039講─09/26/2002(拜四)
【標音系統：通用拼音】
主題一：台語開講/話仙/破讀
□神明歹做/為難
「無幾先錢，汝求伊亦求，毋知卜予啥人較好？
無卜做半項代誌，日也拜暝也拜，真是使人為難？」
＊人重妝，佛重扛。
＊近廟欺神，媽祖興外境
＊乞食揹葫蘆─假仙。八仙過海─各現神通
＊謎猜：紅頭師/司公，瘸手裁縫，大不孝，死袂臭。
□三長兩短
老王過生日，朋友去買雞卵糕卜共慶祝，店員問講幾歲，朋友回答講三十二歲，所以蠟條愛用三支長个兩支短个。店員聽了著紲喙講：「萬一若三長兩短，按爾我承擔不起」。
□翕相
佇邀(iōr)嬰仔室，有一位老歲仔提相機捎咧亂翕，護士小姐著好玄共伊問講，汝敢是第一擺做阿公？即位老歲仔著回答講：「毋是安爾，我早著做阿公矣，是因為這是我第一台相機，所以我來學翕相。」
主題二：台語現代詩
永遠的在地人
作者：董峰政
我出世佇蕃薯厝
後來遷徙到大灣 所以
佇西勢的時，我講我是蕃薯厝人
佇大灣的時，我講我是西勢人
佇永康的時，我講我是大灣人
來台南的時，我講我是永康人
去台北的時，我講我是台南人。
到中國的時，我講我是台灣人
到美國的時，我嘛講我是台灣人
中國、美國對我來講攏是外國
我並無機會講我是中國人
我毋敢冒充做中國人
我嘛無想卜做中國人
我認同个是家己的土地─台灣
我是永遠的在地人
(09/01/2002寫佇民視2002年台語文研討會，中壢清雲技術學院)
【附】
2000.10.19立法委員黃義交質詢有關「啥物(乜)人」，陸委會主委蔡英文公開答覆三個無仝層次的認知：第一是若以文化、歷史、血統的角度解說中國，安爾伊是「中國人」；第二對政治角度來看，「中國」容易被理解做「中華人民共和國」，安爾伊是「中華民國人」；第三對土地認同來看，我佇遮出世，佇遮大漢，佇遮讀冊、食頭路，按爾毋是台灣人，是卜叫做啥乜人？」
主題三：淺談台灣的地名(六)
【新豐區】5
□永康市(ing-kong)：
．舊名「埔羌(姜)頭」。
．台南縣人口上濟的鄉鎮市。人口超過20萬。
．十二月菜頭節。「永康菜脯，大灣查某」。
．大灣街仔的名產：塗/土豆糖。
．西勢─蕃薯厝的肉粿仔。
．古蹟：鄭成功墓址紀念埤。(鹽洲里州仔尾─六甲頂)
．謝明勳的創意：永保安康。2000.02.14西洋情人節銷售10萬2百張。
【附】：「埔」是平地之意。「羌」是鹿的一種，體積較小。「頭」是靠近海邊或水邊的「岬角」。「埔羌頭」是靠近海邊平地有鹿群的地方。
□仁德鄉(rīn-dīk)
．以二仁溪佮高雄隔界。
．保安車站：古樸風味的日式車站，徛佇保安村。
．奇美博物館：是世界三大私人收藏的藝術館。
．太子祭岳王(150年歷史)，每年舊/農曆二月十五日，按古禮祭拜(全台只有宜蘭碧霞宮、仁德岳王廟)，禮畢唱滿江紅。
□歸仁鄉(gūi-rĭn)：
．舊名「紅瓦厝」。
．明鄭時期文人雅士(陳永華)的書院、書齋紅瓦頂厝滿四界。讀書風氣盛行。
．古蹟：十三窯遺址(台灣早期窯仔業遺跡)。
．仁壽宮：創建佇明鄭時期。架設仁壽宮網路祭拜的電腦環境。
．仁德─沙崙：台灣高鐵設站處，日後成做台南都會區的出入門戶。
□關廟鄉 (gūan-bhiōr)
．舊名「香洋」。
．每年五月鳳梨節。
．籐仔工藝(竹編織手工藝)全國出名。佮苑裡(ūan-lì)「草蓆」，三義「木雕」齊名。
．關廟麵全國出名。
．山西宮迎關帝─舊曆五月初十到十三舉行。
□龍崎鄉 (liōng-giā)
．舊名「番社」。由「龍船村」、「崎頂村」合名而來。
．台南縣人口上少的鄉鎮，人口4千外人。
．清水宮：祭拜清水祖師。
．以土雞仔城出名。
．崎頂村有出名吊橋─情人橋，佮自清朝以來著有的「烏龍水/冷水泉」。
．牛埔村的奇觀─「仙人投網/月世界」。
．舉行竹筍節(以產期調整)。
【附】：台江內海
佇十七世紀中期(明鄭時代)台江內海的地理範圍，北起南縣漚汪溪口、馬沙溝，南到台南市南區喜樹、灣裡一帶。西爿被沙汕(洲)所包圍，現此時：青山港汕、網仔寮汕、頂頭額汕、安南區沿海(舊名隙子島、北線尾)、安平沿海(一鯤鯓至七鯤鯓)等；東爿沿七股鄉篤加村、西港鄉蚶西港、西港、安定到永康的洲子尾。
整個台江內海是走東南向，了後斜向西南，經府城外圍(鹽水溪、鄭仔寮、小北門、西門路到喜樹、灣裡)佮七鯤鯓相接。