《訂稿》(本文無標聲調)
台灣文化的覺醒，對母語揣轉來
黃明德 04/20/2006 dang 05/01/2006
台灣逐工都有真濟人為伊的正名咧拍拚、走傱(zong)．怹所向望的就是國際上有一工，攏知影伊是一個有主權、有領土、有人民、有憲法的國家。遮個人民有怹(in)家己的文化佮語言，其中一種就是台語也就是福佬語。怹嘛會曉講另外一種叫做北京語的華語，這是早期外來政權為著欲統治台灣，制定了「乞食趕廟公」的語言政策，台語就按呢來拋荒去。
台灣對(ui)2000年政黨輪替了後，本土意識抬頭…，佇誠濟公開場合，台語已經被公開使用佮接受，最後才逼教育部佇不情不願之下，佇小學、國中實施所謂「鄉土語言教育」，來搶救遮個拋荒真久，強欲無去的母語，
台灣語〈包括原住民語、客語、台語〉是踮佇台灣認同台灣的人會曉講的語言，但是請問各位鄉親序大，咱平常時講甲足麗斗、足滑溜的台語，一時歡喜想欲共伊寫落來，字紙筆準備好欲寫、但是捎無總(zang)，往往煞毋知欲按怎落筆才好？擱有一項趣味的代誌，有一工國際上攏承認咱台灣是一個國家，毋知當你提著一份用台灣話所寫的文告，你敢有法度順序共伊讀出來？ 到時，你就知平常時啦啦叫的台灣話，只是嘴唇皮仔話爾爾，這就是咱透定咧講的「青瞑牛」啦。
2005年10月進前我佮逐家仝款，攏是台灣話的青瞑牛(文盲)，有一工我對(ui)加州長輩會會友所在得著一個消息，講台灣僑務委員會咧招94年海外台語教師研習班的會員，擱有費用的補助。我本來嘛想：台語講欲一甲子敢愛擱學？啥知，參加上課了後，才發現毋(m)是教阮講台灣話，是介紹台灣的文化佮歷史，上重要是教阮讀寫真正的台灣字，佮台語拼音法。上課12工十幾個教授逐工輪流共阮上課，怹的努力佮拍拚，攏是為著台灣這塊土地，誠使人感動。短短的12工相連紲的講習，雖然有卡悿(tiam)頭，但是親像洗三溫暖，事後規箍人爽快擱輕鬆。當然，臭彈講偌爻(ghau)是白賊，但是對台灣話已經有初步的認識。講師中有一位董峰政老師，伊將半世人的時間，攏提來研究咱的台灣語言文化，是專門咧培訓海內外台語老師的講師。規日無閒促促(cih)，另外擱佇南都電台主持一個「母語的田園」的節目，咧推廣台語文化。2006年我轉來美國，用三個外月的間，認真聽伊佇2002年一禮拜一遍、一遍一點鐘總共52集的台語節目。我深深予(ho)董老師為著推動台語文化付出的精神來感動。私下想講，我全家移民來美國嘛有二十外冬，對著台灣這塊我出世、大漢、讀冊、成人的家園，有一份無法度敨(tau)開的留戀佮感情，我即碼蹛(dua)佇國外，是毋是嘛來加入推搡(sak)台語文化的工作。𠮿然我是長輩會的成員，我著咧想遮個會友序大、前輩個個老經驗講台語麗斗擱嫷氣，但是欲來讀寫台語文，可能揣無幾個。所以我專工拜訪加州長輩會藍文華會長來參詳，是不是佇灣區會當來開一個「台語研習班」，予對台語有興趣欲進一步了解台語文化的鄉親，有共同討論研究的所在。因為會員的歲數真濟，攏已經做阿公、阿媽甚至是阿祖，想看覓(mai)，有一工厝內大細食飽閒閒，坐佇客廳用著故鄉的台灣話咧開講，你順紲共序細紹介一寡台灣話的䕷氣佮正統，引起怹對台灣話的趣味佮認識，予怹發自內心重視這粒蕃薯---台灣，感受著做台灣人的驕傲，這敢毋是一件足有意義的代誌？
我佇2006年正月長輩會會友懇親「食晝」的時陣，交予藍文華會長一篇「逐家相招鬥陣來，走揣咱的阿娘」的文章，內容要求佇灣區設立「台語研習班」的目的。這篇「台灣文化的覺醒，對(ui)母語揣轉來」的文章，算是再一次的請求。因為事後藍會長予我的答覆真使我失望。伊講：鄉親逐家年紀即爾大，敢著擱愛學台灣話，而且擱有交通問題，文教中心場地攏排滿，等等困難來阻擋。事實上我並無感覺這是問題，因為：
我擱強調一遍，這不是欲教逐家講台灣話，是欲教逐家來認識讀寫台灣話佮台語文字，我所知文教中心是台灣僑務委員會設立佇灣區的服務場所。每一年僑委會開即爾濟(這麼多)錢訓練一批一批海外台語教師，欲佇海外推搡台灣話，著是向望踮佇海外的台灣鄉親毋通予咱的母語拋荒去，所以文教中心會全力配合才是。現此時排袂出來，量早共伊登記，總有一工會輪著。若無，書法班是按怎排會著？台語研習班完全是一種服務的性質，這攏是為著台灣，自願指導的講師是義務性的，學員嘛是自由參加的，當然若有年紀較大行動不方便者，阮就卡失禮囉。擱來，我請藍會長會當做一個卡遠的思考，這個研習班，對踮在海外的台灣人是不是赫(hiah)爾重要？今仔日毋開，另日你厝內的囝孫，佇美國凡勢揣無所在通學台灣話，至少目前猶有一箍興勃勃(put)毋驚艱苦，食著好膽藥，欲來為台語文化拍拚義務來做講師，現此時毋開欲等待何時？恐驚失去機會，到時想欲開可能揣無老師指導，因為有啥人欲做戇工擱透定予人嫌？
其實我會想欲佇彎區㞹母語文化的頭旗是因為(1)董峰政老師為著咱母語食盡鹹酸苦汫的精神，深深感動著我，所以一時失志無算啥？(2)人咧講：拍鐵趁熱(riat)，一面燒鐵一面拚勢拍鐵，毋正拍會䕷，這就是俗語講「教學教學，一面教一面學」，利用教台灣話的機會，進一步自我提升母語的層次。
以上請求 謹致
僑務委員會 委員長 張 副委員長 鄭
huiyi@mail.ocac.gov.tw 陳彙怡 小姐 請轉
dang1109@yahoo.com.tw 董峰政 老師
diongbhu@yahoo.com.tw 張忠武 老師
美國加州長輩會
藍文華
會長 陳辰光 理事 謝鎮寬 先生 陳宜佑 女士
94年[2005年]海外台語教師研習班
班員 黃明德 Geoff
Huang
7133
bark ln San Jose CA 95129
Telphone 408-777-8928
E-Mail geoffhuang1@aol.com
04/20/2006 San Jose/ California/USA