許書銘／2006.08.19
各位評審老師，各位同學，逐家好。我是編號第○號，今仔日我所欲演講的題目是：『有才情不值得好品行』。
『噹噹噹噹…』下課的鐘仔聲『dăn(霆)』啊！學生無分大細漢，趕緊ga(共)將冊包仔收收款款咧，倒手teh便當ke(篋)仔，正手pain(揹)一個袋子，大卡細卡捾gah叮噹hain(幌)，三步做二步走，想欲緊zōng出學校的大門口。學校的大門口，人是爭(zin)gah滿滿是，逐家攏探頭探耳，愛注意喔！毋(m)是欲載對厝裡去，是欲cua去補習班繼續擱教示。
大人攏希望家己的囡仔會當聰明兼伶俐、才情擱有出脫，只要考試好、比別人卡厲害，萬項代誌攏嘛順伊，結果敢有卡好？阮班有一個同學叫阿俊，自細漢就學英文，英文講的無輸阿督(dok)仔，參加比賽常常嘛diorh(著)冠軍，提金牌，光榮倒轉來，阿俊的媽媽若講著伊，是笑gah嘴仔離sai sai。有一遍老師cua阮全班去爬山，佇咧轉來的時陣，因為塞車，老師愛阮kà(敲)電話共爸母報平安。看阿俊仔手機提咧大聲喝：『喂…母仔，老師講會卡慢到，你愛佇遐(hia)等我，袂當先走！我的冊包仔足重的！有聽著無！』聽伊一講煞，逐家烏仁拄白仁，我心裡咧想：『我若按呢ga(共)阮阿母講話，我的尻川一定會像麵龜腫gah歪歪歪』。老師真受氣，叫阿俊仔趕緊kà電話共老母會失禮，恁敢知影阿俊仔按怎應(in)？伊講：『喂…母仔，老師叫我愛kà電話予你，講我對你無禮貌…hòn…足麻煩的！』在座的各位，毋知影恁是毋是hām我有仝款的感覺：阿俊按呢對待伊的老母，為什麼īn(怹)阿母若講著伊，就會笑gah嘴仔離sai sai，是毋是真奇怪？
我的阿爸佮阿母雖然日時攏愛上班，毋過īn對我真關心，佇我細漢毋捌字的時陣，就會講故事予我聽、hām我作伙開講；我若下課轉來，īn上愛聽我講今仔日佇學校有啥物趣味的代誌。īn常常共我講，做人比讀冊擱卡重要，冊讀無好，極加是用雙手趁流汗錢，啊若袂曉做人，是一世人kiòr gak(抾确)。阿母捌共我講過：有一個清華大學的研究生，因為hām伊的好朋友愛著仝一個查甫囡仔，一時食醋想袂開，煞利用伊的化學專業知識，害死伊的好朋友，結果法官判伊愛關十八年。我想，伊的爸母一定足傷心，栽培查某囝讀gah赫爾懸(hiah ni gŭan)，遇著代誌袂曉轉踅(seh)，真是讀冊讀佇腳胛骿(kā zià pian)。
所以講『有才情不值著好品行』。
最近網路有一部真有名的影片，予我看了真感動。一個溜冰選手，佇世界比賽的時陣，無小心跋倒，摔一下真厲害，逐家攏想講伊可能會放棄，想袂到，伊共教練講：『會跋倒是我做無好，但是，這場比賽對我來講真重要，我一定愛堅持落去！』最後，這種勇敢堅持的精神，m na(毋但)予在場所有的觀眾，替伊鼓勵、加油，嘛予伊得著第二名的好成績！這件代誌予我的體會是：『擱卡厲害的人，遇著困難，若無法度忍耐、勇敢堅持落去，成功是無可能會來的！』
