押韻在台語詩創作的運用
講師：dang hōng-zing(董峰政)
國立高雄餐旅學院圖書館創館主任/世界台灣語通用協會顧問
e-mail：dang1109@yahoo.com.tw
網站：www.dang.idv.tw
一首詩一個記錄 / 一首詩一個故事
一首詩一個心情 / 一首詩一個感動
一首詩一個思想 / 一首詩一個反省
一首詩一個人生 / 一首詩一個世界
1992年諾貝爾文學獎得主詩人德瑞克．沃克特(derek．Walcott)：「詩作佮歌曲離愈遠，作品的價值著失去愈濟。」(2002.09.29台北發表)
2000年得著諾貝爾文學獎得主旅法華人高行健先生公開表示：「文辭之美，不如聲音之美」。(2001寫作之路)
2003年國立藝術大學前校長馬水龍先生，佇發表會對媒體表示「語言是一切音樂的根本，語言造就音樂，語言本身着有節奏佮旋律」。(2003.10.22)
日常生活中，有押韻的詞句，因為重複韻律有音樂的效果，當然dorh好唸擱好記。押韻有三種方式：
(一)頭韻：一個死，一個頂。隨人討掠，隨人落鼎。
(二)腰韻：有唐山公，無唐山媽。有準無，無準有。
(三)腳韻：嘴唸經，手摸奶。有是苦，無是惱。
【七字仔詩舉例】
蓮花世界 作者：dang
hōng-zing
【調取花宮怨】
拆合時分來起床，拍開歡喜心內門，
來到六甲蓮花園，蓮花賞盡日頭長。
蓮花品種百百款，紫玉觀音在汝選，
花欉露水隨風轉，愛蓮的人心意滿。
大賀蓮花上蓋讚，紫玉蓮花誠稀罕，
芳水蓮花插花矸，觀音蓮花在人間。
大千世界蓮花情，無限乾坤送光明，
一片淨土在眼前，愛花賞花淨心靈。
父母恩 作者：dang hōng-zing
十月懷胎囝兒生，心頭歡喜抱紅嬰。
阿母惜惜到三更，毋甘細囝半暝哼。
阿爸奔波到暗暝，為著厝內三頓鮮。
嬰仔笑聲心頭甜，一切辛苦囥一邊。
用心計較有所爭，望卜子女出頭天。
勞碌走傱生活纏，親情感人那詩篇。
父母恩情卡大天，序細有孝卡好錢。
向望歲壽逐日添，平安快樂食百年。
教師頌 作者：dang hōng-zing
老師職務全苦心，生活管教用愛心，
教學指導有耐心，行為輔導有疼心。
老師職務費心力，琴棋書畫攏齊捌， (捌bhāt)
教育子弟有方法，愛心疼心是祕訣。
老師學識上飽學，天文地理逐項讀，
栽培子弟搰力沃，書香社會鬥推搡。
傳授知識誠神聖，春風化雨真本領，
創造社會新文明，老師四界受尊敬。
好言好語【四句聯仔】作者：dang hōng-zing
【健康】(調取狀元樓)
好言好語社會興， hor ghiăn•hor ghù•sia hue hing
壽比南山嫷光景， siu bì•lām san•sui gōng gìng
福如東海好心情， hok rŭ•dōng hài•hor sīm zĭng
歡歡喜喜過一生， hūan
hūan hi hì•gùe it sing
【職務】(調取南光調)
步步高昇靠扑拚， bo bō•gōr sing•kòr pà(h) bian
鴻圖大展向前行， hōng dŏ•dai diàn•hiòng ziān giăn
獨佔鰲頭好名聲， dok ziam•ngō tău•hor miā sian
年年有餘穩當贏， nī nĭ•iu ŭ•un dàng iăn
【家庭】(調取留傘調)
愛河永浴好姻緣， ài hŏr•ing iok•hor īn iăn
