台語詩創作佮欣賞
講師：dang hōng-zing(董峰政)
一首詩一個心情 / 一首詩一個故事
一首詩一個記錄 / 一首詩一個感動
一首詩一個思想 / 一首詩一個世界
父母恩 作者：dang hōng-zing
十月懷胎囝兒生，心頭歡喜抱紅嬰。
阿母惜惜到三更，毋甘細囝半暝哼。
阿爸奔波到暗暝，為著厝內三頓鮮。
嬰仔笑聲心頭甜，一切辛苦囥一邊。
用心計較有所爭，望卜子女出頭天。
勞碌走傱生活纏，親情感人那詩篇。
父母恩情卡大天，序細有孝卡好錢。
向望歲壽逐日添，平安快樂食百年。
教師頌 作者：dang hōng-zing
老師職務誠費心，教學指導有耐心，
生活管教有愛心，行為輔導有疼心。
老師職務費心力，琴棋書畫攏齊捌， (捌bhāt)
教育子弟有方法，愛心疼心是祕訣。
老師學識上飽學，天文地理逐項讀，
栽培子弟搰力沃，書香社會鬥推搡。
傳授知識誠神聖，春風化雨真本領，
創造社會新文明，老師四界受尊敬。
蓮花世界 作者：dang
hōng-zing
【調取花宮怨】
拆合時分來起床，拍開歡喜心內門，
來到六甲蓮花園，蓮花賞盡日頭長。
蓮花品種百百款，紫玉觀音在汝選，
花欉露水隨風轉，愛蓮的人心意滿。
大賀蓮花上蓋讚，紫玉蓮花誠稀罕，
芳水蓮花插花矸，觀音蓮花在人間。
大千世界蓮花情，無限乾坤送光明，
一片淨土在眼前，愛花賞花淨心靈。
送 西 瓜 dang hōng-zing
即碼少年誠趣味，贈送西瓜表心意
各種瓜仔有意義，實在心適無地比
紅紅的西瓜表示─愛汝一萬年
黃黃的小玉表示─純純的友誼
圓圓哈密瓜表示─哈甲強卜死
長長的苦瓜表示─苦戀的滋味
無子的西瓜講是─對汝無合意
細條刺瓜仔講是─失戀的標記
擱落來蕃薯講是─袂當愛著汝
紲落來金瓜表示─啥人佮我比
上尾後胡瓜著是─胡言兼亂語
西瓜傳情甜蜜蜜，逐家傸甲真歡喜
生活那像一首詩，本土文化對遮起
蕃薯厝5號 董 峰 政
蕃薯厝5號
郵差送批的番號
伊是阮老父做長工
流汗錢疊起來的厝
一間有伸手仔的
台灣厝
細漢一家伙仔趶的岫 (趶u) (岫siü)
透風落雨會當覕的大欉樹 (宓bhīh)
蕃薯厝
埔羌頭內底的小庄頭
許縣溪流過的小田庄
是我出世的家園
囡仔時代的記憶攏佇遐
溪仔底拍蓬泅 (蓬泅pong-siŭ)
蓖麻園掠蟋蟀
埕斗拍干櫟 (干櫟gān-lok)
埕尾拈田蠳 (拈liam)
嘛有搖檨仔、挽龍眼仔的
笑聲
大漢的時
佇外口徛起趁食 (徛kiā/kia)
蕃薯厝的故鄉
不時出現佇夢中
伊是古早的番社
番仔寮、番仔田
佇伊的隔壁
是故鄉嘛是原鄉
蕃薯厝5號
是我做一條蕃薯仔
永遠的住址
永遠的番號
蕃薯厝：
亦寫作「番薯厝」。佇「西勢」東邊的庄頭，早前叫做「番租厝」。永康鄉志─第三章聚落記載：「蕃薯厝」佇西勢東爿，是廣儲西里近中心點，庄名原叫做「番租厝」，係漢人向口埤一帶平埔族人租田耕種租戶的厝，後來才轉音叫「蕃薯厝」，佮一般所講的蕃薯無關係。
即個庄社大約有三、四百戶，庄民主要是林、董兩姓：庄頭的廟宇是「廣興宮」，服祀「謝府元帥」，俗稱「元帥廟」，創建雍正十三年(一七三五)，廟前有一條溪水叫「許縣溪」，佇同治三年(一八六四)佮光緒十二年(一八八六)淹二遍大水，遭受著嚴重的破壞，所以陸續重建。現此時的元帥廟是一九八○年所建，廟埕曠闊，有二欉大欉榕，對廟前看去有山有水，風景優美。
元帥廟早前有六角頭，其中「英仔甲」佮「後庄」已經廢庄，目前所轄是「蕃薯厝」、「西勢」、「新庄仔」、「崙仔頂」等四庄。每年農曆正月廿日「元帥爺生」，廟內各庄頭攏有「分餅」的風俗。
「分餅」風俗的傳說是：一百外冬前，庄民為著祈求生「查甫囡仔」，聚集佇廟內向謝府元帥下願，若會當「一舉得男」，著佇千秋聖誕時搬戲答謝神明，並且「擔餅」分送庄民。所分的餅叫做「水果餅」，簡稱「水餅」，佇逐冬的正月廿日中午以後開始社內家家戶戶分送，分登記有案的「福份餅」佮滿六十歲的「老大餅」兩種，即個風俗一直延續到現在，成做一個特色。
永遠的在地人
