☆台語散文
現代台語散文欣賞
秋天的運動埕
涼風微微仔吹來，秋天着綴咧來！
即時，日頭嘛毋敢傷奢揚，偷偷仔覕佇雲邊，看秋天的運動埕，鬧熱滾滾。秋風做教練，叫稻仔穿黃衫來跳舞，一下仔倚東，一下仔倚西；樹仔嘛咧做體操，窸窸窣窣真活骨；楓仔樹上熱情，搖甲滿面紅記記。菅芒花嘛搭白網仔，相爭卜來演出。菊仔花佇邊仔笑甲喙仔裂獅獅，擱有紅柿嘛毋認輸搶卜出頭。
歇睏一下，啉一喙仔茶，等一下擱招日頭作伙來參加秋天的運動會，逐家衝衝衝。
斑 脂 花
斑 脂 花，徛峘峘，恬恬仔，
徛佇南台灣的土地，
徛佇下港的街路。
微微仔笑，因為春風微微仔吹。
黃昏的雲彩，
愛佮伊比粉紅仔底，
害伊愈開愈濟！
毋驚風吹落塗(土)，
毋管人疼痛抑是怨嗟，
斑脂花滿樹枝，
逐工向天拽手，
用媠媠的花蕊，
共春天灌醉。
阿媽─糖(傳)仔的一生
西元1903年、日本明治36年、清朝光緒29年、癸卯年(gùi-bhau-nĭ)出世的阿媽已經老矣，嘛已經悿(tiàm)矣，想卜歇困矣，所以恬恬(diam-diām)來離開囝、孫、乾仔孫、乾仔乾孫。雖然是講，人(lăng)有生(sen)、亦有死；毋過，佇阿媽即欉大樹的樹影跤(ka)，阮做囝孫e感覺真有倚靠，厝裡有阿媽汝，阮享受著親情的溫暖，這是偌爾幸福的代誌。所以一時間聽著汝歸仙去，忽然間感覺生死之間，是迹爾仔無仝款，所以做囝孫的阮，一時間嘛無法度接受即種的事實。嗚呼哀哉！
阿媽汝出世佇今仔日叫做永康市(舊名叫埔羌頭)的永康里林氏家庭，出世四個月了後，過養予永康西勢里「蕃薯厝」姓汪的一對翁某，養父、養母並無任何其他的子女，所以全心養飼阿媽大漢。啥知命運創治人，養父(bē)汪神扶阿祖無細膩跋倒受傷，煞長期倒佇床中靜養，佇阿媽汝十歲小小的年紀煞來過身。毋過阿媽汝真堅強，擔起照顧身體欠安的養母「富仔」阿祖。為著卜擔起家庭的責任，從此阿媽汝所食過的鹹酸苦汫，會使講算袂清、講袂盡，佇小小的年紀著做過乞食、後來去府城做人的查gàn等，會使講「話若講透機，目屎著撥袂離」。嗚呼哀哉！
為著卜趕緊傳湠(tng-tùan-)後代，阿媽順從養母的主意，佇十六歲的時，著以「招翁」的方式，佮隔壁莊頭的散赤人董吟阿公來結婚。阿媽汝雖然是依招翁的方式，但是並無要求囝孫來姓「汪」，汝的度量比山卡峘、比海擱卡深，阿媽阮囝孫一定會學習汝即款的腹腸，來處事待人。
阿媽，咱的阿扁仔總統佇靈堂題「福壽全歸」四大字，阮想這是對汝上好的描寫，因為阿媽汝的陽壽總共一百○一歲，兒孫滿堂，內外孫加起來，總共有九十tong名。以內外孫來講，早著「五代親」。另外除了即成冬(ziān-dang)行動卡不便以外，汝佇過去一百冬來日常生活攏家己發落，包括洗身軀、洗衫褲、梳頭、食飯、掃地、洗碗、kāu藥草、行樓梯，家己攏料理甲足好勢。會使講目珠明、耳空利，講話扭掠，行路猛掠。雖然汝定定嫌家己講：「食老無路用」，擱講「食了米，坐歹椅、厚言語、有時感覺sā-bhi-sì」，其實阿媽汝傷顧謙矣，因為汝是咱董家的家寶，是講正宗台灣話的國寶。特別是，汝一世人無病無痛，這是上蒼的福報，阮囝孫的福氣，
阿媽汝雖然出身散赤，但是一生樂觀，勤儉拍拚，刻苦耐勞，身體健康，而且個性相當溫和，常常替別人設想。對神明信仰虔誠，時常行善佈施，阮做囝孫看佇眼內，時常依汝做模樣，所以突然間汝來離開阮，做囝孫的阮除了毋甘以外，一時煞失去了精神倚靠。嗚呼哀哉！