麒麟送子個個賢， gī lĭn•sàng zù•gōr gŏr•hiăn
圓滿豐足有體面， ūan bhùan•hōng ziōk•u te bhiān
平安如意種福田， bīng an•rū i•zìng hok diăn
(註：為台南郵局佇台南國立社教館所舉辦「好言好語」的郵展而寫)
台灣交響詩─為「228手護台灣」而寫
dang
hong-zing
牽著台灣的手/留傘調
台灣鄉親好兄姐，猴年元旦賀恭喜，愛鄉愛台舉頭旗，台灣發展正當時。
台灣正名扶乎起，新春氣象扑地基，仝心作伙拚選舉，台灣總統全靠汝。
手護台灣有情義，一邊一國好時機，百萬鄉親行出去，台灣前途出頭天。
和平公投上合理，維護尊嚴有骨氣，人人決心做家己，台灣主權受保庇。
猴年行台灣路/狀元樓
甲申靈猴來報到，鴻圖大展有一套，人人平安無煩惱，台灣台灣蓬萊島。
獼猴珍貴是國寶，可愛古錐受呵咾，人人稱讚第一好，台灣台灣阿不倒。
百姓覺醒保山河，行台灣路上可靠，猴年國運日日高，台灣台灣受確保。
喝出台灣新國號，行出中國的監牢，猴年開花會結果，台灣台灣是老母。
台灣思想起/南光調
台灣本是南島族，滿山遍野梅花鹿，茶米果子滿山谷，生活簡單真幸福。
中國中國花漉漉，獨裁壓霸手段毒，踐踏人權真殘酷，百姓日子袂快樂。
唐山原鄉真齷齪，生活艱苦受束縛，面對風湧有自覺，飄浪天邊佮海角。
蓬萊有情來寄託，寶島有義好開拓，釘根生澶新民族，皇天保庇台灣國。
台灣新世紀/花宮苑
台灣歷史講透機，心酸目屎撥袂離。外來政權翱翱纏，毋知家己是啥物。
熟番生番講家己，唐山平埔仝樹枝，客家福佬是同年，命運無分我佮汝。
毋管芋仔佮蕃薯，落塗生澶是兄弟，共同扑拚才合理，打造台灣好地基。
台灣迎接新世紀，告別悲情的日子，抱著希望心歡喜，共同開創好時機。
台灣大舞台/桃花過度
台灣國際的舞台，戰略地位屬王牌，科技產品銷世界，地理利便無阻礙。
台灣四邊全是海，海洋國家有氣派，文化表現多色彩，族群融合新時代。
台灣經濟通人知，勤儉一代過一代，民主花蕊親手栽，自由結子排規排。
台灣真是好所在，氣候溫和人人愛，歡迎朋友作伙來，祝福逐家大發財。
台灣我愛汝/桃花女/留傘調
台灣寶島我愛汝，四界生活上四序，人人佇遮真著時，天天食著好料理。
台灣寶島我愛汝，四界表現有情義，人人佇遮真如意，天天看著花開期。
台灣寶島我愛汝，四界聽人唸歌詩，人人佇遮真福氣，天天鼻著自由味。
台灣寶島我愛汝，四界充滿人情味，人人佇遮真歡喜，天天過著好日子。
人人健康【狀元樓】【江湖調】
健康身體人人愛，身命無顧真正害，
為著將來趁早改，幸福秘訣有明牌。
【註】愛(ai)。害(hāi)。改(gài)。牌(băi)。
衛生第一通人知，無顧衛生誠悲哀，
害人害己淒慘代，養成習慣才應該。
【註】知(zai)。哀(ai)。代(dāi)。該(gai)。
飲食正常上實在，睏眠飽足有光彩，
運動爬山好體態，情緒穩定人和諧。
【註】在(zāi)。彩(cài)。態(tai)。諧(hăi)。
人生在世無後擺，道理了解囥心內，
生活正常早安排，平安幸福自然來。
【註】擺(bàin)。內(lāi)。排(băi)。來(lăi)。
【七字仔詩舉例】
跋繳的運動埕
dang-hōng-zing
爽股票佇台灣誠時行
(giăn)
一日常常千外億咧輸贏 (iăn)
股票市場那像跋繳的運動埕
(diăn)
買入賣出闖來闖去無時定
(diān)
行情逐日起落心驚惶
