033講─08/15/2002(四)

【標音系統:通用拼音】

 

線上收聽

主題一:用台語講笑詼

 

逐袂著

阿成也的老母對神明真虔誠,四界佮人舉香綴拜,有神明拜甲無神明。有一擺替怹囝去廟裡,共神明求一個香灰仔保平安。啥知阿成也愛展風神,食久嫌癉(siän),走去佮人較車,一下無細膩,煞佇現場活活摔死。做老母个,想講我普通時仔,都有照紀綱咧燒香拜拜,是安怎阮囝會來發生意外,著走去揣神明理論,神明共應講:「弟子騎百五,本尊逐袂著」,所以無法度共伊解救。

 

 

•無教堂

查甫:阮女朋(搭心个)講我遐,若無「夠長」,伊著無愛佮我結婚。伊擱講「有夠長(教堂)」,婚禮才有羅曼蒂克的氣氛。

查某:阮男朋友(搭心兄)講,我若無敆(gah)「冷氣」,伊著卜踮厝裡家己裝。

 

 

死矣死矣

有一個厚緊張的人,有一擺頭家叫伊去買雞卵糕送乎客戶。店員共伊問講:壽星幾歲?伊著足緊張講:「死矣,死矣!未記得問。」


主題二:台語現代詩

 

牽手情                                                        作者:董峰政

手一牽一世人,織一張有情夢                  

雙人鬥陣行,永遠無驚惶            

兩人手牽手,天長擱地久            

有汝疼惜的日子,生活上蓋嫷                  

有汝雜唸的日子,事事嘛如意                  

結合是天意,鬥陣是福氣            

無論風佮雨,有偌爾粗                

此後牽手的道路,猶原擱遠遠遠              

汝我相愛的時間,嘛是擱長長長              

兩人牽手繼續行,行出代代翁某名           

 

歡喜的心                                            作者:董峰政

一世人作伙行,食了鹹酸苦汫                  

一句話,道真情                                 

一句愛,說分明                                 

無孤單,因為有老伴                          

無稀微,因為有靠岸                           

牽手的路,有跋倒的傷痕

牽手的路,有扶持的情份                         

日出到黃昏,我會永遠感恩                      

感恩的心,有汝相拱

歡喜的心,有汝同行                          

 

──看台南縣柳營鄉公所舉辦的「鑽石婚」活動,有感而寫。


主題三:台灣古詩詞

 

【桃花泣血】

泰雅族竹枝詞        唐守贊

溪水清澄捕有魚,       kē sùi cīng dĭng bo iu ghŭ

樹懸瓜果地陳蔬,       su hiăn gūa gòr de dīn su

族人厭倦甜酸味,       zok rĭn iàm güan diām sūan bhī

呼嘯山中獵野豬。       hō siau sān diong liap ia du

 

【台文譯】

山谷的溪水水清魚現,四界掠有(會著)魚,瓠仔(葫蘆/菜瓜)佮果子旋藤佇樹椳(ue)、塗跤的菜蔬嘛生甲滿四界。族群部落的人,對遮個酸甜滋味的瓜果,已經攏食甲飫(ui),怹上有興趣是一陣人,作伙去內山透(dàu)底拍獵喝咻掠山豬。

 

【說明】

即首詩描寫原住民泰雅族人佇曠闊的天地,過著單純、樸素的生活方式。天天過著者自由自在、無煩無惱的生活。

「泰雅族群無地比,好山好水好地理,人人佇遮真歡喜,天天過著好日子。

 

泰雅族:分布佇中央山脈北段的兩爿。

 


主題四:台灣俗語

 

Ø          海龍王無辭水:來者是客,人人好,逐項好,袂揀食的意思。

 

Ø        教歹囡仔大細:序大無好樣,序細討和尚。做一寡歹模樣,逐家煞相看相樣,風氣文化拍歹了了。

 

Ø          江湖()無行,袂出名:愛行出去,愛敢試、敢做看覓咧,才有成功的一工,才有出名的機會。

 

Ø          人無照天理,天無照甲子:人僥行失德無照倫理來行事,天(大自然)也無照四時節氣寒熱來運轉,這著是亂世的徵兆。

 

Ø          大鼎未滾,細鼎沖沖滾:大鼎、細鼎貯水作伙燃(hiăn),細鼎水滾強強的時,大鼎水猶原是聞風不動。表示有內才、有飽學的人,攏較袂隨便表現佇外口。

 

Ø          汝有汝的關門計,我有我的跳牆法:關門計、跳牆法,攏是「逃性命」的妙計;面對著的困難的時,每一個人攏會伊應變的本能,去避開災禍,所謂「八仙過海─各顯神通」。

 

Ø          食無三日清齋,著想卜上西天:真本事攏是一點一滴、一步一跤印所累積來的,世間無「一步登天」的代誌,所謂「登高必自卑,行遠必自邇」。

 

Ø          頂司管下司 鋤頭管畚箕:「貧憚仙撻予貧憚鬼,貧憚鬼搡予戶椗,戶椗搡予土跤,土跤坐咧喝」。一級管一級,做代誌相挨推,一方面展威風弄權勢,一方面卸責任。

 

Ø          趁也著趁 食也著食:提醒做人愛照紀綱,為著生活、為著腹肚,所以愛認真拍拚做工課趁錢,但是趁錢的目的是為著卜過較好的生活,所以該享受的嘛著知享受,毋通做錢奴才。