| 踏話頭： 「語言只不過是一種溝通的工具而已」，這是一般人對語言普遍的看法，認真講這是外行人講的話。國際名語言學家鄭良偉教授捌(曾)講過：「語言是，溝通的工具、思維的結構，認知的基礎、認同的符號，身份的表態、文化的展現、能力的鑑定、競爭的武器。」由此咱著會當體會語言的多功能，以及了解語言對一個族群的重要性。唔是一句「溝通的工具」會當交代的。比如講：「番仔殺(tai5)」表示「真衰」的意思，但是即句話有伊一段過去移民族群的生活經驗。所以語言有儲存文化的功能，那親像即碼的「微縮」(micro-film)、「光碟」有儲存資料的作用一般。 一個族群的語言，上會當凸顯語言特色，是伊的「俗語」，伊是一個民族、族群生活經驗的智慧，亦是一個族群的風土民情佮思想信仰的縮影，反映一個族群的特性，唯(ui3由)遮兮「古早話」互咱了解文化的傳承。下面咱就舉幾句仔俗語的例，來說明「語言、俗語有儲存文化的功能」，互咱用上蓋簡單的語句，來了解一段有台灣味、歷史情的活動過程。 「語言只不過是一種溝通的工具而已」，這是一般人對語言普遍的看法，認真講這是外行人的話。國際名語言學家鄭良偉教授捌講：「語言是：溝通的工具、思維的結構，認知的基礎、認同的符號，身份的表態、文化的展現、能力的鑑定、競爭的利器。」由此咱著會當體會語言的多功能，以及了解語言對一個族群的重要性。唔是一句「溝通的工具」會當交代的。比如講：「番仔殺(tai5)」即句話，伊內底保存了一個族群過去生活經驗。原來過去佇宜蘭蘭陽平原開發過程，漢人佮原住民起衝突，結果原住民多數被殺，但也有少數歹運的漢人被殺，但是徛(站)佇漢人的觀點，認為漢人被殺是「真衰soe」的代誌，就稱呼叫「番仔殺」。所以語言有儲存文化的功能，那親像即碼的「光碟」有儲存資料的作用一般。 一個族群的語言，上會當凸顯語言特色，是伊的「俗語」，伊是一個民族、族群生活經驗的智慧，亦是一個族群的風土民情佮思想信仰的縮影，反映一個族群的特性，唯(ui3由)遮兮「古早話」互咱了解文化的傳承。下面我就舉幾句仔俗語的例，來說明「語言、俗語有儲存文化的功能」，互咱用上蓋簡單的語句，來了解一段有台灣味、歷史情的活動過程。 唐山過台灣，oan5 「唐山過台灣，心肝結規丸。」即句流傳佇台灣民間的俗語，描寫台灣四百冬來，漢人的祖先移民到台灣的一段辛酸史。 清朝有一位無名氏的詩人，寫一首「渡台悲歌」─「勸君切莫過台灣，台灣恰似鬼門關，千個人去無人轉，知生知死誰都難？」明朝末年，福建、廣東沿海，因為戰亂、飢荒，因此只好向海外討趁(賺)，台灣自荷蘭、明鄭、滿清，就是唐山客移民上好的所在。唔拘(不過)福建參台灣隔一條「烏水溝」(台灣海峽)」，水勢相當的險惡，唔知有偌濟人葬死佇海底，莫怪原鄉的人，稱呼台灣叫做「埋冤」。渡過「烏水溝」雖然表示對桃花源的走揣(尋)，但是嘛隱含著生死不知的驚惶佮危險。這是一種「結規丸」矛盾的心情。 紅柿若出頭，tau5 「紅柿若出頭，羅漢跤目屎流。」即句流傳佇民間的俗語，形容當初移民到台灣的唐山客，佇台灣無某無猴，若寒天一到，變成「有路無厝」，就無知卜如何過冬，充分表達出移民的心酸。 1662年施琅攻打台灣了後，康熙皇帝頒下了「移民三禁」，最主要是禁止帶家眷來台，所以來台灣的移民絕大多數攏是獨身仔，有的好運參平埔族的女子結婚，有的煞揣(尋)無牽手，無家後，無田園，無頭路，最後只好淪為游民，迄(那)陣的台灣人稱呼即種人叫「羅漢跤」。「羅漢跤」往往滯(住)無定所，天氣好的時，凊采佇路邊、簷前跤倒咧睏，但是紅柿若出頭，表示立秋來到，天氣開始轉涼，從此日子就歹過了。 有的羅漢跤有穡頭(工作)就做，來維持日常生活；若無穡頭通做的時，為著卜生活只好淪落變「乞食」，所以民間有「乞食伴羅漢」即句俗語。羅漢跤仔佇庄跤(鄉下)的生活，若像「水流破布」，愈沖愈破。所以有的羅漢跤，只好流落街頭討趁，變成都市的「游民」，漸漸形成一種社會力，威脅著社會的安寧。清朝台灣有兩大民變事件，朱一貴事件(1721年)，林爽文事件(1786年)，主要的成員攏是「羅漢跤」，羅漢跤仔變成互人利用的工具，甚至生命白白來送死，真是使人同情。 少年若無一擺戇，gong7 「少年若無一擺戇，路邊哪有有應公」，即句民間的俗語是咧表示，唐山的一寡「戇少年」，當初並無三思而行，就離開原鄉，移民到台灣，一時舉頭無親，煞四界流浪，終其尾喪身在他鄉外里，變成孤魂野鬼的「有應公」受人祭拜。這是希望變成空，慘死在他鄉外邦的一段辛酸的故事。 羅漢跤仔「有路無厝」、「病無藥，死無蓆」、「死後，無人哭」。