逐家攏講zit mà的囡仔出讀書，啥物都袂曉真軟ziàn。遇著小可失敗，就親像雞卵kian（掔）石頭仝款─碎糊糊。俗語講：『好田地毋值好子弟』，就是希望逐家會當敎囝堅強，嘛愛教囝善良。好品行有真濟種，會感恩、孝順和堅強，腳踏實地、有肚量、會分享。有好品行，人生的道路才行會久長，咱的社會嘛才會幸福快樂。
我的演講講到遮為止，多謝逐家。
許書銘／2006.08.19
各位評審，各位同學，逐家好。我是第○號。今仔日，我所欲演講的題目是『我上愛讀的一本冊』。
ùi(對)細漢到現在，無論是功課的需要，抑是家己的興趣，我所讀過的冊，其實袂少，其中我上愛讀的一本冊，就是『窮鬼翻身』，這是一本拄出版的冊，內容描寫一個人成功的故事，故事中的主角hām我是同鄉，你可能毋捌伊，毋過，伊賣的物件你一定聽過，凡勢嘛用過。『感冒用斯斯，斯斯分兩種；咱若香港腳就用〝足爽〞』，拍這支廣告的頭家就是這本冊的主角。
這本冊是阿爸借我的，讀這本冊予我目箍紅紅真感動，這本冊的主角猶(ia)未出世，就有一個算命共伊的父母講：「腹肚內的囡仔命傷(siun)硬，會剋父母」，想袂到īn老母，佇伊四、五個月大替伊洗身軀的時，無小心摔跋倒，煞來過身！發生這個意外，予人擱卡相信算命仙講的話—這個囡仔命中帶煞。因為按呢？伊細漢就無老爸疼惜，厝裡的人嘛攏gah遠遠遠，gā nā阿媽一個人咧走zŏng照顧伊，十歲彼冬，予老爸趕出去，dùa(蹛)佇墓仔埔附近的破草寮仔。
十四歲，他出外拍拚，身軀gā nā有50箍，含著目屎共阿媽講：「我這遍出去，只有兩條路，一條是成功，一條就是去溪仔邊cue(揣)。」離開故鄉佇外頭，無錢食飯，就啉古井水充飢，食別人cun(偆)落來的麻油雞湯來補身體。後來為著三頓，伊做過牽電線的囡仔工、噴漆行的師仔、做烏手等等二十外項的工課(kue)。這款的遭遇，予我想起阮阿爸的故事，阮阿爸細漢家境嘛無好，厝內兄弟姊妹擱一大堆，放學轉來就愛飼豬、燃燒水兼偝(ain)小妹。做兵進前，做過的穡頭一拖拉卡！比如：顧魚塭、牽豬哥、做土水、賣豬肉…，就若親像電視講的「話若講透機，目屎就bue袂離」！日子雖然歹(pain)過，毋過嘛是愛嘴齒根咬咧、目屎腹內吞，期待有一工過著好日子。好佳哉，「皇天不負苦心人」，阮阿爸zit mà嘛有淡薄仔成就。
這本冊裡面的頭家，細漢歹命無讀冊毋捌半字，逐工半暝仔若有新的想法就毋敢睏，驚睏去會袂記得(zito)，家己擱無本事寫落來，就一直想、一直想，想gah天光，才趕緊kà電話交代。你看，毋捌字是偌辛苦的代誌，zit mà咱有ziah(即)好的環境，更加愛好好仔讀冊，加學一項，就加一項本領。
「窮鬼翻身」這本冊，我一遍擱讀過一遍，每一遍讀了猶原目箍紅紅。一個予算命仙講：「會剋父母、歹命的乞食囡仔」，到落尾，靠家己的雙手拍天下，變成一個成功的企業家。印證這本冊所講的一句話：「天公伯既然予你一條性命，就一定會予你一條活路！」
我的演講到遮，多謝大家。
許書銘/2006.08.19
各位評審老師，各位同學，逐家好。我是編號第○號，今仔日我所欲演講的題目是：『將心比心，人人歡心』。