作者：dang hōng-zing
我出世佇蕃薯厝
後來遷徙到大灣
所以
佇大灣的時，我講我是蕃薯厝人
佇永康的時，我講我是大灣人
去台南的時，我講我是永康人
去台北的時，我講我是台南人。
到中國的時，我講我是台灣人
到美國的時，我嘛講我是台灣人
中國、美國對我來講攏是外國
我並無機會講我是中國人
我毋敢冒充做中國人
我嘛無想卜做中國人
我認同个是家己的土地─台灣
我是永遠的在地人
【附】
2000.10.19立法委員黃義交質詢有關「啥物(乜)人」，陸委會主委蔡英文公開答覆三個無仝層次的認知：第一是若以文化、歷史、血統的角度解說中國，按安爾伊是「中國人」；第二對政治角度來看，「中國」容易被理解做「中華人民共和國」，按安爾伊是「中華民國人」；第三對土地認同來看，我佇遮出世，佇遮大漢，佇遮讀冊、食頭路，按爾毋是台灣人，是卜叫做啥乜人？」
撽到美國的迄通電話 dang hōng-zing
正月的迄一工
佇阮的冊房
看著手記簿仔寫的事項
雖然已經過了幾外冬
心情猶原袂輕鬆
親像霜雪咧落降
炎熱礁燥的八月天
佇學堂參睏神坐仝邊
予一張紙條仔扑醒
對故鄉來的因單
神魂一時飛四散
台灣傷心的哭聲
講出老父意外的事件
晴天霹靂
這敢是事實的代誌
一時毋知怎治理
等到回神的時
目屎泗湳垂
美國、台灣兩分離
偌久才會當回鄉里
拜託悲傷予阮囥一邊
一心想卜飛過天
親像走馬燈
機場轉無停
對聖路易到丹佛
對丹佛到西雅圖
猶原飛袂出米國的國土
揮別舊金山衝到東京
行出桃園機場的大廳
看著故鄉才心頭定
到厝趕緊跪落地
大聲吼出叫老父
請赦免不孝的子弟
天公伯仔那會心肝赫爾硬
撽到美國的迄通電話
煞予我對天跋落地
時間雖然一冬一冬過
到今我猶原數念阮老父
(註：1988年佇美國密蘇里州進修期間，聽著老父的車厄意外，透早開車到聖路易機場，前後坐了三工兩暝的飛機，才到台灣的心情。)
牽手情
手一牽一世人，織一張有情夢 (lăng-bhāng)
雙人鬥陣行，永遠無驚惶 (giăn-hiăn)
兩人手牽手，天長擱地久 (ciù-giù)
有汝疼惜的日子，生活上蓋嫷 (zì-sùi)
有汝雜唸的日子，事事嘛如意 (zì-i)
結合是天意，鬥陣是福氣 (i-ki)
無論風佮雨，有偌爾粗 (hō-cō)
此後牽手的道路，猶原擱遠遠遠
汝我相愛的時間，嘛是擱長長長 (h¤g-dňg)
兩人牽手繼續行，行出代代翁某名 (giăn-bhiăn)
牽手路
一世人作伙行，食了鹹酸抑苦汫 (giăn-ziàn)
一句話，道真情
一句愛，說分明 (zĭng-bhĭng)
袂孤單，因為有汝作伴 (duan-pūan)
袂稀微，因為汝是靠岸 (hūan)
牽手的路，有跋倒的傷痕
牽手的路，有扶持的情份 (hŭn-hūn)
日出到黃昏，我會永遠感恩 (hun-un)
感恩的心，有汝相拱
歡喜的心，有汝同行 (gīng-hīng)
【附】
春愁 cūn ciŭ 清．丘逢甲
春愁難遣強看山， cūn
ciŭ•lān kiàn•giōng kàn san
往事驚心淚欲潸。 ong
sū•gīng sim•lui iok san
四百萬人同一哭， sù
bik bhan rĭn•dōng it kōk
去年今日割台灣。 kù
liăn•gīm rit•gat Tāi-ŭan
離台詩(其一) lī
dāi si 清．丘逢甲
宰相有權能割地， zain siöng•iu kŭan•līng gat
dë
孤臣無力可回天， gō
sĭn•bhū lik•kor hūe tian
扁舟去作鴟夷子， bian
ziu•kù zok Cī-ī-zù
迴首河山意黯然。 hūe
siù•hōr san•i•àm-riăn
下課矣 二技旅運系阿淑
老師上課誠認真，母語傳授下精神，害阮掃地趕緊緊，逐遍遲到無守信。
雖然台語真趣味，若是下課會準時，逐家一定笑微微，喝出台語我愛汝。
檳榔西施
檳榔西施真古錐，逐家看甲喙開開，毋管蠻牛威士比，恰輸西施兩粒奶。