阿媽汝雖然無受任何學堂的教育，定定顧謙講是毋捌字的青暝牛，但是一百冬的生活經驗，予汝有足濟生活常識佮人生的智慧。常常對阮孫仔輩講一寡古早話佮趣味的代誌，攏是相當的有道理，擱足心適eo。佇汝在世的時，阮囝孫對汝日常所講的「四句聯仔」佮「食茶講好話」印象特別深，嘛特別懷念，人人呵咾汝爻講好聽話。比如：
大門開開開，錢銀規大堆。 (規gui)
茶杯圓圓圓，富貴萬萬年。
茶杯深深深，翁某會仝心。 (仝găng/gāng)
茶杯捧正正，會得眾人疼。 (眾zing/ziong)
茶杯捧懸懸，囝孫中狀元。 (懸/峘gŭan；囝giàn)
茶杯捧下下，趁錢無地下。 (下gē；下hē)
茶米啉落喉，逐家會出頭。 (啉lim)
茶米啉一喙，榮華兼富貴。 (喙cui)
阿媽汝放心，遮的「講好話」的撇步，阮攏有偷偷仔共暗念起來，不但佇台灣講，去到美國嘛咧講。
阿媽！汝雖然已經無佇咧咯，毋過，汝的形影、汝的聲音、汝日常生活的種種，攏猶原留佇阮的心中。阮做囝孫會親像汝活咧的時陣，互相照顧，互相牽成；汪「糖」阿媽汝的教示，阮會「傳tng」予囝囝孫孫，來安慰汝在天之靈。阿媽！汝有聽著乎(hōn)！請享用祭品！(2004.01.16)
【講義二】
台語文學創作心路歷程
講師：董峰政(dang hōng-zing)
一首詩一個心情 / 一首詩一個故事
一首詩一個記錄 / 一首詩一個感動
一首詩一個思想 / 一首詩一個世界
父母恩 作者：dang hōng-zing
十月懷胎囝兒生，心頭歡喜抱紅嬰。
阿母惜惜到三更，毋甘細囝半暝哼。
阿爸奔波到暗暝，為著厝內三頓鮮。
嬰仔笑聲心頭甜，一切辛苦囥一邊。
用心計較有所爭，望卜子女出頭天。
勞碌走傱生活纏，親情感人那詩篇。
父母恩情卡大天，序細有孝卡好錢。
向望歲壽逐日添，平安快樂食百年。
教師頌 作者：dang hōng-zing
老師職務誠費心，教學指導有耐心，
生活管教有愛心，行為輔導有疼心。
老師職務費心力，琴棋書畫攏齊捌， (捌bhāt)
教育子弟有方法，愛心疼心是祕訣。
老師學識上飽學，天文地理逐項讀，
栽培子弟搰力沃，書香社會鬥推搡。
傳授知識誠神聖，春風化雨真本領，
創造社會新文明，老師四界受尊敬。
蓮花世界 作者：dang
hōng-zing
【調取花宮怨】
拆合時分來起床，拍開歡喜心內門，
來到六甲蓮花園，蓮花賞盡日頭長。
蓮花品種百百款，紫玉觀音在汝選，
花欉露水隨風轉，愛蓮的人心意滿。
大賀蓮花上蓋讚，紫玉蓮花誠稀罕，
芳水蓮花插花矸，觀音蓮花在人間。
大千世界蓮花情，無限乾坤送光明，
一片淨土在眼前，愛花賞花淨心靈。
送 西 瓜 dang hōng-zing
即碼少年誠趣味，贈送西瓜表心意
各種瓜仔有意義，實在心適無地比
紅紅的西瓜表示─愛汝一萬年
黃黃的小玉表示─純純的友誼
圓圓哈密瓜表示─哈甲強卜死
長長的苦瓜表示─苦戀的滋味
無子的西瓜講是─對汝無合意
細條刺瓜仔講是─失戀的標記
擱落來蕃薯講是─袂當愛著汝
紲落來金瓜表示─啥人佮我比
上尾後胡瓜著是─胡言兼亂語
西瓜傳情甜蜜蜜，逐家傸甲真歡喜
生活那像一首詩，本土文化對遮起
蕃薯厝5號 董 峰 政
蕃薯厝5號
郵差送批的番號
伊是阮老父做長工
流汗錢疊起來的厝
一間有伸手仔的
台灣厝
細漢一家伙仔趶的岫 (趶u) (岫siü)
透風落雨會當覕的大欉樹 (宓bhīh)
蕃薯厝
埔羌頭內底的小庄頭
許縣溪流過的小田庄
是我出世的家園
囡仔時代的記憶攏佇遐
