| 過去佇台灣，教育機關因為長期疏忽、壓制台灣即塊島嶼的方言(台語、客語、原住民語)，致使「受過國語教育」的人民，多數無法度用足(很)流利的母語來表達。另外目前佇學校受教育的「新新人類」，大多數嘛已經變成是母語「失聲」的一代。回想歷史，猶太人亡國2000外冬，佇第二次世界大戰了後，才建立家己的國家─以色列，結果一夜之間，以色列的百姓馬上佇國內通行家己的母語。原因是過去亡國的期間，猶太人佇厝裡用母語參子女交談；安歇日佇教會時，傳教士用母語講道，所以猶太人將母語保留甲好勢溜溜。但是台灣才被日本異族殖民五十冬，被國民黨外來政權統治五十冬，總也共也嘛才一百冬，結局台灣話煞強強卜斷站，強強卜無氣脈，真是使人「無語問蒼天」。為卜防止母語的失落，人人愛來「搶救母語」，逐家做伙來走揣(尋)阿娘的話，來聽土地的聲嗽，將母語參日常生活相結合，「搶救母語」上好的方式，是唯(由)家庭唸唱台灣囡仔歌─童謠、唸謠來做起，互咱的子弟自細漢來鼻著「母語的奶芳」。 「囡仔歌」是有節奏的聲音，細漢囡仔佇伊成長的過程，父母、老師教伊唱歌、唸童謠，這是上好的母語教育，上好的音樂教育。因為童謠的特色是流露天真浪漫的感情佮心聲，並且歌詞字句運用押韻、鬥句特別濟，所以唸起來琅琅上口。遮個(這些)童言童語，內容就地取材、天真爛漫、幻想豐富、心適趣味、韻律煞拍，囡仔佇無形中學著母語的腔口，掌握母語的音樂節奏，體會著感情的流露，塑造了伊的鄉土性格佮土地的關愛。兒童純真的感情，透過童謠的唸唱，來體會鄉土的色彩、生活的鹹酸甜、大自然的幻想、未來的寄望。即款的感情，經由囡仔兄的唱聲佮笑聲，保存佇逐家心肝底、頭殼內，日後化作台灣文學的肥底，族群的心聲。 童謠依歌詞的內容分類，大約會當分做六類(依邱冠福先生的分類)： (一)搖籃類、(二)佚陶(遊戲)類、(三)幻想類、(四)趣味類、(五)喙(嘴)唸類、(六)謎猜類。 (一)搖籃類：如「搖仔搖」 搖仔搖，搖仔搖，上山偷挽茄。 (二)佚陶(遊戲)類：如「佚沙包」 一放雞，二放鴨，三分開，四做堆，五搭胸 (三)幻想類：如「白鴒鷥」 白鴒鷥，車糞箕，車到溪仔墘； (四)趣味類：如「財仔財」 財仔財，唯天頂跋落來； (五)喙唸類：如「火車卜行」 火車卜行嘟嘟叫，十點五分到板橋； (六)謎猜類：如「耳仔」 一欉樹仔，兩片葉，越來越去，看袂著。─耳仔 母語是唯細漢學起，是佇生活中練習的，不是去學校才學的。唯生活中學的母語，講著才有感情、才會煞拍，嘛才有法度保留家己族群的文化佮尊嚴。所以今仔日，除了咱甘願卜將家己的母語放速(放棄)，若無咱愛佇厝裡參序細講台語，毋(m7)通佫互阿公、阿媽用足食力的北京語參孫仔對談。尤其細漢囡仔，佇伊一暝大一寸的成長期間，教伊台灣的「囡仔歌」，互伊一面吮著阿娘的奶芳，一面聽著土地的聲嗽，過著一個快樂的童年，做一個正港的台灣人。 |