「正港」的菅芒花

董峰政/世界台灣語通用協會顧問

多年前知名的藝人白冰冰小姐，因為捌出版過一本傳記─「菅芒花的春天」，尤其是發生「白曉燕」慘案了後，即本冊一時煞「洛陽紙貴」真搶市，特別是前一站仔，拄成立無偌久的民視亦推出「菅芒花的春天」的連續劇，一時鬧熱滾滾，台灣到處都有「菅芒花」的聲音，甚至聽著「菅芒花」著想著「白冰冰」。掠準「菅芒花」的花名，是白冰冰號名的。可見社會一般人，對菅芒花即款植物的特色並無了解，甚至根本毋捌(m-bhat-)看過。其實菅芒花，是台灣土生土長的植物，伊的特色會使講是台灣歷史演變的見證者、代表物。

「菅芒」是多年生的植物 。即款植物有足堅強的「生命力」，毋管是風吹、日曝、雨沃，佇啥乜歹環境，伊攏有法度活落去。所以咱佇溪仔邊、沙埔仔、半山崙等荒郊野外的所在，常常會看見一片白茫茫、外形親像蘆葦的花束，庄跤人將「菅芒」開出來的花共(gā-)號做「菅芒花」(gūaⁿ-bhang-hue)，成做台灣鄉土佮莊跤所在的一大特色。「菅芒花」立秋以後開著白色的花，因為所開的花無芳無味，除了佇風寒的秋天，透露著一絲仔淒涼的景緻，淡薄引起過路人的注意以外，通常無受著人的重視佮欣賞。

咱若用謙卑的心情，好好去認識台灣，會發覺台灣400冬來的近代歷史，著親像菅芒花即款植物的特性，會使講有足濟雷同的所在。首先台灣即塊島嶼第一擺出現佇國際舞台上的時，伊的領導者卻是被稱呼「紅毛仔」的「荷蘭人」、「西班牙人」，伊殖民統治台灣前後總共38年(1624-1662)。後來的鄭成功以「反清復明」的使命，趕走了荷蘭人，鄭氏三代前後統治台灣22年(1662-1683)。紲落來，由滿洲人佇中原所建立的大清帝國，猶原仝款派兵攻打台灣，結束了鄭氏王朝，將台灣變做大清帝國的海外屬地(1683-1895)，就(ziu)台灣「原住民」的立場來講，甚至就「平埔族」的後裔(e)來講(台灣現此時百分之八十五上的人口有濫著平埔族的血統)，不管鄭氏王朝抑者是大清帝國，攏是外來的統治者。擱來是中日甲午戰爭，大清帝國被日本人拍敗，煞將台灣割予日本，而且窮體(gīng-te-)台灣是「鳥不語、花不香，男無情，女無義」的所在，台灣再一次淪落做外國人的「殖民地」(1895-1945)。第二次世界大戰了後，台灣重歸所謂「祖國」的懷抱，但是佇1947年發生二二八事件了後，「祖國」煞變成做「外來政權」。由即段歷史看來，佇即塊島嶼的領導者，從來毋是台灣的百姓所選擇的(1624-1996)，一直到1996年舉行「總統直選」，台灣的百姓第一擺當家做主，選出家己的總統，這是台灣歷史的一大步。回想即四百冬來，台灣的人民，親像「新婦仔」顧人怨，過著「無尊嚴」、「無自主」的日子。嘛親像「舞女」，隨人客搖來搖去，踅(seh)來踅去，過著受人「恥笑」、「侮辱」的生活。台灣雖然無「富貴命」，無人惜、無人疼，但是「天公仔囝」顛倒好邀(iōr)飼，養成台灣人勤儉拍拚，一代傳過一代，名聲通四海，親像「菅芒花」滿山遍野開甲滿滿是。

有「台語文學之父」的許丙丁先生，不但是台灣文學界的前輩，亦是名作詞家。比如「思想起」、「丟丟銅仔」、「六月茉莉」、「牛犁歌」、「卜卦調」等，攏是逐家足熟似的歌謠，完全出自伊的筆下。 許丙丁先生佇戰後利用「菅芒花」外表粗俗、無出色的特色，來形容一個貧家女，表達出迄(hit-)種散赤無倚靠，無受疼惜的狀況，並且自嘆命薄、自恨運歹。透過被稱呼「台灣作曲之父」鄧雨賢的譜曲，哀怨佮悲傷的感情，隨著歌聲透露出來，使人感同身受 。即首歌干礁看伊的歌詞內容，都是一首相當有意境的文學作品，不但「押韻」順口，「用字」典雅、「意義」深遠，所以即首正港的「菅芒花」，對四百年來一直受著外來政權統治的台灣人，有伊特別的意義，值得咱來共(gā)推廣發揚的。

(2000.04.07初稿/2003.09.28定稿)

【附錄】

菅芒花 作詞：許丙丁 作曲：鄧雨賢

菅芒花白無芳，冷風來搖動。

無虛華無美夢，啥人相疼痛。

世間人錦上添花，無人來探望，

只有月娘清白光明，照阮的迷夢。

菅芒花白無味，生來毋著時。

無玉葉無金枝，啥人會合意。

世間事鏡花水影，花紅有了時，

只有風姨溫柔搖擺，顧阮的腰肢。

菅芒花白文文，出世在寒門。

無美貌無青春，啥人來溫存。

世間情一場幻夢，船過水無痕，

多情金姑來來去去，伴阮過黃昏。