重溫「牽手」的古早情

dang hōng-zing

佇(di)南部定定有一句俗語咧流傳：「有唐山公，無唐山媽」，意思指對荷蘭時期以後，台灣的住民，查甫祖先(俗稱祖公)有部份是按唐山(指福建)來的，毋過查某的祖先(俗稱祖媽)攏是土產的平埔媽。換一句話講，台灣的住民大部份攏有平埔族的血統。咱看荷蘭佔領台灣的期間，台南縣、市一四界著是番社(漢人聚落稱莊，原住民稱社)，蓋有名的四個是：新港社(今新市)、大目降社(今新化)、蕭壠社(今佳里)、麻豆社(今麻豆)，另外有台窩灣社(今安平)、赤崁社(今赤崁)等，按遮咱著會當了解台南的子民佮西拉雅族(平埔族一支)祖先的密切關係。一個族群的來源「是啥物，著講啥物！」無需要掩掩iap-iāp，咱應該認真去了解家己的出身佮歷史。

語言學家講：「語言是文化的活化石，是歷史的見證」，對台灣頭到台灣尾有足濟所在的地名，猶(ia)擱見證平埔語音留落的痕跡，台灣(大員)、基隆(雞籠)、關渡(干豆)、萬華(艋舺)、 民雄(打貓)、高雄(打狗)、屏東(阿猴)、霧峰(阿罩霧)、彰化(半線)、通霄(吞霄)、北投、南投、沙鹿、麻豆、走馬瀨、漚汪等都是用平埔語音發聲的地名。

早期移民到台灣的漢人，將台灣的原住民看做「番」，平埔族一般叫做「熟番」，高山族著稱呼「生番」，話中充滿著輕視。種族的傲慢佮偏見，往往是因為對弱勢族群文化的認知無夠所造成的。佇zia用福佬語的「牽手」一詞來說明。有人將翁某稱呼做「先生、太太」、「老公、老婆」、外國人叫「甜心、蜜糖」等，任何的稱呼攏無福佬語「牽手」的合軀。其實zit句「牽手」的出處，來自平埔族的婚姻習俗。根據清人郁永河所著「裨海紀遊」一書中記載「婚姻無媒妁，女已長，父母使居別室中，少年求偶者皆來，吹鼻簫、彈口琴，…女擇所愛者，乃與挽手。挽手者，以明私許之意也。」這是一段敘述台灣早期祖先平埔族婚姻的習俗─牽手活動，牽手儀式除了bheh報親朋戚友知影以外，擱象徵夫妻兩人手牽手相互提攜同甘共苦過一生，這是何等莊嚴神聖的儀式，漢人看着真欣羨，莫怪會將「牽手」當做翁仔某的代名詞。

佇福佬語裡，類似「牽手」ziah-ni優雅的語詞滿滿是，譬如「伴手」、「等路」、「正港」、「田園」、「扑拚(pà-biaⁿ)」、「重巡(dīng-sŭn)」、「搭心dà-sim」等，攏是佇一定的歷史背景下所形成的詞彙。zia-ē文化的活化石，非常值得咱共傳承佮推廣的。