台語文
評審的話─寫佇鄉土語言創意教學徵文比賽
董峰政/國立高雄餐旅學院
2003.05.30
目前(2003年6月)正式佇(di)教育體系實施鄉土語言教學，有國小一年級到四年級列為必選，國中一年級列為選修，高中部份是免選也免修，大學部份有新竹師院的台灣語言所佮成功大學的台灣文學系、所，由遮個(zia ē-)資料來觀察，咱看出母語教育今咧起步爾爾(nia-niā)。
就義務教育國中的部份來講，國中的母語教育是屬於「選修」的性質，佇升學壓力之下，有人滾笑講「有選無修」，佇台灣多數學校，根本無將母語教育看在眼內，完全將伊置之度外。但是話擱講倒轉，今仔日若有人「暝頭仔食西瓜，半暝仔反症」，雄雄想卜開設母語課，阮嘛替伊煩惱，因為教學上重要的是「師資」佮「教材」，根本着毋知佇佗(dòr-)位？因為「師資」無長期的培養，卜那有專業的師資？「教材」無深入的規劃，卜那有好的教材？總講一句若無時間的累積佮事先的規劃，着無可能有好的師資佮教材，按爾會影響着母語教學的品質佮效果。
母語的重要性，對(ùi-)教育部長到校長攏有一套躼躼(lòr-)長的講法，毋過攏是「有喙無心」，無人共(ga-)母語當做一回事咧推搡(sāk)，攏抱著蠻皮的心態。但是當各縣市對母語無聲無說的時，咱高雄市教育局早著款起來囥咯(loo)，一開始着有計劃咧培養師資，就國中的部份來講，自1999年到今(2003年)，四年來一直攏佇小港國中舉辦各種程度的台語師資培訓班(捌佇鹽埕國中舉辦一期)，參加的學員會使講個個攏過五關斬六將，經過上百小時的研習，前後規冬的時間，才培養出來的師資，佮迄種利用寒、暑假短短的五工36
小時速成班的師資是大不相同的。咱高雄市即批「會講父母話擱會寫台語文」優良的國中母語師資，至少嘛有二、三百個，所以佇師資方面咱無問題。
佇教材方面，咱高雄市五福國中佇教育局的指導下，佇舊年(2002)年底出版一本「蹛佇港都有福氣」的教材，來做為國民中學台灣閩南語補充教材，教材的內容佮生活相結合，所以真實用。依我所了解，這有可能是國內第一本國中自編的母語教材，就母語的推動來講，這是一件足光彩的代誌。
另外上蓋積極的是母語輔導團，自從王伶俐老師加入國中的陣容，伊着絞盡腦汁、想盡辦法舉辦各種的研習活動，特別有意義是即回舉行「鄉土語言創意教學」徵文比賽，佇濟濟的作品當中，經過公平、客觀的評審，所揀出來的作品，攏是一時之選，尤其經過王伶俐老師一篇一篇的剪修，內容用字更加齊全一致咯，咱特別感謝伊的辛苦。想起過去對母語生份的學員，即碼出現佇我的目珠前的(eo)是一篇一篇的佳作，予我感覺誠安慰佮驕傲。
佇全國其他縣市的師資佮教材攏欠缺的時，咱真歡喜，高雄市已經做好師資佮教材的工課，尤其即本「鄉土語言創意教學」徵文集的出版，對母語的教學更加是如虎添翼(sit)，對其他各縣市嘛有示範的作用。
高雄市佇本土化的母語教育路上，已經是舉頭旗咯，咱感謝市長佮教育局長的重視佮支持。嘛向望所有台語文的有(友)志，逐家擱繼續加油、扑拚，一直到母語釘根、生澶(tuan)，文藝復興行跤到的時。