「正港」的菅芒花
| 一冬外前因為知名的藝人白冰冰小姐，曾經捌出版過一本傳記─「菅芒花的春天」，尤其是發生過「白曉燕」慘案了後，職本冊一時煞「洛陽紙貴」，特別是前一站仔，民視亦推出「菅芒花的春天」的連續劇，一時鬧熱滾滾，台灣到處都有「菅芒花」的聲音，甚至聽著「菅芒花」道想著「白冰冰」。以為「菅芒花」的花名，是白冰冰號名的。可見社會一般人，對菅芒花即款植物的特色並無了解，甚至根本嘛唔捌看過。其實菅芒花，存在佇台灣已經幾萬冬囉，伊會使講是台灣歷史的見證者、代表物。 「菅芒」是多年生的植物 。即款植物有足堅強的「生命力」，唔管是風吹、日曝、雨沃，佇啥乜歹環境，伊都也有法度活落去。所以咱佇溪仔邊、沙埔仔、半山崙等荒郊野外的所在，常常會看見一片白茫茫、外形親像蘆葦的花束，庄跤人將「菅芒」開出來的花甲號做「菅芒花」(koaN-bang5-hoe)，成做台灣鄉土佮莊跤所在的一大特色。「 菅芒花」立秋以後開著白色的花，因為所開的花無味無香，除了佇風寒的秋天，透露著一絲淒涼的景緻，淡薄引起過路人的注意以外，通常無受著人的重視佮欣賞。 咱若用謙卑的心情，好好去認識台灣，咱會發覺台灣400冬的近代歷史，著親像菅芒花即款植物的特性，會使講有足濟雷同的所在。首先台灣職塊島嶼第一擺出現佇國際舞台上時，伊的領導者卻是被稱呼「紅毛」仔「荷蘭」人、「西班牙」人，伊殖民統治台灣前後總共38年(1624-1662)。後來的鄭成功以「反清復明」的使命，趕走了荷蘭人，囝孫前往統治台灣22年(1662-1683)。由滿洲人佇中原所建立的大清帝國，猶原共款派兵攻打台灣，結束了鄭氏王朝，將台灣變做大清帝國的海外屬地(1683-1895)，就台灣「原住民」的立場來講，甚至就「平埔族」的後裔來講(台灣現此時百分之八十五的人口攏有平埔族的血統)，不管鄭氏王朝抑者是大清帝國，攏是外來的統治者。擱來是中日甲午戰爭，大清帝國被日本人打敗，煞將台灣割予日本，並稱呼台灣是「鳥不語、花不香，男無情，女無義的所在」，台灣再一次淪落做外國人的「殖民地」(1895-1945)。第二次世界大戰了後，台灣重歸「祖國」的懷抱，但是發生二二八事件了後，「祖國」煞變成做「外來政權」。佇即塊島嶼的領導者，從來唔是台灣的百姓所選擇的(1945-1996)，一直到1996年舉行「總統直選」，台灣的百姓第一擺當家做主，選出家己的總統，這是台灣歷史的一大步。回想即四百冬來，台灣即塊島嶼的人民，親像「新婦仔」顧人怨，過著「無尊嚴」、「無自主」的日子。嘛親像「舞女」，隨人客搖來搖去，踅來踅去，過著受人「恥笑」、「侮辱」的生活。台灣雖然無「富貴命」，無人惜、無人疼，但是「天公仔囝」顛倒好育(io)飼，養成台灣人勤儉打拼，一代傳過一代，名聲通四海，親像「菅芒花」滿山遍野開甲滿滿是。 有「台語文學之父」的許丙丁先生，不但是台灣文學界的前輩，亦是名作詞家。比如「思想起」、「丟丟銅仔」、「六月茉莉」、「牛犁歌」、「卜卦調」，遮兮逐家攏足熟口的歌曲，都是出自伊的筆下。 許丙丁先生佇戰後利用「菅芒花」外表粗俗、無出色的特色，來形容一個貧家女，表達出迄( hit )種散赤無倚靠，無受疼惜的狀況。並且自嘆命薄、自恨運歹。透過被稱呼「台灣作曲之父」鄧雨賢的譜曲，哀怨佮悲傷的感情，隨著歌聲透露出來，使人感同身受 。即首歌干礁看伊的歌詞內容，都是一首相當有意境的文學作品，不但「押韻」順口，「用字」典雅、「意義」深遠，所以即首正港的「菅芒花」，對四百年來一直受到外來政權統治的台灣人，有伊特別的意義，值得咱來甲推廣發揚。 菅芒花
作詞：許丙丁 作曲：鄧雨賢 菅芒花白無味，生來唔著時。(si5) 菅芒花白文文，出世在寒門。(mun5) |