在生進前，舉目無親，四界流漢，死後更加無人辦後事，屍體暴露佇路邊，所謂「路傍屍」，任由風吹雨沃(淋)。過去的民俗傳統，認為無倚無靠、無後嗣的鬼魂，因為無人祭拜會變成「惡鬼」。所以一寡民間善士，就替遮兮(這些)「路傍屍」收埋，起廟仔，並且定時祭拜，這就是「有應公」廟仔的由來。即款的廟仔，常常出現佇莊跤的角落，或者是田園邊、墓地的附近。一般無了解的人，往往當做「土地公」廟。其實台灣早期「祭厲」的風俗，相當的流行，無論佇鬧熱的大都市、亦是偏僻的田莊，攏設有「有應公」的廟仔。「有應公」又稱「大眾爺」、「大將爺」、「萬善爺」等稱呼。 「羅漢跤」是清朝台灣社會的一種特殊的角色；「有應公」卻是清朝台灣民間信仰中的一種特殊的神明。演變到尾仔，台灣有了「搶孤」的民俗，用即款的活動來祭拜、布施俗稱「好兄弟」的孤魂野鬼，這是一種「有求必應」的功利活動，嘛是一種「人道關懷」的普渡活動。 頂港有名聲，siaN 「頂港有名聲，下港有出名。」「頂港」是以淡水港為中心的北部所在， 「下港」是以「安平港」為中心的南部所在。即句民間的俗語是咧表示，一個人、一個物件，伊的知名度響遍全台灣，通人知影。台灣早期陸上道路，並無完全開通，南北二路的交通完全靠港口坐船來往，所以用「頂港」、「下港」來指北部、南部。另外用「後山」來表示東部的所在。 西元一八六０年，對台灣來講，是一個重要的年代。即年台灣的「安平」佮「淡水」在天津條約中，頭一擺開放互外國人通商貿易，另外「雞籠」(基隆)、「打狗」(高雄)嘛陸續被要求開放。台灣自古以來因為戰略、商業地位的重要性，尤其經濟作物─糖、樟腦、珊瑚、鹿皮、煤炭等的經濟利益，一直受到外國人重視，莫怪當初荷蘭佔領台灣的總督，捌(曾)講「台灣是東印度公司一隻好品種的奶牛」。自從鴉片戰爭(1842年)了後，西方大國紛紛派員來台交涉，比如：英國提出開採雞籠媒礦的要求，美國也提出佔領台灣，甚至收買台灣的主張，會使講一時鬧熱滾滾。 台灣正式開港貿易後，世界各國聞風而來，如德國、西班牙、葡萄牙、荷蘭、丹麥、比利時、巴西、日本…等國家，攏前後佮台灣訂立通商條約。佇當時為卜應付各國貿易的需要，除了開放安平、淡水為正港(主要港口)，另外打狗、雞籠分別做為安平、淡水的副港(輔助港口)，即四個港口分別佇1863、1864年開放。在當初時，唯(從)「正港」進出的貨物，是上等的貨色，因此到即碼(現在)，台灣民間形容一件代誌是事實，往往會講：這是「正港」的。 仙拚仙，sian 「仙拚仙，拚死猴齊天。」即句民間的俗語是咧表示，過去佇台灣移民社會內底，常常因為利益的衝突，族群的衝突，意識形態的衝突，時常發生爭鬥，社會無一日的安寧，終其尾兩敗俱傷。即款的相觕(tak4)的文化，流傳到即碼的社會，嘛是黨派利益的衝突、派系利益的衝突，鬥來鬥去內部攏袂安定，台灣人無知啥乜(什麼)叫做團結，莫怪有人講：「台灣人放尿，攪沙袂做堆。」，實在是誠諷刺的一句話，值得逐家好好來反省。 早期進入台灣的移民，是來自中國東南沿海無仝所在，有的來自漳州、有的來自泉州、有的來自廣東的潮州，進入台灣了後，因為身分認同的差別，有所謂的「高山番」、「平埔番」、「閩南人」、「客家人」等族群，加上生存空間的競爭，經濟利益的衝突，因此各族群之間時常發生集體爭鬥，叫做「分類械鬥」。分類械鬥有各種形式：有漢人佮平埔人之鬥；有閩南人佮客家人之鬥；有漳州人佮泉州人之鬥；有姓李佮姓廖之鬥；有部落佮部落之鬥；甚至有職業團體間之鬥，會使講無所不至鬥。 各種族群之間的爭鬥，往往只是因為跋繳(賭博)、偷掠雞、偷牽狗等小事來引起，但是車拚起來，卻唔(不)是一般的相拍(打)而已，常常以爭戰的場面出現，拚甲死傷纍纍，將對方當做敵人、冤仇人咧看待。台灣人的雞仔腸、鳥仔肚，即款的排他性格，互台灣的力量分散，付出重大的社會成本佮代價，四百冬來攏受外來政權的統治，台灣人一直無法度當家做主。咱唯(由)即段歷史，來看目前三黨爭鬥的情形，著會當了解幾分囉，嘛使人感慨萬分。 煞尾： 咱唯(由)頂懸(上面)即幾句民間流傳活跳跳的俗語，就會當了解當初祖先的活動佮想法，哪像一部台灣近代史的「光碟」、「微縮」。所以語言是一種文化的紀錄，尤其是家己的「母語」是無法度取代。一個族群如果語言無去，著那像飄落佇茫茫大海，陷入伸手不見五指的萬丈深坑，失去了認同的方向，最後淪落到族群滅亡的地步，汝看原本佇台灣佔大多數原住民「平埔族」，無張無持(無因無故)佇即塊島嶼消失去，著是上好的歷史啟示。 〔中文註〕
|