第48講─11/28/2002(拜四)
【標音系統：通用拼音】
主題一：台語開講/話仙/破讀
□台語/台灣話：
廣義：指蹛佇台灣即塊島嶼的人所使用的語言，稱呼做「台灣話」，指原住民語、客家語、福佬語。
狹義：單純指福佬語(閩南語)。
(1)一百外冬來約定俗成的講法：譬如：連雅堂(1878∼1936)佇伊的「臺灣語典」自序(二)內容記載，「即碼的囡仔，七歲開始上學堂讀冊，天真浪漫又古錐，開始咿咿哦哦(i-or)唸冊歌仔的時陣，學堂的先生煞禁止使用『臺語』。另外一寡知識青年，一路迢迢(tiau)到日本留學，學習現代化的知識，勤學拍(扑)拚十外冬，完成學業轉來台灣，煞袂記得家己的母語─『臺語』。」顯然至少佇一百冬前，『臺語』已經是一個日常生活的口頭語囉。
(2)台灣上有代表性的語言：佇台灣所使用的語言人口比例是：福佬語(前身叫閩南語)佔百分之七十四、客家語佔百分之十二、北京語(俗稱國語)佔百分之十二點五、原住民語佔百分之一點五。
(3)佇西元1624年荷蘭人佔領台灣，為卜取得經濟利益，需要大量開墾土地種作，所以派人到福建、廣東沿海招募移民來台灣開墾。將故鄉的「泉州話」佮「漳州話」帶來到台灣。
(4)西元1661年4月底鄭成功父子率領蹛佇(dùa-dī)福建沿海的三萬六千大軍，前來台灣趕走了荷蘭人，鄭氏是泉州府南安縣人，泉州人佔多數，所以講話主要是以泉州話的「南安」、「同安」做標準。佇迄陣開始，「泉州話」成做台灣話的要素之一。
(5)西元1683年滿清佔領台灣的時，為著生活的因素，嘛是一波一波的唐山公來台灣討趁。移民當中除了原本的「漳州話」佮「泉州話」以外，另外「廈門話」嘛開始登陸大台北。
(6)台灣地區的住民，因為長期的相處、語言交流，形成了所謂「漳泉濫」，目前北部音著是「漳泉濫」偏「泉州腔」，南部音著是「漳泉濫」偏漳州腔。
(7)仝款是漳、泉音的透濫，佇中國閩南地區叫做「廈門話」、佇台灣地區著叫做「台灣話」。
(8)台灣話的語言層次：
．泉州話、漳州話、廈門話濫濫做伙。如：雞肉gē-bhāh；gūe-bhāh
．閩南在地語：吸收古越語：查某(zā-bhò)、(屘囝bhān-giàn)
．讀書音佮白話音濫濫做伙。如： 山水sān-sùi /sūan-zùi；十全sip-zŭan/zap-zňg
變成biàn-sĭng /bìn-ziăn
/biàn-ziăn / bìn
-sĭng/
．台灣在地語。吸收平埔族語：台灣 /斑芝 /虱目 /阿西 /檨仔 /走飆 /贌
．多樣性佮豐富性的外來語：比如：ō-do-bhài(日)；hăn-do-luh(日)；ok(英)；pub(英)；甲(荷)。
．吸收北京語(華語)：動不動；反正；再見；汝好。
．台灣本土性的語言。如：食飽未？卜去佗？正港、鴨仔聽雷、番仔刣。
主題二：說唱藝術
◆安童哥說唱：中狀元、娶嫷(sui)某、出頭天
作者：董峰政
〔踏話頭〕
來來來，照過來、照過來 ，
逐家好，祝恁無煩惱，無煩惱！
小弟名叫「安也」，哈哈！人攏叫我「安童哥」啦。
今仔日卜佇遮參逐家開講、娛樂、講笑詼。講一個長工的後生，中狀元、娶嫷(sui)某、出頭天的故事，請逐家恬恬聽我講：
