佇母語的田園看著拍莓的花蕊
dang hōng-zing /2003.10..29
1992年諾貝爾文學獎得主詩人德瑞克．沃克特(derek．Walcott)：「詩作佮歌曲離愈遠，作品的價值著失去愈濟。」(2002.09.29台北發表)
2000年得著諾貝爾文學獎得主旅法華人高行健先生公開表示：「文辭之美，不如聲音之美」。(2001寫作之路)
2003年國立藝術大學前校長馬水龍先生，佇發表會對媒體表示「語言是一切音樂的根本，語言造就音樂，語言本身着(dorh)有節奏佮旋律」。(2003.10.22)
毋管是詩人、小說家、音樂家的觀點，攏共同強調音樂佇語言中的價值。即款的見解予從事台語詩創作的人得著足大的鼓勵，因為台語上大的特色就是伊有豐富的音樂性，伊有峘(gūan-)音、下(ge-)音，有舒聲、促聲，簡單講有「詩樂和諧」的特色。比如，咱讀南宋岳飛所寫的詞「滿江紅」，就華語、台語來講，雖然攏是仝款的內容，仝款的漢字，但是即闕詞全部用「入聲字」作韻跤，所以若用台語的「文音」朗誦，才會當(dàng-)體會着岳飛迄種還我山河的氣慨佮悲壯，華語因為無入聲字，着無法度表現即種韻律佮意境。
滿江紅/岳飛
怒髮衝冠，憑欄處，瀟瀟雨歇。
抬望眼，仰天長嘯，壯懷激烈。
三十功名塵與土，八千里路雲和月。
莫等閒，白了少年頭，空悲切。
靖康恥，猶未雪；
臣子恨，何時滅？
駕長車，踏破賀蘭山缺。
壯志飢餐胡虜肉？
笑談渴飲匈奴血。
待從頭，收拾舊山河，朝天闕。
真歡喜佇許詩人正勳兄即本「城市三寶」詩集，咱四界看著規本詩集內容充分發揮了「聲音之美」、「節奏佮旋律」的特色。比如佇「曝鹽」佮「削蔗根」即兩首詩，咱勻勻共(ga-)唸、勻勻共讀，音韻組合那(na-)像天籟一般，有「文字視覺」佮「音韻聽覺」雙重的享受：
「曝鹽」
-----
日曝盬會閃晰
日曝人汗水滴
滴啊滴 滴啊滴
滴袂離
鹽粒內底有汗味
-----
「削蔗根」
-----
會社廓若動
阿娘無閒規工
艱苦成囝有所望
透早出門三四點 霜凍
暗時入門八九點 露水重
啥人會知伊苦慘
只有月娘來疼痛
--------
佇推廣台語的過程中，我一直提醒家己「喙(cui)講父母話，手寫台語文」，語言尤其是母語愛佮生活、土地結合，隨時囥佇喙舌仔內底。另外上重要的是愛用台語的思考來創作台語詩、台語文，用台語詩來表現感情，用台語文來表達思想。初行入母語田園的台語友志定定(diān-)有疑問，卜用啥乜(物)作題材，我攏會建議寫土地、故鄉、祖厝、廟宇、田園、溪水、親情、童年、囡仔伴、校園、愛情、族群、搬戲…等，攏是用母語來書寫的好題材，真濟人接受我的建議，攏得著足大的滿足佮成就，我相信母語佮鄉土、親情是剝袂開个(eo)，毋是任何一種語言有法度來取代个。
佇「鹿耳門的風」詩集，每一個單元「城市三寶」、「詩中有畫」、「SARS唱聲」、「阿娘咧叫我」、「寫阮故鄉」、「愛覕佇佗位」、「娘佮僩」，攏是流露對歷史的記憶、土地的關愛、社會的正義、親情的數(siàu-)念、故鄉的生長、牽手的扶持，用上蓋有感情的筆尖，寫出一首一首的詩聲、畫意。比如佇「白鴒鷥林」即首詩，
鹿耳門溪的風暝日透
北汕尾的湧大聲吼
溪水海水一直流
台江風雲起戰鬥
滄海桑田揣源頭
一直守佇樹林內
白鴒鷥
一代傳一代攏無搬走
對頭到尾看透透
即幾冬來(1998∼2003)，我時常有機會佇台灣島佮美國四界推捒(sak-)母語，真濟人感受著「台語之美」，我嘛傍(bng-)台語的福氣受人呵咾(ōr-lòr)。其實面對「阿娘的話」，只要「誠懇」表達，著是上好聽的話，所以「毋是新婦爻(ghău)，是佐料夠」。因為仝款一首好的詩作，認真講起來，嘛毋免講究啥乜形式、啥乜技巧，上重要的是「用心落筆」，完成作品了後，毋管是作者抑是讀者攏會「感動」，進一步產生「共鳴」的目標。所以若一再追求形式的、結構的、語詞的層次，毋是對(ùi-)音樂的、感情的、反省的、土地的、社會的、關懷的角度出發的作品，可能著會變成家己「孤芳自賞」、抑是一組人「相褒相扶(pŏ)」)的文字組合爾爾。
俗語講：「處處留心皆學問」，佇「城市三寶」即本詩集，作者不但用心過日子，用心觀察，用心寫作，而且用心做一個有尊嚴的台灣人，所以佇每一篇作品四界留落了「用心」的痕跡，雖然無特別講求技巧、形式，但是技巧、形式自在其中，這是作者高明的所在。比如：「娘佮嫻(gàn)」即首詩
伊卜做娘總掌管，
叫咱著愛做嫻，
娘佮嫻
運命完全無仝款
|
|
麻糬手內出
做娘做嫻家己熨
毋免問神
毋免問佛
「用台語作詩，用台語作文」，對大多數使用台灣話的人來講，是毋捌有的經驗，多數人的疑問是「台語敢有字？」、「台語敢有法度創作？」「台語作品敢有夠水準？」佇我寫作經驗內底，竟然是，讀一世人的華文，寫不計其數的華語文章，但是無一篇予我感覺有價值、驕傲的作品，一直到我有機會用家己「阿娘的話」來練習寫台語詩、台語文，才予(ho)我真正體會著做一個台灣人的意義，因為「喙舌佮筆尖」合一，著是台灣話佮台灣情、台灣心的結合。母語不但會當用來創作，擱是用來表達感情、思想、見解上好的工具。汝看佇「斷索的搖笱(gŏr)」即首詩，用土地的聲嗽寫出對遭受地動災厄鄉親的疼心佮毋甘：
島嶼
可愛的島嶼
上蓋舒爽的搖笱
島國的囝孫
代代生湠
佇遮快樂安居
|
|
敢是搖笱的索仔袂堪得
雄雄煞來斷去
地動山崩無張持
大力搖 出力獻
獻過來獻過去
山崩地亦裂
厝倒人亦死
仙走伊都走袂離
兩千外人活埋慘死
佇母語正在咧推動的時刻，咱面臨真濟困境佮挑戰，有音標佮用字的困擾，有華語佮英語的挑戰，但是咱無驚惶(hiăn)，因為咱的母語是世界上嫷的語言之一，咱即碼上欠缺的是一篇一篇台語文作品，一本一本台語文冊，所以當咱看著正勳兄發表伊一首一首的台語詩，即碼擱卜出版伊的台語詩集，這是台語文界一件大代誌，我相信當咱優秀的台灣囡仔開始佇母語田園種作的時，著是台灣文藝復興的開始，即本「城市三寶」詩集佇即個關鍵的時代做了誠好的起步。
(Dang hōng-zing寫佇鯤島園地 2003年10月30日)