(台文) 通用心、母語情

dang hōng-zing

我真好運，自出世到2003年12月底，將近半世紀的時間，一直有一個講原汁台灣話兼ghāu講「好話」的阿媽佮阮dùa作伙，所以台語(福佬語)的口頭表達運用，對我來講是一件非常自然的代誌。但是所謂「喙舌佮筆尖合一」的書面語dorh從來m-bhat想過的代誌。

一直到1994年，才有機會佇台南神學院附屬基督教社會研究所接觸著教會羅馬拼音(俗稱白話字)。1995年佇台南鄉城學苑接觸著台灣語言音標(俗稱TLPA)了後，因為電腦操作方便，從此著改用TLPA標音系統。後來有機會佇台灣各縣市擔任母語授課教師的培訓工課(kāng-kue)，發現羅馬拼音ho 初學者帶來足大的困擾，原本對母語熱put-pūt的學員，落尾煞變gah無saⁿ興趣。zit個難題，嘛困擾我足久。一直到1999年參中央研究院余伯泉教授作伙發表「台語羅馬字的改革與應用」的論文，才認真思考「台語通用拼音」，佇教學上的利便。

台灣是一個多族群、多語言的社會，為bheh減輕國小學生學國語、母語、英語無gang標音系統的負擔，有須要製定一套「通用標音系統」，這是1996年「教改報告書」的結論。所以佇2002年8月教育部正式公佈中文譯音以「通用拼音」為準，為著bheh 予母語達到普遍化、全面化、簡單化的原則下，我dorh決心推廣「通用拼音」，所以2002年12月我正式佇國立台南社教館做一場「台語通用拼音」的發表會，現場將近有三百外個台語友志來關心了解，「台語通用拼音」dorh正式ùi府城出發。佇短短的時間，「通用拼音」被認為是台語三大拼音系統之一，這m 是新婦ghău，主要是zōr料夠的關係。

現此時，教育部嘛通過採用「客語通用拼音方案」(2003年2月公佈)。當華語、客語攏採用「通用拼音」的階段，徛佇「通用」的精神，我想台語嘛應該會dùe著通用的腳步才diorh，an-ni通用的三隻腳抑(ā-)是四隻腳(含英語)著會徛gah在在在(江永進語)。

2002年12月通用拼音南部的列車已經佇台南出發，zit台列車上北、落南沿路來到台中、彰化、雲林、嘉義、高雄、屏東到台東，並且ùi台灣飛到海外推廣，阮相信海內外通用同齊出發，母語開始起飛的時機來矣(ā)，俗語講「年頭飼雞栽，年尾做月內」，2004年正是通用飼雞栽的年代。