第042講─10/17/2002(拜四)

【標音系統：通用拼音】

線上收聽

主題一：台語開講/話仙/破讀

□等路．伴手
 
台灣人厚禮數，親情朋友互相往來作客，攏會扎禮物相送，禮物並無貴重，攏用水果、罐頭、土產等喙食物仔，俗語講；「隔壁親家，禮數原在」。
　
早前台灣交通無方便，若卜出門拜訪親情朋友進前，攏會事先聯絡。主人家為著面子攏會佇厝無閒，僎卡腥臊的料理招待人客，另外派囡仔去路頭等親情朋友，
人客為著卜予囡仔歡喜，攏會扎一寡「喙食物仔」、「四秀仔」予囡仔啖糝，著叫做「等路」。
 人客卜走的時，一方面是答謝人客手所捾來的「等路」，另外一方面是禮貌上，歹勢予人客空手戽(ho)蹄倒轉去，主人家嘛會準備一寡「土產」等禮物贈送人客，
 遮個禮物著稱呼做「伴手」。
 
 毋管是「等路」抑是「伴手」攏叫做「手信仔」。
 
 
 
□扎兩粒枕頭
 
台灣有一間航空公司一向真注重講台語，所以空中的服務人員攏被要求講台語。即個規定對少年輩的員工，比較卡食力，怹講的台灣話，不時予人(夆)捎無總。
有一回，一位講台語的老太太提早去機場櫃台訂位，航空公司的工作人員著好心一再共伊番咐講：愛會記得「早兩個鐘頭」到機場櫃台報到，
啥知，即位老太太真正「扎兩個/粒枕頭」到機場的櫃檯報到。
 

主題二：古詩詞

秋風辭 ciū hong sŭ 漢武帝 Hàn bhu de

秋風起兮白雲飛 ciū hong kì he̊ bik ŭn hui

草木黃落兮雁南歸 cor bhōk hong lok he̊ ghan lām gui

蘭有秀兮菊有芳 lăn iù siu he̊ giōk iu hong

懷佳人兮不能忘 hūai gāi rĭn he̊ but līng bhŏng

汎樓船兮濟汾河 huan lō sŭan he̊ ze hūn hŏr

橫中流兮揚素波 hīng diōng liŭ he̊ iōng sò por

簫鼓鳴兮發櫂歌 siāu gò bhĭng he̊ huat dau gor

懽樂極兮哀情多 hūan lok gīk he̊ āi zĭng dor

少壯幾時兮奈老何 siàu zong gi sĭ he̊ nai no hŏr

【台文譯】

蕭颯的秋風一吹起的時，空中的白雲飛四散。

當草木反黃，樹葉仔一直落落塗跤，氣候變冷的時，正是北方的雁群飛轉南方歇寒的時陣。

當蘭花、菊花盛開的時，正是花蕊艷麗，花味清芳。

想起佳人/美人(心所愛的人)的面貌笑容/舉止行動，真是使人思思念念。

坐著大隻船，想卜渡過汾河。

船仔划到江中的時，江中的海湧擱不止仔大。

佇洞蕭佮品仔的演奏之下，逐家共同唱出「櫂歌」的歌謠

表面上看起來誠樂暢，其實心內充滿著哀傷，

少年的飄撇，壯年的抱負真緊著失去，面對青春不再來的衰老，使人感慨萬分。
 

【附】1992年諾貝爾文學獎得主詩人德瑞克．沃克特(derek．Walcott)：09/29/2002：「詩作佮歌曲離愈遠，作品的價值著失去愈濟。」

佇2000年得著諾貝爾文學獎得主高行健先生，佇台北講「文辭之美，不如聲音之美」，

【秋風辭人物佮故事】

人物介紹：

漢景帝(劉啟；劉嫖的小弟)；

漢武帝(劉徹/豬；劉嫖的姪仔；17歲登基，71歲過世；廢劉榮立劉徹為太子)

陳嬌(漢武帝第一任皇后/劉嫖的女兒)。

金屋藏嬌的典故：

王娡(漢景帝繼任皇后；三女一男：平陽公主/南宮公主/隆慮公主/漢武帝)

衛子夫(漢武帝第二任皇后/衛青同母異父的大姐/霍去病的阿姨)。

衛子夫(三女一男：衛長公主/陽石公主/諸邑公主/劉據/漢武帝封做皇太子)。

【故事背景】

漢武帝(劉徹)晚年驚死，所以積極派人提煉「長生不老」的藥丸。另外一方面嚴備被人暗算，特別是驚鬼神暗算(漢朝流行巫蠱之術u-gò)。

公孫敬聲(衛子夫姐姐衛君孺的兒子)貪污軍餉一千九百萬錢。同時被俠客(義賊之流)朱安世揭發罪狀，暗中佮陽石公主私通；用佇後宮埋柴頭尪(木偶/俑)巫術咒誓漢武帝緊死。

佇公孫事件，造成衛子夫皇后查某囝自殺身亡(陽石公主/諸邑公主)，大姐(衛君孺)、姐夫(公孫賀)、侄仔(公孫敬聲)，衛沆(衛青的後生)的處決。

江充將太子劉據的信差監禁，劉徹聽信江充的報告，認為伊是大公無私。佇公孫事件發生了後，漢武帝佇甘泉宮臥病在床。江充恐驚皇帝過身了後，太子劉據會對伊報復。所以計劃用「巫蠱」案來陷害太子。太子反擊，逮捕江充處死，伊的黨羽蘇文偷走，報告漢武帝，太子造反了。衛子夫皇后吊脰自殺。漢武帝下令屠滅衛家三族，另外參太子有關的妻妾、有關官員一律處決，前後數十萬人喪生。

太子劉據逃亡到莊跤，最後被新安縣縣長李壽發覺，使得劉據不得不吊脰自殺。

後來漢武帝調查出太子劉據實被逼造反。下令屠殺江充規家族，蘇文活活被火燒死。並且在湖縣起造「思子宮」，作秋風辭。