最近收著一張電子批，雖然內容短短啊，毋過真有意義。佇國外有一個叫做愛西的查某囡仔，佇伊四歲的時陣，有一遍看著電視新聞咧轉播非洲的囡仔因為無物件通食(tāng ziah)，有真濟人攏活活餓死倒佇路邊。伊共阿媽講：『我想欲將雞肉送予īn食！』阿媽講：『戇囡仔！非洲赫(hiah)遠，等雞肉送到遐(hia)，早就臭酸啊！』毋過，就因為有這種愛心，所以伊cām(參)阿媽開始幫助附近無飯通食的人。這個消息傳出去了後，īn兜變成救濟中心，聖誕節的前一工，伊送出一千外件的食物，連新聞記者嘛來採訪。第二年，伊的救濟品已經濟gah愛用七個人來扛，才有法度將食的物件，全部囥(kng)佇卡車內，分送到每一個需要救濟的所在。後來，看著風颱造成的傷害，伊擱兼送衫褲予別人穿。愛西今年已經十三歲啊，伊的基金會猶原繼續咧幫助別人。伊捌過一句話：『只要有心，毋管是散赤抑是好額，每一個人攏有改變世界的能力！』一個四歲的囡仔就會當將心比心，體會、感受別人的艱苦，而且擱用行動來援助別人，予這個世界擱卡圓滿，愛西這種奉獻的精神予我足感動。
其實，有真濟人佮愛西仝款，恬恬仔為這個世界付出。逐家應該還記得一二年前，南亞大地動，引起嚴重的海水倒灌，造成二十萬人的死亡。彼(hit)當陣，除了捐錢來援助以外，有真濟志工願意幫忙災民煮飯、起厝、看病等。有記者問īn為啥物欲來遮？有一個人是按呢講的：『性命是無常，毋知啥物時陣會拄著天災，今仔日我有能力幫助īn，凡勢，有一工我嘛需要īn鬥腳手，我gā nā(干單)盡淡薄仔力量耳耳…』這句話予我有真深的感想，咱人袂當(bhe
dàng)只想著家己，愛徛佇別人的立場去設想、去體諒，這就叫做「將心比心」。今仔日代誌換做是發生佇咱的身上，咱嘛希望有人共(ga)咱鬥相拱(siōr gīng)，共咱鬥相仝（sān gān）
就親像真身軀卡無方便的人，行佇路頂，時常有人用奇怪的眼光咧看待，甚至擱會佇尻川後指指拄拄(gi gi duh duh)、講東講西，實在是真不應該！設使講你就是彼個身軀無方便的人，你敢有法度忍受別人按呢的行為？假使講你若有兄弟姐妹佮伊仝款，你敢擱笑會出來？假使你是伊的爸母，看著別人按呢恥笑你的囡仔，你會有啥物感想咧？俗語講：『人的身體是父母生成』，我想無人會希望家己是身體無健全，抑是出世著散gah無物件通食的所在。既然人的出世是無法度選擇的，咱會當的就是「將心比心」，予艱苦的人，因為咱的體諒hām關心，展出笑容，勇敢去開創īn的未來。我想，這才是咱應該愛去做的代誌！
我捌看過一本冊，裡面有兩張圖，圖頂面所畫的人攏有一雙足長的箸，īn面頭前有一盤菜，叫做「地獄」的彼張圖，逐家相爭欲共菜塞(tat)入去家己的嘴空；但是毋管嘴開偌開，箸按怎挾(ngēh)，就是食袂著；叫做「天堂」的彼幅圖，每一個人共箸所夾的菜，夾予別人食，所以每一個人攏食gah真歡喜。人講：『快樂，毋是因為你有真濟物件，是因為你會共(ga)物件cām別人分享』天堂和地獄的差別，只是在一念之間，那是會當將心比心，願意付出和分享，我想每一個人攏會當生活佇天堂，過著快樂的日子！
我的演講到遮結束，多謝逐家！