林滿足／寧南電子報執行編輯 2006.08.12
各位評判先生，各位來賓，逐家好，我是○○號，今仔日欲演說的題目是「台灣是寶島」。
台灣是寶島，逐家攏會曉按呢講，dùa佇這塊島嶼的人，是毋是，逐家攏有這款的想法？知影伊是寶，擱知影伊寶佇叨？紲落擱會當瞭解伊、疼惜伊咧？zit mà我就利用這短短的幾分鐘，將我對伊的認捌寬寬(款款)仔說來。
台灣雖然只是，太平洋頂面的一塊島嶼，毋過美麗景緻滿四界，規年tàng天鳥語花香。隨時攏看會著，媠媠媠的花草，連外來的樹種嘛生gah豔葩葩，是一個多彩多姿的花花世界。
伊四邊攏是海，海岸有無仝款的景色，像三仙台、野柳、佳洛水，每一段的景色攏是大自然的藝術品。擱有懸gah欲拄天的玉山，有櫻花開gah滿滿是的阿里山，有太魯閣壯觀的峽谷地形，中央山脈貫全島，大粒山、細粒山予咱bè袂離。
無仝的地形，有無仝的生態環境。變化萬千。毋拘攏是青青翠翠，聽講地球上仝一個緯度的所在，全是焦涸涸的沙漠(bhǒ)，台灣真正是奇蹟。
台灣確實是寶島，稻米、果子一年四季逐項有。旗山芎蕉銷日本，玉井檨仔煮大餐，龍眼、荔枝四界生，瓜仔無子包你甜。麻豆特產是文旦，林邊連霧有夠讚。梨山梨仔滿山坪，後山釋迦上出名。山產、海產濟濟濟，俗擱鮮。詩人講得好「果子的甜，五穀的芳，予咱後代食袂空。」
好山水，好地理，好種作，好趁食，加上四通八達的交通網，佮溫暖的人情味，予dùa佇台灣的人，逐家攏平安快樂。猶(ia)擱有全世界上出名的電子科技，農耕、畜牧一流的技術，這攏是台灣經濟發展的本錢。台灣嘛是一個自由民主，追求社會福利的國家，佇國際上佮人有比並，這嘛是台灣人的驕傲。
台灣是多族群的移民社會，無仝的族群，無仝的語言，匯集形成大海洋的文化。這應該是咱上蓋寶貴的文化資產，互相尊重、包容、扶持、相牽成。多元社會，多元文化，充滿活力。
可惜zit mà為著族群、政治、生態破壞的問題，天災人禍一直咧發生，造成社會的混亂佮不安。真正愛台灣的人，敢忍心看伊按呢亂落去？真正愛台灣的人，知「食果子拜樹頭，食米飯敬田頭」。先認同台灣，毋那是瞭解、疼惜，猶擱有包容佮尊重。食台灣米、līm台灣水，血液流的攏是台灣心、台灣情。逐家著愛用真心來疼台灣！
我的演說講到遮，多謝各位﹗
《修稿》國中組
自細漢我就接受真好的教育，逐項都補。我的父母相信「三歲雕皮，五歲雕骨」的想法。īn向望我將來有出脫，做一個有成就、有路用的讀冊人。父母的用心，我一直記得心肝內，嘛鼓勵家己愛認真讀冊，毋通予父母失望。
zit-mà佇國中，有看著足濟同學，因為冊讀無路來，紲變歹去。其實īn本底攏是巧巧囡仔，只是毋愛讀冊，前途紲變烏有。我想講：īn若是去學其他的工夫，敢着無成就，無地位嗎？若有一工，我無好的成績，是毋是人生嘛愛變烏白e˚ ！我是愈想愈驚惶(hiăⁿ)。
前ㄧ站仔，歇睏日，看着一個電視節目，是咧訪問一位做雞卵糕的頭家，講起伊少年學做師仔工，嘛感覺家己無讀冊，無啥路用，毋知前途佇叨位？後來知影尊重家己的職業，下工夫學習、研究，今仔日，已經是企業家。生理是做甲ciang
ciang(沯沯)滾。講着經營管理甲專業上的代誌，條條有理。主持人嘛呵咾伊是狀元才。
