(台文)  台語的雙聲道：文白音

dang hōng-zing

「酒逢知己飲，詩向會人吟。相識滿天下，知心能幾人(昔時賢文)。」「字是隨身寶，財是國家珍，一字值千金，千金難買聖賢心(千金譜)。」zit兩段話試用台語唸讀看māi，咱加減感受到這是兩種無仝的語氣，這著親像「花蕊」和「花花世界」中的「花」有無仝的發聲。

使用福佬語(俗稱台語)的族群，會發現日常生活用語，定定會出現仝一字有兩種以上的語音，比如「林」字，士林(lĭm)佮樹林(nă)就有兩種無仝的發音。「西」字，西(si)瓜、西(se)餐、講東講西(sai)，有三種無仝的發音。「下」字，下(hā)班、下(hē)落、下(ē)面、下(gē)路，有四種無仝的發音，真濟人捎無總，無了解這是台語「文白異讀」的現象。文讀音是根據文字來讀音，所以有高度的穩定性。白話音通常是口耳相傳落來，所以產生各種無仝的語言層，自然著出現「一字多音」現象的原因。

台灣早期的讀冊人，朗讀四書五經、古詩詞固定用「文言音」來發音，但是私下交談時，著用「白話音」來溝通，真濟讀冊人，不知不覺著引用冊上的句讀(dāu)，比如：「近水知魚性，近山識鳥音」、「一言既出 駟馬難追」，文讀音著按爾表現佇口語上。另外比如：「君子意如何」、「流水如有意」、「萬事不關心」、「人事有代謝」、「風塵何處期」等，其中的「如何」、「有意」、「關心」、「人事」、「風塵」等語詞，原本攏是唐詩三百首的書面語，即碼煞變成生活上的口頭語。

有一寡推動台語文的人士，認為文讀音根本毋是口語音，所以毋免去學習、了解，有的甚至反對用文讀音去唸讀古文、吟唱古詩詞，in的見解是文讀音早著佮生活脫節了。其實就福佬語的語言層觀念，因為經過語言競爭、融合、取代，真濟文讀音已經行入群眾，所以才有「文白音─敢敢」、「白文音─接接」等形式出現，變成一般的口頭語。台語的文、白音同齊存在口頭，這著表示伊是一種「雅俗共賞」的語言囉。