(hiăn)
緊張甲強卜無性命
(bhiān)
講奚是食人的大本營
(iăn)
台灣的股票出名通京城
(siăn)
厝邊隔壁好親情
(ziăn)
穡頭卜做無心情
(ziăn)
明牌世界咧探聽
(tiān )
股票名喙無靈聖
(sian )
嘐韶話講規厝埕
(diăn)
結局攏無影
(iàn)
輸甲叫阿娘
(liăn )
無采工咧扑拚
(bian )
一寡官員歪哥心不正
(zian )
烏金勾結夭壽囝
(giàn)
內線交易一件過一件
(giān)
家己恬恬賣甲規山坪
(piăn )
選舉的時買票大車拚
(bian )
崩盤的時陣才大細聲
(sian)
叫咱逐家毋免驚
(gian)
銀行借錢擱輸贏
(iăn)
汝看
迄款跋繳的運動埕
(diăn )
敢通擱去遐踅踅行
(giăn )
敲到美國的迄通電話 dang hōng-zing
正月的迄一工
佇阮的冊房
看著手記簿仔寫的事項
雖然已經過了幾外冬
心情猶原袂輕鬆
親像霜雪咧落降
炎熱dā燥的八月天
佇學堂參睏神坐仝邊
予一張紙條仔扑醒
對故鄉來的因單
神魂一時飛四散
台灣傷心的哭聲
講出老父意外的事件
晴天霹靂
這敢是事實的代誌
一時毋知怎治理
等到回神的時
目屎四lām垂
美國、台灣兩分離
偌久才會當回鄉里
拜託悲傷予阮囥一邊
一心想卜飛過天
親像走馬燈
機場轉無停
對聖路易到丹佛
對丹佛到西雅圖
猶原飛袂出米國的國土
揮別舊金山衝到東京
行出桃園機場的大廳
看著故鄉才心頭定
到厝趕緊跪落地
大聲吼出叫老父
請赦免不孝的子弟
天公伯仔那會心肝赫爾硬
敲到美國的迄通電話
煞予我對天跋落地
時間雖然一冬一冬過
到今我猶原數念阮老父
(註：1988年佇美國密蘇里州進修期間，聽著老父的車厄意外，透早開車到聖路易機場，前後坐了三工兩暝的飛機，才到台灣的心情。)
牽手情
手一牽一世人，織一領有情夢 (lăng-bhāng)
雙人鬥陣行，永遠無驚惶 (giăn-hiăn)
兩人手牽手，天長擱地久 (ciù-giù)
有汝疼惜的日子，生活上蓋嫷 (zì-sùi)
有汝雜唸的日子，事事嘛如意 (zì-i)
結合是天意，鬥陣是福氣 (i-ki)
無論風佮雨，有偌爾粗 (hō-cō)
此後牽手的道路，猶原擱遠遠遠
汝我相愛的時間，嘛是擱長長長 (h¤g-dňg)
兩人牽手繼續行，行出代代翁某名 (giăn-bhiăn)
牽手路
一世人作伙行，食了鹹酸抑苦汫 (giăn-ziàn)
一句話，道真情
一句愛，說分明 (zĭng-bhĭng)
袂孤單，因為有汝作伴 (duan-pūan)
袂稀微，因為汝是靠岸 (hūan)
牽手的路，有跋倒的傷痕
牽手的路，有扶持的情份 (hŭn-hūn)
日出到黃昏，我會永遠感恩 (hun-un)
感恩的心，有汝相拱
歡喜的心，有汝同行 (gīng-hīng)
送 西 瓜 dang hōng-zing
即碼少年誠趣味，贈送西瓜表心意
各種瓜仔有意義，實在心適無地比
紅紅的西瓜表示─愛汝一萬年
古錐小玉仔表示─純純的友誼
圓圓哈密瓜著是─哈甲強卜死
長長的苦瓜著是─苦戀的滋味
無子的西瓜講是─對汝無合意
細條刺瓜仔講是─失戀的標記
青青的冬瓜代表─糖甘擱蜜甜
黃黃的金瓜表示─啥人佮我比
西瓜傳情甜蜜蜜，逐家sng甲真歡喜
生活那像一首詩，本土文化對zia起
永遠的在地人
dang hōng-zing
我出世佇蕃薯厝
後來遷徙到大灣 所以