這是一個真好的例，予我真濟啟示。咱已經是行到，變化快速、自由多元，充滿機會的二十一世紀。ｍ是古早「工字袂出頭，士佮土長短頭」的年代。人人會當自由發揮，只要揣着家己的興趣，好好屈落去拍拼，食苦若食補，毋驚挑戰，mài(勿)在職怨職，定定想欲換頭路(工課)，心頭掠予在，知影「徙岫雞母，生無卵」，堅持奮鬥，提升專業能力，一定會當行出一條光明的大路。
我想，用現代人的觀點來看，得着博士學位甚至提着諾貝爾獎，當然是光榮有面子的狀元才。但是佇運動場，佇各行各業有成就，仝款是會受人尊重的。所以，朱銘、王建民、李安、張惠妹、幾米、楊麗花，會曉煮食的阿基師，足ghāu搬布袋戲的李天祿，甚至電視冠軍內底遐的「達人」，抑是做雞卵糕的頭家，會使講，攏是狀元才啦。
zit-mà(這碼)我已經知影囉！佇這個多元的時代，咱若肯認真，肯拍拚去學習，是有法度做到360行，行行出狀元ē！千萬毋通因為冊讀無好，就來餒志，看輕家己。我嘛欲用這款的認知，來參同學、朋友共同勉勵，人人揣出家己的興趣，抱著信心行出光明的未來！
食甲ziah大漢，出去cit-tŏr攏是有父母陪伴。今年歇熱，我參加學校主辦的遊學團，第一擺，無佮厝裡的人作伙，家己出去旅遊，擱是到，遠落落的澳洲dùa三禮拜；會使講是我成長當中，上蓋無仝的經驗。今仔日回想彼段日子，猶原是足懷念的。
原本是無想欲去，毋過看著行程安排的項目，有赫濟我有興趣的活動，另外阮阿爸、阿母攏想欲予我去遐學習，料理家己，趕緊培養獨立自主的生活能力。我就決心共報名囉。
人講「食一歲，學一歲」，ùi款行李開始，就攏是學問。細漢，從來毋捌做過的代誌，這陣事事項項，攏家己來，才知苦。到底愛紮偌濟衫褲？嘛愛思考，配合當地季節、活動的需求，想甲「一粒頭，兩粒大」。毋過為著無袂予父母操心，證明我的能力，我嘛是「過五關，斬六將」，隨項共克服。
出發彼早仔，阿母足煩惱，顛倒我安慰阿母，免驚，我一定會照顧家己。這碼想起來，感覺就好笑，彼日，我的表現，那親像大人赫爾堅強，阿母煞那親像細漢的我哩！
澳洲的布理司本是一個大都市，建築物真有特色，遐有真濟「無尾熊」，是全球卡哇熊上大的保護區，所以伊有另外一個稱呼叫做「樹熊之都」。遐規年通天攏袂寒，日頭豔豔豔，我佇遐，逐日都(是)好天。阮七月去的時，聽講是當地上寒的季節，毋過日時溫度，也有20度左右，暝尾才感覺卡冷小可，大約佇11-2度腳兜，佮台灣寒人的時陣，差不多。
參觀無尾熊彼日，我有夠歡喜，in是赫爾仔溫馴，赫爾仔古錐，真想欲共抱轉來台灣飼，毋過我嘛知影，這是袂使的，為著共生、為著動物好，人無應該私心佔有，只好依依不捨，佮in講再會。到今，我嘛是真數念in。
阮dua的Nudgee國際學院，校區真大，比台南成大擱卡大真濟，花草青青青，樹仔懸懸懸，五色人，佇遐出出入入，熱鬧cì-cīh。除了上課，我嘛有機會佮當地學生交陪聯誼，感受無仝款的文化，生活方式，長(diòng)袂少知識，in的學生攏真開朗、好鬥陣。有一個名叫沙莉的查某ghin仔，佮我誠投機，到這碼阮利用e-mail咧聯絡感情，講東講西，真心適。我的英文嘛綴咧進步。這擺的旅遊，予我深深體會著，無仝的族群，有無仝的文化、思想、生活方式，真是大開眼界。
澳洲是真好耍的所在，後擺若有機會，我真想欲擱去，因為遐是我cit-tōr過，上懷念、上有記憶的所在。