〔本文〕
早前阮庄仔內有一個漂撇的少年家仔，叫做「阿平仔」，阿平仔因為厝裡散赤，老父咧做人的長工。可憐喔！所有的擔頭攏落佇阿母的手裡，阿平仔毋甘老母傷操勞，放假的時陣，攏去共(gà)怹阿母鬥相仝。
有一擺牽牛(哞哞哞…)，到曾文溪岸食草傸水，無意中看著迄個目珠大大蕊，足古錐、足有人緣的「阿惜仔」，對溪邊行過來，害伊心頭嗶噗踩(bi-pok-cài)
做人是我最榮幸，看著阿惜好光景
原來心內合意伊，趕緊回家表分明
我若愛某著拍拚，趕緊過江見阿娘
阮娘一向爻疼囝，叫伊派人講親情
阿平仔，也無想講家己是啥乜身分，暗中去sàn著迄個吳醫師的千金─「阿惜仔」，人講「閹雞趁鳳飛」，我看伊是「戇狗數(siàu)想豬肝骨」，「落雨毋驚土跤滑」。阿平仔嘛無袂放棄，堅決卜用誠心共伊逐(riok)甲著，：
一尾好魚毋食吊，走入江中尾直搖。
掠汝袂著予汝笑，堅心做網拋甲著。
想袂到阿惜仔，煞也予阿平仔的誠懇感動著，嘛合意佇心肝內，講伊「人嫣(ian/en)，肚臍大掔(kian/ken)，柱仔子無半掔」，毋插伊啥乜「門當戶對」的世俗，真是「好額散赤無地比，愛(合意)著卡慘死」。瞞著厝裡的人，偷偷參阿平仔約會，阮即個庄跤一大堆嬸婆仔攏「九喙十尻川」，無代誌愛盤閒仔話。講出阿平佮阿惜，兩人偷偷約佇甘蔗溝，予人創治的笑詼代：
佮君約佇甘蔗溝，蔗葉拍結做號頭。
夭壽啥人共阮敨，害阮一人淪一溝。
俗語講「歹竹嘛會出好筍」，雖然是長工的後生，阿平仔認真讀冊嘛成將才，庄仔內第一個考稠「頂港有名聲，下港有出名」的蕃薯仔大學，庄裡的人，感覺誠有面子，同齊出錢倩布袋戲來盤演，擱是倩「雙棚鬥」，予怹「仙拚仙，拚死猴齊天」，庄仔頭佮庄仔尾四界鬧熱滾滾，來慶祝阿平仔「中狀元」。
無偌久，阿平仔卜上北去讀大學，阿惜仔看著阿平仔卜離開身軀邊，一時煞毋知卜如何？為伊的學業佮前途，只好含(gām)著目屎，目珠金金看著阿平仔離開故鄉，伊共阿平仔送予伊的批信佮禮物，一重擱一重包甲好勢溜溜：
阿君卜轉阮卜留，留君神魂用紙包。
等君去後提來敨，日日見君佇阮兜。
俗語講：「男大當婚，女大當嫁」，雖然一個是長工的後生，一個是醫生的查某囝，但是佇即個自由戀愛的時代，愛情是無分階級的，少年的若有意愛，做序大人攏嘛愛共怹贊成。兩人自安爾結了好姻緣。
一欉好花黃瓜桃，一身好佛媽祖婆。(
男 )
媽祖大興姑娘拜，卜拜婚姻卡緊來。
阿哥實在真厲害，小妹心事汝也知。(
女 )
阿哥汝若有意愛，決定嫁哥做太太。
阿平的老母無棄嫌我「安童哥」是一個草地人，邀請我去食喜酒。予我一下歡喜，昨暗睏規暝，透早天未光就起床，一心一意趕到麻豆庄，綴「阿平仔」去接新娘，看鬧熱順紲講好話。
新娘來啊、放炮、放炮：
炮聲若霆，囝孫仔起厝兼蓄田。
炮聲若響，囝孫仔前途無限量。
新娘行到門跤口時陣，我喙著唸：
行到厝大埕，予恁一家會出名。
行到厝大廳，予恁一家有名聲。
新郎手牽予好，新娘早做老母。
新娘聊聊仔行，明年緊做阿娘。
