台語文

佇(在)目前這個工商社會內底，除了普通時參(和)厝裡的人鬥陣(相處)以外，佇外口參別人接觸的機會嘛足濟(很多)。譬如佇路頂、佇公車、佇辦公室、佇學校、佇餐廳、佇娛樂場所…。會使講(可以說)，隨時攏會拄著(遇到)一寡人，唔管(不管)有識似(認識)亦是無識似，加減攏會有摩擦兮時陣。尤其是從事服務業的人，每日所接觸的人客百百款(各色各樣)，難免會拄著一寡(一些)口氣、行為無甲意(合意)的人，這個時陣咱著愛控制家己的情緒，想起「好歹在心內，喙(嘴)唇皮仔相款待」、「心歹無人知，喙歹上厲害。」、「好嘛一句，歹嘛一句」、「人情留一線，日後好相看」這幾句台灣上早「EQ」的古早話。畢竟「中主人意，便是好工夫」是服務業兮原則。

講到服務業，大家攏知影是一項辛苦的行業，唔拘話佫講倒轉(不過話又說回來)，只要正當的頭路，攏有伊辛苦的一面，不只服務業艱苦而已。古早人講：「在職怨職，無職思職」，所以恰(較)重要是你愛有興趣即途(這項行業)，按呢？你自然著會「敬業」，並且家己會要求達到「專業」的程度。

經濟發展若到某一個程度了後，「服務業」自然著會(就會)受重視、著會有前途。台灣目前著是行到這個階段。所以有人講：「資訊業、金融業、服務業」是台灣未來的三大行業，是足(很)有道理的。通常來講，服務業佮(和)人的關係上密切。所以佇這個行業卜徛起(欲站起)，愛對人際關係下一點仔工夫。台灣俗語講得好「一牽成、二好運、三才情。」來說明有貴人的牽教，比什麼佫恰(都較)有效。另外一句嘛按呢講：「坐乎正，得人疼。得人疼，恰(較)好咧打拼。」咱若知影佇民主社會，人人攏愛受著起碼兮尊重，咱著會有「人人好」的想法，因為有當時(有時候)「捌(識)人恰好捌錢」，所以想卜(欲)從事服務業的人，先愛捌一寡人，但是卜捌人愛按「喙」(嘴)的修養做起，所謂「好喙袂(不會)食本」、「魚食露水，人食喙水。」相信大家攏同意即款(這種)的講法。

【註】

足濟人講台灣俗語的時陣，通常攏用北京語文咧做說明，一方面是因為驚讀者看無。另外一方面是因為作者無寫台語文的經驗所致。唔管按怎，總是感覺台灣味走無出來，有淡薄的遺憾。目前因為學習台語文的人愈來愈濟，相信「喙講台灣話，手寫台灣文」，這個階段已經漸漸逼近。所以即篇用台語文來表現正港的「台灣諺語」。