二十一世紀是一個科技發達，自由多元的社會。人人攏有真大的生活空間，想欲學啥物，做啥物，若像全無阻礙。認為只要拍拚認真，就有機會通成功。尤其是佇台灣，多數人攏認為若有法度，提著名校的文憑，讀著熱門的科系， 踏著好時機，好關係，擱紲落去爭取權位，趁真濟錢，就是表示家己有學問、有本事囉。
事實上，敢是按爾就有學問矣？無，是按怎，擱有赫濟懸學歷，有頭有面的人，咧做一寡傷天害理的代誌。譬如2003年，理律法律事務所，彼個劉偉杰偷賣三十億股票的事件。聽講，會當佇這間事務所，做代誌，攏一定愛名校出身的高材生，全是上優秀的律師、會計師，怎樣擱會出現這款飼鳥鼠咬布袋的代誌？這款缷世缷眾的代誌，一發生，逐家才知，有才能的人，若是無道德品行，做人處世相仝會出問題的。
這個品德管理出問題的實際個案，予咱了解誠信佮道德的重要性。因為個人品德若有問題，伊擱偌有學問，嘛是有可能會做出僥倖失德的代誌。品德比能力、經驗、學歷擱卡重要，品德，是整個做事學問的基礎。原來有好學歷，無代表有好品德。人，愛時時刻刻反省，建立正確的人生觀與價值觀，實踐道德，才是真學問。
欲建立正確的人生觀佮價值觀，應該有啥物款的認知呢？我有下面三點的看法：
第一、佇這個事事講求功利的社會上，認為無錢是見笑代，其實，不學無德，才是真正的散赤人。一個人除了趁錢的技能知識、愛擱涵養是非分明，公正、對人有愛心、有禮貌、謙卑、這種種好品行。若是缺欠，才是真正的散赤。有智識、有學問，當然是重要！有好品德愈卡重要！
第二、追求功名利祿，是現代人的大目標、但是愛有這款觀念，無位非賤，無恥為賤！有權有勢，喝水會堅凍，是光榮的代誌。但是m 通，干那「目珠看粿，腳煞去踏著火」。其實，無官、無地位，並無重要，無恥才是下賤。有的人雖然地位懸，但是用無正當的手段賄選、買票才當選，因為按呢得著公職官位，嘛是予人看無目地。所以人格的貴賤，不是干礁看表面上的地位，是愛看伊捌m
捌廉恥、有道義，無？上驚是，才華比學問大，學問比道德大。
第三、有人講這陣是「天無照甲子，人無照天理」的年代，社會誠亂，重重疊疊的犯罪事件，已經m是用法治，有法度管e，人的生活應該有真濟行為準則愛有一把道德的尺，來約束家己。愛先加強道德學問這部分的教育。 道德觀念是ùi細漢就愛學起，是ùi生活裡面啟發，實踐的，更加需要社會各階層的人士，佇日常行為做出好模樣，袂使講一款，做一款，定定做出負面的示範，卡會當予品德教育形成效果。
咱真幸運出世佇這個民主自由的社會，若擱知影涵養出好品德，了解，無德就無恥，心有道德才是學問。絕對會當進一步，提升人佮人之間的和諧，充實生活價值、性命的意義。
有一工，我去菜市仔買麵，看著一個穿插優雅的阿婆，嘛拄仔好欲交關。「買一斤麵」真客氣的聲音。賣麵的阿桑，誠無閒的款，腳手真緊，就將麵秤好矣。「敢會使麻煩你分做二包，貯起來」。無想講，彼個阿桑，煞氣掣掣，大聲嚷：「m卡早講」。紲落去，m情m願，將麵擲過去予阿婆。逐家人客，攏掣一趒，看伊赫歹，阿婆嘛著一驚。細聲仔講：「你這個人kai即爾歹！即爾無禮貌！」賣麵的阿桑，m那無會失禮，愈罵愈紲拍：「半斤麵賣你十箍銀，愛講啥物禮貌。欲買m買，據在你啦！」這陣，阿婆已經越頭走矣，我嘛無想欲共買。
轉來厝，我咧想，親像彼款歹性地的人，敢會當做出，啥物好食的物件呢？隔幾個月，我就聽阿母咧講：彼間麵攤仔收起來矣！阿母假若誠同情in。「唉！其實彼個阿桑，心肝無歹，只是歹一支嘴。莫怪古早人講，『心歹無人知，嘴歹上厲害』做生理愛人人好，烏白使性地，人客卡加嘛走了了，那有生理通做？」
