第47講─11/21/2002(拜四)
主題一：台語開講/話仙/破讀
□閩南語
•泉州話：
．西元311年北方胡人消滅西晉。漢人逃到南方，佇長江流域的建康(今南京)建立東晉王朝。另外擱有一陣漢人(號稱衣冠八族：林黃陳鄭詹丘何胡)，逃走到福建南部的一條河邊蹛(dua)--落來，後來稱呼做「晉江」，到了唐朝的時才號做「泉州」。佇閩南地區，原本是蹛的是講越語的越族，所以形成漢、越語融合的現象，以漢語為主體的一種語言，這是閩南話頭一種的腔口「泉州話」。
．泉州話保存了晉朝、漢朝、甚至擱較早的中原音。
．佇福建南部形成的泉州話，有透濫著真濟當地的越語，這是後來「白話音」的主要元素。
•漳州話
．唐朝初年(669年)，唐高宗朝廷派陳政、陳元光父子帶領軍隊、族親五千外人，來南方平定佇泉州到潮州的畬(sia)族叛亂(蠻獠之亂)，平亂了後設立漳州郡。陳氏父仔佮囝孫統治漳州差不多一百五十年，使得漳州經濟繁榮，文化大興。
．唐朝末年(878年)，唐僖宗時代天下大亂─黃巢之亂，王潮、王審知兄弟佮後生王延翰帶故鄉的族人到福建打天下，受封刺使，中原足濟讀冊人攏來投靠伊。
．陳元光、王潮攏是河南光州─固始人，佇即兩個時期(七、九世紀)，所帶來的是北方標準音─長安音，佇閩南地區叫做「漳州音」，也是「讀書音」的主要元素。
．吳沙率領漳州同鄉、家族來到台灣，後來攻佔、開發蘭陽平原，所以宜蘭人保存較純的漳州話。
•廈門話：
．廈門是漳泉港口久的一個小海島。宋朝稱呼「嘉禾嶼」，明朝稱呼「思明州」，一直攏屬於同安縣的管轄。
．廈門的地位是明末、清初才開始受著重視。
．國姓爺捌退守廈門做為抗清的基地，後來嘛成做征服台灣重要的基地。
．鴉片戰爭了後，佇南京條約廈門被英國指定做五個「通商口岸」之一，因此變成閩南地區對外貿易佮進出海外的中心。
．廈門小島的住民主要來自泉州佮漳州的移民。隨著朋友往來、生理買賣、文化交流，甚至通婚，因此「泉州話」佮「漳州話」互相影響、透濫，形成了「不漳不泉」、「亦漳亦泉」、「漳泉濫」的一種閩南話，因為廈門的重要地位，使得漳泉地區會當接受，慢慢形成了所謂「廈門話」，變成閩南地區「閩南話」語系的代表語言。
主題二：古詩詞
【黃梅調】
春宵 cūn-siau 蘇軾 sō-sīk
春宵一刻值千金， cūn-siau
/it-kīk /dit ciān-gim
花有清香月有陰。 hua
/iù /cīng-hiong /ghuat /iu im
歌管樓臺聲細細， gōr-gùan
/lō-dăi /sīng sè-se
鞦韆院落夜沈沈。 ciū-cian
/uan-lok /ia dīm-dĭm
〔欣賞〕
春天的暗暝，雖然是短短的一刻，嘛是價值千金。因為即站的花蕊上清芳，月娘嘛有一種霧霧的嫷。樓臺四周鬧熱的歌聲參管絃聲已經漸漸來消失，而且埕斗的韆鞦也恬靜無聽著人聲，因為夜色已經深沈了。
蘇東坡一生時常遭受著貶(bian)放，養成伊個人一種通達的人生觀，即款的個性表現佇詩作曠闊的意象，所以完成真濟不朽(but-hiù)的詩詞。即首「春宵」是其中的佳作。
這是一首「隨性」的詩作，詩人透過靈敏的感覺，掠(liah)著春宵的可貴，用一種對比的色彩寫出：「春宵一刻值千金」，將短短的時間佮千金結合，尤其是佇芳花、朦朧月娘的氣氛之下，「春宵」變成一種，千載難逢的機會佮貴重的物件。後兩句描寫夜深的時，夜愈深花愈清芳，月娘也愈嫷，這是詩人所欣羨(hīm-siān)的時間佮景致。
主題三：對句的俗語
◆牛散無力，人散白賊。 ghŭ /sàn
/bhōr-lat，lăng /san /beh-cat
：牛若營養不良著無力犁田，人若散赤無錢，著會想空想縫講白賊話。指某一種前提，著會造成啥款的結果。另指人若無錢，著會失去人格講白賊話。
◆目珠看粿，跤踏著火。 bhak-ziu /kùan gùe，ka /dah diorh hùe.
：目珠看著好食的粿著咧數(siàu)想，煞無顧跤著火的危險。指看著眼前的利益著卜強求，煞無顧著違法的陷阱。
◆先顧腹肚，才顧佛祖。 sīng gò bak-dò，ziah gò hut(but)-zò.
：先顧腹肚袂枵飢，才有氣力燒香拜佛。指解決生理的需求佮現實的問題，才去想宗教信仰佮追求理想的層次問題。
◆好囝毋傳，歹囝毋斷。 Hor-giàn /m tňg，pain-giàn /m-d¤g)
：乖囝、才情囝袂當延續，哪知歹囝一個一個綴咧來。指好事(康)袂當直直來，歹康煞常(siāng)在來。
◆年驚中秋，月驚十九。 nĭ /giān diōng-ciu，ghueh /giān sip-giù.
：年一到八月中秋著開始接近冬尾，月一到十九的時嘛連鞭到月尾。指時間愈到路尾，著愈緊失去的心理作用。
◆有來有往，無來清爽。 u lăi /u òng，bhōr lăi /cīng-sòng.
：互相往來卡鬧熱，無往來卡省事趁著清爽。指人佮人是雙方面的互動，著算無往來嘛無啥乜毋好，因為省事事省顛倒清閒。
◆有錢食鮸，無錢免食。 u-zĭn /ziah-bhiàn，bhōr-zĭn /bhian-ziah.
：一下有錢著大出手食鮸魚，共錢開了了，紲落來煞看人食。指開錢、做事著愛撙節，留後步，毋通「有做虎陷，無做虎撐頷(hām)」。
◆忍氣求財，激氣相刣。 rim-ki /giū-zăi，gik-ki /siōr-tăi.
：情緒穩定參人好鬥陣才趁有錢，戛袂著使性地，容易佮人發生衝突、口角。指好性地的人卡容易成功，歹性地著會人緣歹，做代誌袂順序(sī)。