(台文) 台語文學的肥底─褒歌

dang hōng-zing

佇過去的學習經驗裡，一般人普遍認為台語是無水準的，不但無想bheh講zit款的語言，而且嘛無機會接觸台語文學的作品，年久月深台語文煞漸漸拋荒去，所以根本毋知影「台語文學」有啥物內涵。

其實三百年來，長期佇台灣民間各地，傳唱的台語歌詩─褒歌，著是非常有價值的文學作品。褒歌是台灣歌詩、現代詩的活水，講來是台語文學的肥底，嘛是台語文學的源頭。莫怪日據時代，「台灣藝苑」刊物，共稱呼做「台灣國風」，佮中國的詩經─十五國風會當相比並。「台灣國風」的形式固定是四句，俗稱「四句聯仔」；每一句攏用七字來表現，嘛叫做「七字仔詩」；四句全講究押韻，俗稱「全鬥句」。下面用幾首褒歌來說明：

「半暝月娘入紗窗，偏偏照我守空房，關窗將月緊緊送，送去隔壁照別人。」這是一首描寫獨守空閨的女子，苦等良人出現，煞去予月亮戲弄的情景。女主角不得不將月娘趕走，內心的寂寞空虛，讀者明顯感受會着。

「千里路途無嫌遠，見面親像蜜攪糖，苦不時鐘行倒轉，好話未講天先光。」台灣早期交通足無方便，分開了後着無法度互通消息，致使常有相思之情。若有機會見面，著歡頭喜面，嘴笑目笑，兩人甜甘蜜甜的話，當然是講袂了、說袂盡，只好怪時間無夠用。

「門口一欉相思欉，想思病落不知人，先生來看講無望，搭心來看好咚咚。」「嫷bhài無地比？愛著卡慘死。」愛情的熱度，親像六月的火燒埔，互相意愛的男女，愛甲死來活去，古今中外攏相仝。上好的藥方是，叫「搭心的」現身，病情自然著好甲離離離，所謂：「心病著心藥醫」。

「阮厝踮佇娘厝後，不時看娘咧探頭，情意總有九分九，路邊相撞頭勾勾。」愛情的美感，佇伊的有若無，講袂出嘴，目尾勾來勾去當中，一旦真正面對時，煞歹勢甲腳手毋知卜囥dòr位，嘛毋敢表達內心的愛意。

「娘心親像月光暝，君心親像烏暗天，娘用真心對待汝，君像蜘蛛吐毒絲。」查某囡仔對愛情的堅定，往往超過查甫人的虛情假愛。女性一旦接受愛情，著癡情真愛佮對方交陪。啥知？不幸du著薄情郎，著目屎流，怨嘆歹命。

以上所介紹的台灣國風，每一首攏有鮮明的意像，提供了活跳跳的民間語言，充滿了生命力的聲音，這是珍貴的本土文化資產，也是台語文學創作的肥底。