攑「台灣說唱」的頭旗

董峰政

「噍吧哖」一個台灣歷史上蓋予人數念的地名之一，因為伊佮人民鬥陣、佮土地結合，是一個有血、有目屎，予人有疼、有感覺的所在。

「噍吧哖」原本是平埔族噍吧哖社的所在，清朝的時代分屬安平縣噍吧哖庄，善化里(目加溜灣社)西堡、外新化(大目降社)南里，一直到了1920年才被日本人改名做「玉井」。我的故鄉徛佇大目降的隔壁莊，叫做埔羌頭的一個小莊跤─「蕃薯厝」，因為地理的緣故，所以細漢捌聽過阿媽佮故鄉的人講過即件轟動海內外的事件─「噍吧哖反」(徛在日本人的角度叫做反)。發生佇1915年的余清芳抗日事件，當年12歲的阿媽(1906年)親目珠佇故鄉看見日本軍隊武裝打扮殺氣騰騰，一陣(din-)一陣行軍經過阮「蕃薯厝社」，迄時陣逐家驚甲面仔青捐捐(sùn)，我的阿媽到即碼(2001年)講著即件代誌猶原擱感覺誠驚惶(hiăⁿ)。但是稱呼即個事件，攏足紲喙講是「噍吧哖反」，可見佇怹的心目中，受著統治者的影響，共即件佇虎頭山拚生死混戰七工，後來犧牲數千人的抗爭，爭取台灣人的尊嚴，替台灣人出一口氣的事件，煞看做「叛亂」事件，比如：我的故鄉蕃薯厝社，依永康鄉志記載，白紙寫烏紙講即個庄頭是平埔族社，是一個「拜矸仔」的番社，但是規庄的人攏袂記得即種身份，煞綴(dùe-)人咧喝講咱攏是「炎黃的子孫」，這敢毋是前總統李登輝先生所講的「身為台灣人的悲哀」，台灣人袂曉做主人，毋知影家己的身份，莫怪一直予人當做「戇奴才」咧看待。

即幾冬來，個人一直感覺台灣人的思想錯亂、價值錯亂，這完全是因為台灣長期來受著外來政權的統治所致，所以造成講別人的話(指日語、北京語)比講家己的母語卡滑溜；對別人的歷史佮地理的清清楚楚，對家己的歷史、地理袂輸像青瞑牛仝款，即款「無照天理」的現象，長期存在佇台灣即塊島嶼，台灣人煞變成「蠻皮新婦」，毋但(m-diăⁿ)，一般人當做無要無緊，連新政府嘛無啥乜作為，莫怪教育部主政者推捒(sak-)母語，拖拖沙沙，厚屎尿、厚沙屑，甚至佇九年一貫教育政策，擱將「認識台灣」的課程取消，這完全是無將台灣看在眼內，對台灣無疼心的做法。因為卜建立台灣命運共同體，一定愛釘根佇台灣本土化，落實本土化愛對(ùi-)母語佮台灣歷史、地理落手，若無，著是「阿媽生孫─講暢个(e^o)」。

佇即個本土文化拋荒、貧血的時代，咱真歡喜看著周定邦先生，攑「台灣說唱」的頭旗，做一個「現代七字仔歌」的開路先鋒，透過資料收集佮絞盡腦汁，經過十月懷胎，即碼囡仔─「噍吧哖七字仔歌」已經順利來出世，咱作伙來共恭喜，嘛向望伊後一胎會當生雙生，予台語文的園地有卡濟品種、卡嫷的花蕊。

(dang hōng-zing寫佇鯤島園地2001.06.17)