欠水的時陣(修訂稿)

劉月華/dang hōng-zing 09/23/2003

各位評審先生，各位同學：大家好！

『有水的時愛想無水的艱苦，毋通亢旱望落雨』。

我是第 號，今仔日，我所卜(bhe)演講的題目是『欠水的時陣』、『欠水的時陣』。

『乖囝仔！卡緊的(e^o)，身軀去洗洗咧！卜食中晝矣(a^o)，通好歇睏一下！』阿媽(mà)知影我上驚熱，若看著阿爸下課載我轉來，著(dorh)趕我卡緊款款咧(le^o)，食晝(dau)通好吹冷氣，卡好睏。

即幾日，實在有夠熱，佇(di)才藝班內底涼涼啊！出來門口著熱起來，這嘛莫怪，日頭焱甲若火燒埔，宛然像火爐，天公伯仔毋(m)落雨，卜(bhe)那有法度，不時著汗流甲喢喢滴，規身軀臭汗酸味，真赤疫(iah)，偓促(ak zak-)甲坐袂稠！恬恬(diām-)坐佇椅仔嘛咧流汗，電風的冷風吹甲變燒風，真正是：「天無雨，人無步」！

唉！傷(siūⁿ)久無落雨矣，不但外口日頭熱，水庫的水，嘛強強卜無夠用矣！若(na)是開始限制用水，代誌著大條囉； 咱共想看覓(māi)，洗身軀、洗頭，煮飯、煮菜、洗衫、洗車 …… 所有愛洗蕩(d¤g)的攏愛用著水，天氣愈熱，用水愈傷(siong)。若是毋落雨，無水通洗蕩，衛生就真bhài，病菌四界生湠，百病攏齊到，瘟疫(ūn-ik)就流行，愈想心肝愈驚惶。

敢是咱用水傷討債，SPA、RO水、機器洗車…逐項用水攏無撙節(zun zāt)，甚至剉樹仔、山坡地開墾，用來起庴、做球場、栽淺根的檳榔，破壞大自然的生命活力，予伊失去保存水分的能力，擱卡嚴重的，就是連看會著的溪流水，也予豬牛的屎尿、工廠的廢水來污染了，即碼毋才會無水通用，真是「自作孽不可活」！

頂禮拜日，阮去阿姨兜，阮阿姨上蓋爻扞(hūaⁿ)家，規間厝內，款甲誠整潔，阮到位的時，伊拄好咧洗衫，她佇洗衫機的排水管，裝一個水槽共有雪文沫(pueh)的水用來洗便所(馬)桶，把汰衫的水盛(sīn-)起來洗塗跤、沃花，毋定(niā)是一兼二顧，擱是一貫作業呢。阿姨講：『好天無存雨來糧，到雨來著無思量』，伊擱講「有時愛想無時苦，有水通用儉儉仔用，毋通亢旱望落雨」，佇有水的時陣，咱著愛好好的計畫，長期性的使用，毋通像『阿舍囝(了尾仔囝)』『三代累積，一代虧空』，一下手著共(ga)雨期的水用了了！

俗語講：『牛愛貫鼻，人愛教示』。欠水的痛苦，無定著是天公伯仔予咱一點仔的教示，設使那無即遍欠水的問題，咱敢是會予水資源對咱的身軀邊白白仔流失還沒感覺咧！

身體若無爽快，著愛去檢查，欠水若無方便，就愛量早預防，所謂「年頭飼雞栽，年尾做月內」，凡事愛先準備，愛想起來囥，做起來等，用水嘛仝(gang-)款，對(ùi-)儉水、揀水、惜水，保護水資源等，養成用水的好習慣，毋通等到欠水才來惜水，無樹仔才栽樹，喙焦才挖井，若按爾著火燒罟寮 ── 袂赴擱無望囉。

最後，我猶(iau/ia)是卜講：『有時愛想無時苦，有水通用儉儉仔用，毋通亢旱望落雨』，天公伯仔！卡緊落雨啦！我的演講到這，最後，祝咱台灣風調雨順，國泰民安！

【補充內容】

我拍開客廳的門，一陣燒氣熁(hāh-)過來，路頂的車比行路的人卡濟，打馬膠的路面，一陣一陣的燒氣沖上懸(峘gŭan)，遠遠的景色看起來噗噗跳，假那是咧地動，真濟人家戶，攏將門窗關起來，佇裡面吹冷氣，聽隔壁開店的阿叔咧講：若無冷氣的話，生意就真歹做，做穡的阿伯，透早天未光著就出門，趕緊做穡頭，日頭熱就返來。

氣候那會按呢？六月火燒埔，啊不過，晉前的『四月芒種雨』沒啥雨水，『五月乾土』，嘛攏沒照節氣；前幾冬仔，放暑假的時陣，常常有風颱，哪沒風颱嘛有雨水，這擺（嘸譙）不但四月、五月沒啥雨，等到暑假，嘛沒啥看到著雨，哪會按呢咧！甘講『天沒照甲子』是因為『人沒照天理』。

實在講起來，咱只要用一點仔思考，就有凍時常有水通用； 不管是在庴內，在學校、在公共場所，逐時攏有儉，先檢查逐個水轉仔頭和馬桶，甘是有漏水，水用煞，著順手關水轉仔頭；漱口、洗手，不通把水放乎汪汪流； 洗身軀用沖的，不用浴池仔泡； 沖馬桶的水，若分大頭、小頭，嘛也凍省很多。

洗手、洗面．洗衫水會當擱用來沖馬桶，尤其是那麼多的洗衫水擱有凍地土卡、澆花呢！你甘知，用清米潘水來洗碗，清潔擱省洗碗精鄉，減污染，炒菜的鼎太油，先用不路用紙擦一下，多足好洗的！另外，擱有很多省水惜水的方法，咱大家小想一下，就會凍到足濟。