佇大灣的時，我講我是蕃薯厝人
佇永康的時，我講我是大灣人
到台南的時，我講我是永康人
到台北的時，我講我是台南人。
去中國的時，我講我是台灣人
去美國的時，我嘛講我是台灣人
中國、美國對我來講攏是外國
我並無機會講我是中國人
我毋敢冒充做中國人
我嘛無想卜做中國人
我認同ĕ是家己的土地─台灣
我是永遠的在地人
【附】
2000.10.19立法委員黃義交質詢有關「啥物(乜)人」，陸委會主委蔡英文公開答覆三個無仝層次的認知：第一是若以文化、歷史、血統的角度解說中國，按安爾伊是「中國人」；第二對政治角度來看，「中國」容易被理解做「中華人民共和國」，按安爾伊是「中華民國人」；第三對土地認同來看，我佇遮出世，佇遮大漢，佇遮讀冊、食頭路，按爾毋是台灣人，是卜叫做啥乜人？」
【附件一】
(台文) 談台語的語言個性─押韻
dang hōng-zing
2004.06.10發表佇中華日報─台南觀點
每一種語言攏有伊的個性，這dorh是為啥mih真濟(ze-)出外人，若聽著家己的母語ā是故鄉腔，感覺特別親切的原因。比如：華語講：「欲速則不達」、客語講：「緊事寬辦」、英語講：「more haste less speed」，台語dorh講：「食緊挵破碗」、「緊紡無好紗，緊嫁無好大(dā-)家」。gang一個概念，每一種語言有伊家己的講法佮思考，攏非常有意思。
真濟人感覺奇怪，為啥物過去台灣老一輩的人，多數攏是m-bhat字，有人滾笑講是「青暝牛」，m-gu若講著歷史故事，一支喙dorh講bhe
煞；唱起歌仔調、七字仔調dorh哼無停；厝內的阿媽、隔壁的阿婆仔話一講，規牛車的「俗語」dorh綴佇嘴後；特別是早期的「婆仔」講好話dorh像機關銃滴答叫，好聽擱攏bhe 跳針，記持好gah無dè講。俗語講得好：「毋(m)是新婦ghău，是zōr料夠」，因為台語有一個特色「押韻(又稱鬥句)」，所以唸起來不但順口好聽而且好記。下面dorh分別舉例說明：
(一)謎猜：「九橫一直，孔子公想三日(臆晶)」、「一坵田鬆鬆鬆，幾蕊花紅紅紅(臆香爐)」、「無腳會走，無嘴會吼(hàu)，無尻川會ciā畚斗 (臆海湧)」。
(二)俗語：「賣花講花紅，賣茶講茶芳」、「食糖算頓，食水久長」、「食gah流汗，做gah畏寒」、「嘴唸經，手摸奶」。
(三)盤喙錦：「和尚挵破鼓，提褲來補鼓，鼓破褲補，褲破布補，m知是布補褲，ā是褲補鼓。」
(四)喝場：「來來來，緊來緊看，慢來減看一半。樓頂報樓腳，阿母招阿爸。有人愛看弄鐃(lău)，嘛有人愛看拍拳頭…」。
(五)囡仔歌：「坐飛機看天頂，坐大船看海湧，坐火車看光景，坐公車錢kah省，坐牛車順sua挽龍眼。」
(六)褒歌：「千里路途無嫌遠，見面親像蜜攪糖，苦無時鐘行倒轉，好話未講天先光。」、「半暝月娘入紗窗，偏偏照我守空房，關窗將月緊緊送，送去隔壁照別人。」
(七)說唱：「(思想起)日頭出來(哩都)滿天紅，枋寮過去(哩都)是楓港(噯唷喂)，希望阿哥來tiàn-tang(噯唷喂)，(噯唷)疼痛小妹出外人(噯唷喂)。」
(八)好話：「茶甌圓圓圓，富貴萬萬年。」、「茶甌深深深，翁某會仝心。」、「甜茶甜甜甜，福氣dùe身邊。」、「燒酒līm落喉，囝孫會出頭。」
(九)歌謠：「身穿花紅長洋裝，風吹金髮思情郎，想郎船何往，音訊全無通，伊是行船誅風浪。放阮情難忘，心情無地講，想思寄著海邊風，海風無情笑阮戇。啊....，毋知初戀心茫茫。」─安平追想曲。