溪仔底拍蓬泅 (蓬泅pong-siŭ)
蓖麻園掠蟋蟀
埕斗拍干櫟 (干櫟gān-lok)
埕尾拈田蠳 (拈liam)
嘛有搖檨仔、挽龍眼仔的
笑聲
大漢的時
佇外口徛起趁食 (徛kiā/kia)
蕃薯厝的故鄉
不時出現佇夢中
伊是古早的番社
番仔寮、番仔田
佇伊的隔壁
是故鄉嘛是原鄉
蕃薯厝5號
是我做一條蕃薯仔
永遠的住址
永遠的番號
永遠的在地人
作者：dang hōng-zing
我出世佇蕃薯厝
後來遷徙到大灣
所以
佇大灣的時，我講我是蕃薯厝人
佇永康的時，我講我是大灣人
去台南的時，我講我是永康人
去台北的時，我講我是台南人。
到中國的時，我講我是台灣人
到美國的時，我嘛講我是台灣人
中國、美國對我來講攏是外國
我並無機會講我是中國人
我毋敢冒充做中國人
我嘛無想卜做中國人
我認同个是家己的土地─台灣
我是永遠的在地人
【附】
2000.10.19立法委員黃義交質詢有關「啥物(乜)人」，陸委會主委蔡英文公開答覆三個無仝層次的認知：第一是若以文化、歷史、血統的角度解說中國，按安爾伊是「中國人」；第二對政治角度來看，「中國」容易被理解做「中華人民共和國」，按安爾伊是「中華民國人」；第三對土地認同來看，我佇遮出世，佇遮大漢，佇遮讀冊、食頭路，按爾毋是台灣人，是卜叫做啥乜人？」
撽到美國的迄通電話 dang hōng-zing
正月的迄一工
佇阮的冊房
看著手記簿仔寫的事項
雖然已經過了幾外冬
心情猶原袂輕鬆
親像霜雪咧落降
炎熱礁燥的八月天
佇學堂參睏神坐仝邊
予一張紙條仔扑醒
對故鄉來的因單
神魂一時飛四散
台灣傷心的哭聲
講出老父意外的事件
晴天霹靂
這敢是事實的代誌
一時毋知怎治理
等到回神的時
目屎泗湳垂
美國、台灣兩分離
偌久才會當回鄉里
拜託悲傷予阮囥一邊
一心想卜飛過天
親像走馬燈
機場轉無停
對聖路易到丹佛
對丹佛到西雅圖
猶原飛袂出米國的國土
揮別舊金山衝到東京
行出桃園機場的大廳
看著故鄉才心頭定
到厝趕緊跪落地
大聲吼出叫老父
請赦免不孝的子弟
天公伯仔那會心肝赫爾硬
撽到美國的迄通電話
煞予我對天跋落地
時間雖然一冬一冬過
到今我猶原數念阮老父
(註：1988年佇美國密蘇里州進修期間，聽著老父的車厄意外，透早開車到聖路易機場，前後坐了三工兩暝的飛機，才到台灣的心情。)
牽手情
手一牽一世人，織一張有情夢 (lăng-bhāng)
雙人鬥陣行，永遠無驚惶 (giăn-hiăn)
兩人手牽手，天長擱地久 (ciù-giù)
有汝疼惜的日子，生活上蓋嫷 (zì-sùi)
有汝雜唸的日子，事事嘛如意 (zì-i)
結合是天意，鬥陣是福氣 (i-ki)
無論風佮雨，有偌爾粗 (hō-cō)
此後牽手的道路，猶原擱遠遠遠
汝我相愛的時間，嘛是擱長長長 (h¤g-dňg)
兩人牽手繼續行，行出代代翁某名 (giăn-bhiăn)
牽手路
一世人作伙行，食了鹹酸抑苦汫 (giăn-ziàn)
一句話，道真情
一句愛，說分明 (zĭng-bhĭng)
袂孤單，因為有汝作伴 (duan-pūan)
袂稀微，因為汝是靠岸 (hūan)
牽手的路，有跋倒的傷痕
牽手的路，有扶持的情份 (hŭn-hūn)
日出到黃昏，我會永遠感恩 (hun-un)
感恩的心，有汝相拱
歡喜的心，有汝同行 (gīng-hīng)
【附】
下課矣 二技旅運系阿淑
老師上課誠認真，母語傳授下精神，害阮掃地趕緊緊，逐遍遲到無守信。
