人情留一線，suaⁿ

日後好相看。kuaⁿ

「人情留一線，日後好相看。」即句俗語是咧提醒，做人毋通傷絕，愛留一點後路予人行踏。人佮人鬥(dàu-)陣之間，難免因為個性無仝、溝通不良、利益衝突、受人搧動，多少會造成一寡磨擦，有的人無法度控制家己的情緒，佇「相罵恨無話」的情形下，無留予對方一點仔情面，致使日後逐家攏歹面相看，那親像冤仇人，即款的做法著親像北京語所講：「損人不利己」的代誌，是一種無成熟的行為。

俗語講：「有人的所在，著有問題」，除了牽涉利益的問題以外，有足濟是參人性有關係，當然有的是修養的問題，毋管是按怎？既然無法度避免問題的發生，至少袂使予問題惡化，到無法度排解的地步。也著是愛予對方有一條活路可行。佇「孟子」即本冊捌講過：「拍獵的時，網仔干單(gā nā)會當圍三面，愛留一面予牲生(zīng-seⁿ)走避之用，所謂「網開一面」，毋通趕盡殺絕。仝款的意思，對待別人嘛是愛按爾，若無，欺人太甚，有時會「逼虎傷人」，顛倒傷著家己。有人講：「地球是圓的，相拄會著」，所以予別人空間，著是予家己空間，應該是即句俗語上好的註解。

參即句俗語相關的，另外有：「仙人扑鼓有時錯，跤步踏差啥人無？」、「捌人，卡好捌錢」、「有量，才有福。」、「人在人情在，人亡人情亡。」、「輸人毋輸陣、輸陣歹看面。」、「饒人不是痴漢，痴漢便不饒人。」、「父死路遠，母死路斷。」。

〔華文註〕

1.人情留一線(rīn-zĭng lāu zit suaⁿ)：平時預留一點情面給對方。

2.日後好相看(rit āu hor siōr kuaⁿ)：日後見面才不會惡言相向。

(本文刊佇八十七年十二月八日•聯合報─鄉情版)