第027講─07/04/2002(四)
【標音系統:通用拼音】
主題一:用台語講笑詼
•搖錶仔
有一個定定佇外口演講的人,伊講伊咧演講的時,發現下跤聽眾的動作反應形形色色,有人恬恬仔咧聽、有人咧看冊、有人咧講話、有人咧戇笑、有人咧坐禪、有人咧盹龜、甚至擱兼流喙瀾,會使講啥乜款樣相攏有,看著誠好笑。朋友共問講,若汝咧演講的時,傷驚看著聽著啥乜樣相,伊回答講:「伊上驚看著,下跤的聽眾,不時有人咧看錶仔,煞落擱再搖錶仔」。
•愈短愈好
台灣有名大文豪林語堂有一回演講的時對聽眾講:「精彩的演講著親像查某囡仔穿短裙(迷妳裙),愈短愈好。」聽眾哈哈大笑。隔工有一份報紙刊出即段話,但是記者自作聰明,加寫一段話講「演講著親像查某囡仔穿短裙(迷妳裙),愈短愈好,上好勿穿。」後來林語堂知影了後,有感而發講:「迷妳裙愈短愈好是humor,但是上好勿穿著叫做下流」。
主題二:台灣地名的俗語
Ø 一府二鹿三艋舺四月津。一府二鹿三新莊。一府二笨三艋舺
Ø 中國、中國花漉漉:吏治不清,無從適從。
Ø 台灣人放尿攪沙袂做堆。
Ø 台灣土(塗)快焦,台灣查某快過跤。
Ø 台灣地,好袂過三代:頭代鹽薑醬醋,二代長衫拖土,三代當田賣租。
Ø 台灣無三日的好光景。
Ø 台灣錢淹跤目。
Ø 台灣蟳無膏
Ø 台北金龜,有食罔踞,無食著走過坵(區)。
Ø 台北彪(biu),無錢著溜。(來自台北的妓女趁錢真雄,像虎豹一般。)
Ø 未行台灣路,先食台灣米。
Ø 安平迎媽祖,台南伏(pak)地虎。
Ø 尾省出聖佛。
Ø 無錢人囝,毋敢食汝竹塹餅。
Ø
卜行著行絲線嶺(林口鄉),卜食著食竹塹(zàm)餅。啥乜命,敢食人竹塹餅。
Ø 府城迎媽祖─無旗(奇)不有。
Ø 金門毋認同安,澎湖(台灣)毋認唐山。
Ø 唐山出虎,台灣出番。
Ø 唐山重地理,台灣重喙嫷。
Ø 唐山過台灣,心肝結規丸。
Ø 唐山過台灣,血汗粒粒像飯丸。
Ø 基隆雨、滬尾風、台北日、安平湧。─雨濟,風大,日炎,湧猛。
Ø 基隆無城,食飽著行。─海賊搶奪財物即落跑,無法佔城。
Ø 第一好過番,第二好過台灣。
Ø 鹿港施一半,社頭蕭了了。
Ø 新竹出枇杷,東港出大蝦。
新港老虎,北港媽祖。─新港虎爺佮北港媽祖的祭典,攏鬧熱滾滾。