雖然台語真趣味，若是下課會準時，逐家一定笑微微，喝出台語我愛汝。
檳榔西施
檳榔西施真古錐，逐家看甲喙開開，毋管蠻牛威士比，恰輸西施兩粒奶。
台灣交響詩─為「228手護台灣」而寫
牽著台灣的手/留傘調 dang hong-zing
台灣鄉親好兄姐，新年元旦賀恭喜，愛鄉愛台舉頭旗，台灣發展正當時。
台灣正名扶乎起，新春氣象扑地基，仝心作伙拚選舉，台灣總統全靠汝。
手護台灣有情義，一邊一國好時機，百萬鄉親行出去，台灣前途出頭天。
和平公投上合理，維護尊嚴有骨氣，人人決心做家己，台灣主權受保庇。
猴年行台灣路/狀元樓
甲申靈猴來報到，鴻圖大展有一套，人人平安無煩惱，台灣台灣蓬萊島。
獼猴珍貴是國寶，可愛古錐受呵咾，人人稱讚第一好，台灣台灣阿不倒。
百姓覺醒保山河，行台灣路上可靠，猴年國運日日高，台灣台灣受確保。
喝出台灣新國號，行出中國的監牢，猴年開花會結果，台灣台灣是老母。
台灣毋認唐山/南光調
台灣本是南島族，滿山遍野梅花鹿，茶米果子滿山谷，生活簡單真幸福。
中國中國花漉漉，獨裁壓霸手段毒，踐踏人權真殘酷，百姓日子袂快樂。
唐山原鄉真齷齪，生活艱苦受束縛，面對風湧有自覺，飄浪天邊佮海角。
蓬萊有情來寄託，寶島有義好開拓，釘根生澶新民族，皇天保庇台灣國。
台灣新世紀/花宮苑
台灣歷史講透機，心酸目屎撥袂離。外來政權翱翱纏，毋知家己是啥物。
熟番生番講家己，唐山平埔仝樹枝，客家福佬是同年，命運無分我佮汝。
毋管芋仔佮蕃薯，落塗生澶是兄弟，共同扑拚才合理，打造台灣好地基。
台灣迎接新世紀，告別悲情的日子，抱著希望心歡喜，共同開創好時機。
台灣大舞台/桃花過渡
台灣國際的舞台，戰略地位屬王牌，科技產品銷世界，地理利便無阻礙。
台灣四邊全是海，海洋國家有氣派，文化表現多色彩，族群融合新時代。
台灣經濟通人知，勤儉一代過一代，民主花蕊親手栽，自由結子排規排。
台灣真是好所在，氣候溫和人人愛，歡迎朋友作伙來，祝福逐家大發財。
台灣我愛汝/茶花女
台灣台灣我愛汝，四界聽人唸歌詩，人人佇遮真福氣，天天鼻著自由味。
台灣台灣我愛汝，四界充滿人情味，人人佇遮真歡喜，天天過著好日子。
好言好語【四句聯仔】 董峰政 08/03/2003
【健康】(調取狀元樓)
好言好語社會興， hor ghiăn•hor ghù•sia hue hing
壽比南山嫷光景， siu bì•lām san•sui gōng gìng
福如東海好心情， hok rŭ•dōng hài•hor sīm zĭng
歡歡喜喜過一生， hūan
hūan hi hì•gùe it sing
【職務】(調取南光調)
步步高昇靠扑拚， bo bō•gōr sing•kòr pà(h) bian
鴻圖大展向前行， hōng dŏ•dai diàn•hiòng ziān giăn
獨佔鰲頭好名聲， dok ziam•ngō tău•hor miā sian
年年有餘穩當贏， nī nĭ•iu ŭ•un dàng iăn
【家庭】(調取留傘調)
愛河永浴好姻緣， ài hŏr•ing iok•hor īn iăn
麒麟送子個個賢， gī lĭn•sàng zù•gōr gŏr•hiăn
圓滿豐足有體面， ūan bhùan•hōng ziōk•u te bhiān
平安如意慶新年， bīng an•rū i•kìng sīn liăn
(註：為台南郵局佇台南國立社教館所舉辦「好言好語」的郵展而寫)