(十)創作：「手一牽一世人，織一領愛情夢。雙人dàu陣行，永遠無驚惶。有汝疼惜的日子，生活上蓋媠。結合是天意，鬥陣是福氣… 」─牽手情。
以上所舉的例，是毋是順口入耳擱趣味。佇日常生活中，有押韻的詞句，因為重複韻律有音樂的效果，當然dorh好唸好記。台語會dàng予人隨時朗朗上口，主要原因是伊有一種「押韻」的語言性格。汝講這是毋是一項真寶貴的語言文化資產。
(附：本文的「台語」是指在台灣廣為使用的福佬語(官方稱閩南語)，這個語言是台灣近百分之七十五人口的母語。)
【附件二】押韻技巧舉例
人人健康【狀元樓】【江湖調】
健康身體人人愛，身命無顧真正害，
為著將來趁早改，幸福秘訣有明牌。
【註】愛(ai)。害(hāi)。改(gài)。牌(băi)。
衛生第一通人知，無顧衛生誠悲哀，
害人害己淒慘代，養成習慣才應該。
【註】知(zai)。哀(ai)。代(dāi)。該(gai)。
飲食正常上實在，睏眠飽足有光彩，
運動爬山好體態，情緒穩定人和諧。
【註】在(zāi)。彩(cài)。態(tai)。諧(hăi)。
人生在世無後擺，道理了解囥心內，
生活正常早安排，平安幸福自然來。
【註】擺(bàin)。內(lāi)。排(băi)。來(lăi)。
【說明】
ai：ai悲哀；塵埃。aì和藹。ai意愛；曖昧
bai：bai僥俳。bài後擺；跤跛 。bai拜拜。băi徘徊；安排；王牌；竹棑仔；籐簰。bāi戰敗。
bhai：bhài景氣嫼 。bhăi收埋；目眉；門楣；陰霾。
cai：郵差；謎猜。。cài：精彩；採收；不理不睬；剪綵。。cai：菜尾。。căi：剪裁；方纔。。cāi：公媽隨人在。
dai：dai孝獃；鮕鮘**。dài歹甜；茶滓。dai帶念。dăi臺灣；轉檯。dāi大人；時代；怠慢；舵公；貸款，林黛玉。
gai：皆是；進階；應該。gài：悔改；解說；骱邊。gai：紹介；警戒；頭屆；芥茉；世界；鈣質；大概；上蓋大；訓誡。
ghai：ghăi：山崖；天涯。ghāi：阻礙。
hai：笑咍咍。hài：大海。hăi：孩兒；機械；詼諧；下骸。hāi：害死；亥時；彈劾dān-hāi。hain：哼。哼哼呻。hain：幌頭。
kai：開創。kài：凱旋；楷書。kai：慷慨；灌溉；大概。kàin：敳落去。
lai：lăi往來；王梨。lāi車內；利刀；荔枝。
mai：māi講看覓。
nai：撒奶sāi-nai。nài：少奶奶。nāi：忍耐；荔枝。
ngāi：艾草；礙虐。ghai：ngai-ghiorh」。
pai：pai豐沛；指派。 pàin：做歹 。pāin：揹冊包
sai：西爿；私奇；師公；犀牛；揌落；獅豹象；撒奶。sài：使性地；狗屎；駛馬。sai：大使；囝婿；比賽。sāi：熟似；服侍；同姒。
tai：tai投胎；舌苔；風颱；米篩。。tài：癩膏。。tai：淘汰；國泰；心態。。tăi：刣豬公。tāi：等待；狀態。
zai：zai：水災；通人知；樹栽；齋戒。zai：一再；好佳哉；載人。zăi：人才；木材；錢財。zāi：老神在在。zàin：尾指；十載寒窗。
【附件三】學員習作
下課矣
老師上課誠認真，母語傳授下精神，
害阮掃地趕緊緊，逐遍遲到無守信。
雖然台語真趣味，若是下課會準時，
逐家一定笑微微，喝出台語我愛汝。
檳榔西施
檳榔西施真古錐，逐家看甲嘴開開，
毋管蠻牛威士比，卡輸西施兩粒奶。