如：查甫(zā-bo男人)、查某(zā-bhò女人)、啥乜(sian-mih什麼)、爻(ghău)、捌(bhat，曾經)、 緣投(iān-dău英俊)、阿咾(ōr-lòr誇獎)、散赤(sàn-ziah/ciah貧窮)、袂(be7，不會)。
(b)借義字：又叫做「訓讀字」，借義字著是借用華語的「字義」來讀台語的音。有一寡台語揣無適當的漢字，使用擬音字擱無妥當的情形下，只好用訓讀字。但是訓讀字愛儘量避免。比如：的(ĕ)、個(ĕ)、到(gau)、才(ziah)、娶(cuā)。
(c)俗用字：民間的用字。遮的字一般電腦有的是拍袂出來，通常愛造字。建議勿(mài)造字，直接使用羅馬拼音卡妥當。
＊ 民間的用字，電腦拍會出來的字：卜(bheh，有借「要/欲」字) ；尻川(kā-cng)；着*(dorh/diorh)；啉*(lim)；刣*(tăi)；媠*(sùi嫷)；捾*(gūan)；躼*(lor)；胿*(gui)；个*(ĕ)；沯*(ciăng)；挵*(long)；褿*(ziău)；僫*(orh)；噍(da)；迹(ciah)。*記號表示愛佇word「插入」「符號」才有的字。
＊ 民間的用字，電腦拍bhe(袂)出來的字：cit-tŏr(cit迌)；bhūe/bhē(借「袂」字)；mai(借「勿」字)；beh(借「爬」字)；bhài(借「歹」字)；cūa(借「帶/娶」)。
【舉例】
一、全漢書寫舉例
獅仔皮 (台文版)
深山林內有一隻驢仔，會使講所有其他的動物攏無咧共信道。
有一屆驢仔佇深山林內無意中抾著一領獅皮，驢仔著誠歡喜，因為伊心內想講，只要將即領獅皮幔佇身軀頂，著會當變做獅仔的模樣(範勢)，四界耀武揚威(展風神)。
驢仔穿著獅皮了後，著誠爽勢行向樹林的東爿去。
一寡細隻動物看著伊，掠準是獅行徛來，驚甲起跤走、起跤傱。
驢仔看著更加歡喜、得意，伊擱再向樹林的西爿去，遐的動物看著，嘛攏驚甲起跤走、覕起來。
驢仔感覺足歡喜，著佇樹林內四界賴賴趖，隨便嚇遐的毋知實情的動物。驢仔煞掠準家己有偌本領咧，所以其他的動物攏會驚伊。
後來，驢仔佇山頂拄著一隻狐狸，嘛想卜對伊臭銃(衝)一下，喝講：「閃卡邊啊！」狐狸聽著講話的聲音，心內不免起了疑心：「這敢是獅咧叫的聲音？」
狐狸行倚驢仔身軀邊，發現伊毋是真正的獅，著故意對驢仔講：「聽講獅大王的喝聲誠旺聲(響亮)，敢會使喝一聲予阮聽看覓咧？」
驢仔聽著狐狸的呵咾，著歡喜甲大細聲叫。狐狸一聽原來是驢仔的叫聲，著講：「哈哈！驢仔聲，擱卡安怎咻、安怎叫，猶原是驢仔聲，毋是獅的喝聲！設使(如果)汝若無出聲，我犯勢猶擱予汝身軀所穿的獅仔皮騙甲戇戇踅！」
二、全羅書寫舉例
bān zī mĭ
bān-zī-hue, gūan-gūan-à, diam-diām-à,
kia di lām-dāi-ŭan ē to-dē,
kia di gōr-hiŏng ē gē-lō
bhī-bhī-a cior, īn-ui cūn-hong bhī-bhī-a cue.
hong-hun ē hūn-cài,
ài gà ī bi hun-āng-a dè,
hai ī lu kui lu zē！
m giān hong cūe lorh
tŏ,
m guan
lāng tiàn-tang a
si ùan-cēh,
bān-zī-mĭ
mua ciu gi,
dak gang hiòng tin
iat ciù.
iong mua-sim ē hūe-lùi,
hùa zo¤g cūn-tin ē hor sī-ziāt
斑 脂 棉
斑 脂 花，峘峘仔，恬恬仔，
徛佇南台灣的土地，
徛佇高雄的街路。
微微仔笑，因為春風微微仔吹。
黃昏的雲彩，
愛佮伊比粉紅仔底，
害伊愈開愈濟！
毋驚風吹落土，
毋管人疼痛抑是怨嗟，
斑脂棉滿樹枝，
逐工向天拽手，
用滿心的花蕊，
化妝春天的好時節。
三、漢羅書寫舉例
台灣特有歷史背景，所以產生了足濟「外來語」，遮個(ē)外來語，往往是無法度用漢字來書寫，上蓋好的方法著是用羅馬字，比如ā-lu-mih(鋁、輕銀)、起毛誌ghiang(心情好)。另外有一寡表達聲音的字，嘛需要借用着羅馬字。比如īn-in-uaihn-uaihn (睏竹仔眠床發出的聲音)、pìn-piàng叫(摔物件的聲音)，捌羅馬音的人讀起來正確，擱袂產生誤解。漢羅文字是以漢字為主，羅馬字為副，為現代台語寫作、教學佮推廣，解決一寡有爭議的漢字佮外來語的問題。
【舉例說明】
酸葡萄
有一隻狐狸，看diorh葡萄生gah密密密，
一pā一pa ē葡萄攏真大粒。
狐狸ghiàn gah 喙瀾 cap-cap滴，
想bhe挽來食。
跳gŭan跳gē，跳起跳倒，l
攏挽bhe-diorh。
gàu路尾，伊跳gah無力，iau是無食diorho。
狐狸只好講：「葡萄ia未熟，一定足酸eo，mài食kà好。」
(台文漢字)
有一隻狐狸，看着葡萄生甲密密密，
一葩一葩的葡萄攏真大粒。
狐狸癮甲喙瀾喢喢滴，
想卜挽來食。
跳峘跳下、跳起跳倒，l
攏挽袂着。
到路尾，伊跳甲無力，猶是無食着。
狐狸只好講：「葡萄猶未熟，一定足酸的，勿食卡好。」