台語文

由「大家有話，新婦無話」的台灣俗語講起

dang hōng-zing

---

行政院長游錫堃用「大家(註)有話，新婦無話」來回應立法院「藐視國會」的指責(2002年4月)，小可捌(bhat-)台語的人，聽著即句俗語攏會感覺誠心適，因為即句話袂予對方起屁面、歹看樣，又擱會當(dàng-)表達家己的無奈佮不滿。即款話佮「摜籃假燒金」、「袂生，牽拖厝邊」等俗語有仝款的奧妙，這着是台灣俗語高明的所在。

台灣俗語因為長期流傳佇民間，所以伊的本土性佮生活化的色彩相當的明顯，加上台語聲韻的特色，特別講究鬥句、押韻，來達到傳承的功能。比如：勸無法度誠懇鬥陣的人，着講：「愛計較，趁早拆爐灶」。一個毋捌倫理、禮貌的人，着講：「無名無姓，去問鋤頭柄」、「豬食豆箍，人食招呼」。講着生活佮信仰的時，講「先顧腹肚，才顧佛祖」，抑是「第一顧腹肚、第二顧佛祖」；講着有人開喙合喙全是仁義道德，腹肚內煞攏是歹心狼毒、刣人放火的時，着講「喙唸經，手摸奶」、「手舉刣豬刀，喙唸阿彌陀」。講到求人不如求己的時，通俗的話講「教豬教狗，不如家己走」，卡雅氣着講「家己栽一欉，卡贏看別人」等，簡單的一句俗語，着講著心肝窟的意思。另外因為台語是雙聲道(有文、白音)，所以有一寡俗語嘛相當講求文學性，換一句話來講，台灣的俗語常常攏是另外一種「詩的語言」。比如，描寫月亮的圓缺變化，着講：「初三四月眉意，十五六月當圓，廿三四月暗暝」。表示父母佮子女的心情，着講「父母疼囝長流水，囝想父母樹尾風」。想卜表示跤踏實地，才會當萬年久遠，着講：「食糖算頓，食水久長」，其他如「目珠看粿，跤踏著火」、「卜去烏影，毋去吊鼎」等相當有意境、有內涵的文學語言。

若以「大家」佮「新婦」的關係，進一步來探討， 咱舉一寡台灣俗語來說明：比如新婦、大家佮老母、查某囝的關係，着講：「不孝新婦三頓燒，有孝查囝路上搖」。大家供體新婦貧憚，但是歹勢直接講的時，着講：「大目新娘，揣(cue-)無灶」。另外佇厲害大家的管教下，新婦戡袂著予罵，着講：「苦瓜嵁嵁硈硈削皮汝也罵，瓠仔平平悠悠無削皮汝也罵」、「麵線摻鹽汝也罵，豆簽(籤)無摻鹽汝也罵」、「九頓米糕無上算，一頓冷糜抾去囥」等傳神的俗語。另外像「濟囝餓死爸，濟新婦氣死大家」、「雜唸大家，出蠻皮新婦」、「緊紡無好紗，緊嫁無好大家」、「凊飯無食，新婦ĕ(的)」，攏是時常聽着的心適的台灣俗語。

所有的語言學家對各種語言的俗語攏非常的重視，因為俗語是用上簡單的句讀、提鍊出上精華的意像，換一句話來講，是用上簡單的話來解說上複雜、上深沈的思想。所以仝一種意念佮想法，每種語言攏有伊家己表達的方式，這着是語言本身的個性。比如，講着有關「生存佮尊嚴」即個概念的時，英語講：「Huger has no law飢荒的面前無法律」，華語講「飢寒起盜心」，台語着用「枵(iāu-)雞毋畏箠，枵人無惜面體皮」。擱比如「匆碰(cong-bōng)的行為」，英語講：「Haste makes waste想卜緊，煞愈了時間」，華語講：「欲速則不達」，台語着用「食緊弄破碗」抑是「緊紡無好紗，緊嫁好大家」，這攏是語言智慧的結晶，非常值得咱共重視。

對(ùi-)頂面簡單的說明，咱誠清楚了解，每一個族群的語言，上會當表現語言特色的是「俗語」。因為俗語不但是一個族群生活經驗的智慧，亦是一個族群風俗民情佮思想信仰的縮影，反映一個族群的個性。過去原住民語、客家語、福佬語等所謂的「方言」，長期流浪、淪落佇民間，放(據在)伊拋荒，無受著重視，多數的俗語攏強卜無氣脈矣(斷站矣)。佇遮，咱呼籲政府、民間共同來搶救真正台灣文化的語言，做為落實台灣本土文化的第一步。

註一：另一種說法「大家有嘴，新婦無話」。

註二：「大家」，爾雅釋親：「婦稱夫之父曰舅，稱夫之母曰姑」。台灣語典(連橫)：「婦人稱舅曰大官；姑曰大家。」後漢書：「扶風曹世淑妻班昭有才德，入宮教授妃嬪，稱曹大家。」