這確實是誠重要的修養。一個人若是kap袂著，就受氣，歹性地，一定不時會gah人相冤家。這咱佇社會新聞，定定看會著這種悲劇。佇學校，我嘛捌拄著這款歹性地的同學，為著三、二句話無合意聽，就大聲野喉，紲來拍歹感情，擱影響全班和諧的氣氛，確實真厭氣。
啊、若我拄著這款人，逐擺攏會笑笑仔共īn講：「巧人袂受氣，氣死是驗無傷哦！」受氣真正是一件足戇的代誌，ｍ那家己著傷，別人嘛看著袂歡喜，想看覓，一個人若定定氣怫怫，敢有人會倚來佮伊做朋友呢。？若是生理人，像彼個賣麵的阿桑，敢有人欲共伊交關，買物件呢？彼種歹性地的人，ｍ管扮演任何一個腳色，恐驚攏是佮人袂鬥陣ｅ。老先覺嘛有共咱提醒：「相打雞，頭無冠(gue)」不時歹衝衝，激面腔，人是會變bhài去哦。
聽講這碼的企業、尤其是服務業，若欲倩人，除了愛有專業能力以外，愛擱做一個測驗，試看EＱ好無，若是EＱ無夠，嘛無人欲倩。我想這是有道理的，一間公司，若因為一二個人，定定佇遐歹聲嗽，是有可能會影響全體員工，工作的效率。受氣雖然是小代誌，卻是會污染咱的生活空間，影響咱的人生。
可見每一個人攏有需要調理家己的歹性地，了解這是做人的基本修養。是踏入社會上重要的第一步。知影互相吞忍、包容、尊重人，隨時保持感恩的心，諒解別人的過錯，相信有量才有福。
若是逐家攏會曉用這款的態度，鬥陣作伙，一定有法度維持和諧的互動，進一步建立人佮人之間的好關係。
【訂稿】《高中組》
人來出世佇這個世間，短短幾十年，勞碌走zŏng，ㄧ日過ㄧ日。有時你gā(共)想，做人親像咧遊覽，知食知做，歡歡喜喜若像真單純。其實，想欲事事順利過ㄧ世人，嘛無hiah-ni
簡單。
人隨時爲着事業佮家庭咧打拼。但是，毋管偌爾仔認真，偌爾仔細膩，嘛袂當永遠攏掛無事牌。俗語講：花無百日紅，人無千日好。千里馬有時嘛會着dāk(觸)。人在順境，好過日，代誌若到，種瓠仔，生菜瓜。這個時陣，除了本身的奮鬥佮堅持，更加需要朋友弟兄，相扶持。論真講，人生一路行過來，隨時是有真濟人咧共咱鬥幫贊e。
親像咱細漢的時，父母是ùi一塊紅紅，共咱飼甲變大人，這中間的辛苦，免想嘛知。佇學校，老師用心的牽教，予咱有智識；同學之間，互相照顧、安慰、關心；予咱有朋友情、兄弟愛。社會國家，予咱安定、民主、自由的大環境，嘛是真濟前輩，努力奮鬥出來的結果。這攏是咱愛感恩的對象。
我有一位同學，因為老父事業失敗，險險就無法度繼續讀冊。好佳哉逐家ga伊鬥相工，伊才會當留落來完成學業，伊定定講，伊真感恩同學朋友的協助佮關心，將來有機會，一定欲報答有困苦的人。阮只不過是出淡薄仔力爾爾，伊就行出困境，改變伊的命運，擱定定予īn規家夥仔數念，可見咱人，攏是存着：食人ㄧ半嘴，毋敢放袂記的想法。
毋過，這碼現實的社會，真濟人，是將眼前的種種福份，當作是天落落來的。
討債損蕩，毋知惜緣惜福，兼做出金收樓拆。船過水無痕，忘恩背義的代誌。人情義理囥一邊，利益看甲卡大天。毋知飲水思源頭。掠準家己好，就無代誌。事實上，敢是按呢？
世間人，愛知，食果子拜樹頭，知恩報本。人若對咱有ㄧsūt仔恩情，咱就愛知影囥咧心肝底，是袂使放袂記得。尤其是，養咱、成咱的父母，愈卡需要時時刻刻知恩報本。可惜，現代人追求自由享受，定定出現「父母飼囝無論飯，囝孝父母照算頓」的情形，確實予人真怨嘆。
我認為，人愛時時抱着一粒感恩的心。雖然ㄧ樣米，飼百樣人。各人有各人的想法，毋拘，倫理道德一定愛兼顧。有恩報恩，食人ㄧ口，無法度還人ㄧ斗，嘛愛知ㄧ斤還八兩。規規矩矩，事事照步來。尤其是有孝父母這項，ㄧ定袂使放外外。
這碼我一定欲認真充實家己，向望做一個有路用的人。除了報答父母的恩情，將來有機會嘛欲貢獻社會國家。我定定按呢想：今仔日我會當有ziah好的福分，生活佇自由快樂的台灣，我嘛愛想辦法將福分，留予下一代，我想按呢卡是正確的人生觀。今仔日我的演講講到遮，多謝大家。