(台文) 談台語的語言個性─押韻

dang hōng-zing

每一種語言攏有伊的個性，這dorh是為啥mih真濟(ze-)出外人，若聽著家己的母語ā是故鄉腔，感覺特別親切的原因。比如：華語講：「欲速則不達」、客語講：「緊事寬辦」、英語講：「more haste less speed」，台語dorh講：「食緊挵破碗」、「緊紡無好紗，緊嫁無好大(dā-)家」。gang一個概念，每一種語言有伊家己的講法佮思考，攏非常有意思。

真濟人感覺奇怪，為啥物過去台灣老一輩的人，多數攏是m-bhat字，有人滾笑講是「青暝牛」，m-gu若講著歷史故事，一支喙dorh講bhe 煞；唱起歌仔調、七字仔調dorh哼無停；厝內的阿媽、隔壁的阿婆仔話一講，規牛車的「俗語」dorh綴佇嘴後；特別是早期的「婆仔」講好話dorh像機關銃滴答叫，好聽擱攏bhe 跳針，記持好gah無dè講。俗語講得好：「毋(m)是新婦ghău，是zōr料夠」，因為台語有一個特色「押韻(又稱鬥句)」，所以唸起來不但順口好聽而且好記。下面dorh分別舉例說明：

(一)謎猜：「九橫一直，孔子公想三日(臆晶)」、「一坵田鬆鬆鬆，幾蕊花紅紅紅(臆香爐)」、「無腳會走，無嘴會吼(hàu)，無尻川會ciā畚斗 (臆海湧)」。

(二)俗語：「賣花講花紅，賣茶講茶芳」、「食糖算頓，食水久長」、「食gah流汗，做gah畏寒」、「嘴唸經，手摸奶」。

(三)盤喙錦：「和尚挵破鼓，提褲來補鼓，鼓破褲補，褲破布補，m知是布補褲，ā是褲補鼓。」

(四)喝場：「來來來，緊來緊看，慢來減看一半。樓頂報樓腳，阿母招阿爸。有人愛看弄鐃(lău)，嘛有人愛看拍拳頭…」。

(五)囡仔歌：「坐飛機看天頂，坐大船看海湧，坐火車看光景，坐公車錢kah省，坐牛車順sua挽龍眼。」

(六)褒歌：「千里路途無嫌遠，見面親像蜜攪糖，苦無時鐘行倒轉，好話未講天先光。」、「半暝月娘入紗窗，偏偏照我守空房，關窗將月緊緊送，送去隔壁照別人。」

(七)說唱：「(思想起)日頭出來(哩都)滿天紅，枋寮過去(哩都)是楓港(噯唷喂)，希望阿哥來tiàⁿ-tang(噯唷喂)，(噯唷)疼痛小妹出外人(噯唷喂)。」

(八)好話：「茶甌圓圓圓，富貴萬萬年。」、「茶甌深深深，翁某會仝心。」、「甜茶甜甜甜，福氣dùe身邊。」、「燒酒līm落喉，囝孫會出頭。」

(九)歌謠：「今日又是風雨微微，異鄉的都市，路頂青青照著水滴，引阮的悲意。青春男女毋知自己，卜行dòr位去，漂流萬里，港都夜雨寂寞暝。」─港都夜雨。

(十)創作：「手一牽一世人，織一領愛情夢。雙人dàu陣行，永遠無驚惶。有汝疼惜的日子，生活上蓋媠。結合是天意，鬥陣是福氣… 」─牽手情。

以上所舉的例，是毋是順口入耳擱趣味。佇日常生活中，有押韻的詞句，因為重複韻律有音樂的效果，當然dorh好唸好記。台語會dàng予人隨時朗朗上口，主要原因是伊有一種「押韻」的語言性格。汝講這是毋是一項真寶貴的語言文化資產。

(附：本文的「台語」是指在台灣廣為使用的福佬語(官方稱閩南語)，這個語言是台灣近百分之七十五人口的母語。)