第034講─08/22/2002(四)
【標音系統：通用拼音】
主題一：用台語講笑詼
•母奶佮牛奶
一位生物老師問學生講：「母奶佮牛奶佗一種較好？」
全體學生回答講：「當然嘛是母奶較好」
老師就擱問學生講：「請講出母奶有啥乜優點？」
阿佳學生回答講：「牛奶是牛咧食的，母奶是予人食的」
阿紀學生回答講：「母奶是天然的產品，毋免經過加工處理」
阿丙學生舉手講：「母奶會當保持一定的溫度，袂傷燒嘛袂傷冷。」
阿丁學生舉手講：「母奶會當一直保持新鮮度，袂臭酸去。」
阿茂學生插喙講：「母奶方便扎(紮)出去外口」。
＊肉空對肉榫，姿勢著掠予準。頂懸抱尻川，下跤抱頷頸。─阿母飼奶
•目珠挩(thuah4)窗
目珠cù-cūh，便所看做hotel。目珠花花，瓠仔看做菜瓜。
遠看一蕊花，近看是一條菜瓜，這是叫啥貨，原來是抽象畫，痟人滿四界(gue)，佮人烏白綴(due)，活活氣死恁爸。
種瓠仔會生菜瓜，燃水也會凋鍋，吥爛也會毒(tau)死雞，閹雞也想卜趁鳳飛，電腦擱會送電子批，這是啥乜社會(hüe)？
主題二：台語現代詩
•田無交水無流 作者：董峰政
「有唐山公，無唐山媽。」
四百冬前，即塊田園
雖然有卡拋荒
生活自在，日出到黃昏
啥知
渡過烏水溝的唐山客
飄洋過海的紅毛、烏鬼佮阿本仔
濟濟人留落了怹的跤跡
語言、文化佮血統
若像雞尾酒相透濫
安爾，台灣佮中國早就
「一人一家代，公媽隨人在。」
「唐山過台灣，心肝結歸丸」
種種歷史的因單
唐山芋仔種佇台灣的田園
變成一條蕃薯、一粒塗豆
改良過五榖、水果…
田園內底滿滿是
台灣成做新品種的樂園
結合做大海洋的文化
台灣夆講是中國的一部分
即款話，親像阿媽生孫─講暢的
其實，台灣佮中國早就
「日頭赤焱焱，隨人顧性命」
「刣豬公無相請，嫁查某囝貺大餅」 (刣tăi；貺hīng)
一百冬的新婦仔，顧人怨
父母無疼、厝邊無惜
共咱鄙相甲無一塊著
講啥乜「鳥不語，花不香，男無情，女無義」
即碼煞唱聲講，咱攏是一家人，
若無相認？卜共咱搓圓佮捏扁 (搓圓sōr-ĭn；捏扁den-bìn)
一寡人頭殼歹去，
「豬頭毋顧，顧鴨母卵」。
半路認老父，喝講咱攏是炎黃的囝孫
其實，台灣佮中國早就
「一代親，兩代表，三代散了了。」
「做草笠毋驚日曝，做鱟杓毋驚泔(飲)燙。」 (鱟杓hau-sia)
咱的歹厝邊─中國
乞食閣下大願，想卜歸碗捧
咱無卜閣做殖民地的順民
咱卜做家己的主人
一個有尊嚴的台灣人
即碼，咱卜改變
「一盤魚脯仔─全全頭」的個性
從此，咱卜展現
「相分食有偆，相搶食無份」的腹腸。
台灣卜佇外頭徛起，咱愛
「家己栽一叢，較贏看別人」
•一人一家代 董峰政
一台一中兩家代，兩國關係較自在，
本土文化囥心內，台灣意識隨頓拜。
台灣毋認新唐山，金門毋認新同安，
仝心作伙結做伴，福爾摩莎有靠岸。
台灣原本主權國，滿山遍野梅花鹿，
稻香果子滿山谷，生活簡單真幸福。
唐山祖公過台灣，離鄉背井結歸丸，
平埔祖媽牽手戀，釘根台灣香火傳。
•台灣新世紀 董峰政
台灣歷史講透機，心酸目屎撥袂離。
外來政權翱翱纏，毋知家己是啥乜。
民主潮流正當時，是好是歹在家己，
政黨輪替大代誌，政權和平天保庇
毋管芋仔佮蕃薯，落塗生澶是兄弟，
共同扑拚才合理，打造台灣好地基。
台灣迎接新世紀，告別悲情的日子，
抱著希望心歡喜，共同開創好時機。
主題三：台灣俗語
Ø
無迄號尻川，毋通食迄號瀉藥：人愛認本份，愛有自知之明。無才調、無本事，著毋通為著面子、為著虛榮來做一寡超出家己能力的工課，無的足食力。
Ø
無禁無忌食百二：民間的禁忌其實足濟攏是對迷信來的，攏是因為人的無知而來，所以若犯著禁忌，其實攏是心理因素咧作怪，只要平常心看待，著無代誌。
Ø
愛嫷毋驚流鼻水：愛嫷的人，有當時仔愛付出一寡代價，比如，為著卜表現身材，衫穿較少，結果煞來感--著，一直流鼻水。換一句話：想卜嫷，是愛有本錢佮本事。
Ø
扑虎掠賊，著親兄弟：佇緊急生死的關頭，猶原是愛手足兄弟，才願意自動伸手鬥協助，解決難關。外人只不過用喙來關心來慰問而已，教人愛珍惜同胞愛、手足情。家庭的兄弟是如此，國家的人民嘛是仝款。
Ø
鴨仔聽雷：佇田裡咧搶食的鴨仔，拄著雷公熾爁的時，舉頭看天，一副莫明其妙的樣款，煞捎無總。
Ø
龜笑鱉無尾：即句勸人愛有「自知之明」，而且擱愛會曉「自我檢討反省」，毋通像龜佮鱉一般見識，攏是五十步笑百步。
Ø
大舌興喋(dih)：即句俗語的重點毋是佇一個人大舌的缺陷，主要是咧責備「無應該講話的時機，一吱喙亂亂霆」，「頇顢講話擱鬥愛講話」的人。
Ø
不三不四：指一個人毋捌三、毋捌四，講話無正經，行為無端正，人範無入流。無是一個正人君子。