中晝到矣，人客挨挨陣陣來，卜來食長工的狀元後生「阿平仔」的喜酒，俗語講：「天頂有天公，地下有母舅公」，阿平仔的母舅公，食甲一個面若紅關公咧，著始喝聲囉：
乾杯！乾杯！
親情朋友捧酒杯，趁錢若那像錢樹咧開花。
酒杯捧峘峘，生囝生孫中狀元。 (峘gŭan)
酒杯捧下下，翁某趁錢無地放。 (下gē)
酒杯捧過來，祝恁逐家大發財。
酒杯捧過去，祝恁逐家有福氣。
九嬸婆仔輸人毋輸陣，輸陣著歹看面，嘛喝講：
用菜！用菜！
逐家愛用菜，新娘嫁著好翁婿。
逐家飲燒酒，新郎娶著好牽手。
酒菜大喙吞，新娘嫁著好郎君。
燒酒真正芳，新娘嫁著才情翁。
最後換我即固安童哥，嘛起來喝聲，祝福即對新人：
一代乾坤，兩姓合婚。
三元及第，四子千孫。
五子登科，六甲進士。
七子八婿，八仙過海。
九門提督，十家團圓。
【煞尾】
阿平阿惜訂良緣
夫妻同行心意堅
清風送走雙飛燕
兩姓有情送璧聯
我的表演到遮，多謝各位
主題三：台語的語法
□動詞的「相疊詞」：
(1)直接相疊的單音節動詞，表示淡薄仔、小寡仔的意思。
嗽sau→嗽嗽(有點咳嗽) 喘cùan→喘喘(有點喘)
氅cang→氅氅 (毛髮有點豎起) 笑cior→笑笑(帶點笑意)。
(2) 單音節的動詞相疊了，附加助詞「leh0咧」，表示乾脆/決定的意思。
講gòng→講講咧(講一講)、 行giăn→行行咧(走一走)、
走zàu →走走咧(跑一跑)、 穿cīng →穿穿咧(穿一穿)。
(3)單音節動詞接單音節的補語，補語相疊，表示動作結果的全面：
hiān
kui 掀開 → hiān khūi khui 掀開開(完全掀開)、
ziah liàu 食了(吃完)→ ziah
liāu liàu 食了了(全吃完了)、
cūan
biān 僎便(準備好)→ cūan bian biān 僎便便(準備得很好) 。
giān
tau 行透(走遍)→ giān tàu tau 行透透(到處都走遍)、
hor
lī 好離(痊癒)→ hor li lī 好離離(完全康復)、
(4)單音節的動詞接輕聲，動詞詞根相疊，表示動作的迅速佮結果的全面：
hian
kui0 掀開 → hiān hian kui0 掀掀開(很快全掀開)、
zià
ki0 食去(吃完)→ ziah zià ki0 食食去(很快全部吃完)、
iorh
diorh0 約著(猜中)→ iàrh iōrh diorh0 約約著(很快全猜中)。
gòng
pua0摃破(打破)→ gòng gong pua0 摃摃破(很快全打破)、
(5)單音節的動詞接雙音節的補語，所謂「三音節複合動詞」，動詞詞根相疊，表示動作的快速佮結果的全面：
kǹg hor
se 囥好勢(放好)→ kǹg kng hor se
囥囥好勢(很快全放好)、
kia
gūi băi 徛歸排→ kia
kiā gūi băi 徛徛歸排(很快全站成一排)、
gòng cuto
laio 講出來 →gong gòng cuto
laio 講講出來(很快全講出來)。
(6)雙音節動詞(兩個意思相倚的單音節)，所謂「並列式複合動詞」。第二音節相疊了，擱再接附加助詞「leh0/咧」，表示快速完成動作的意思：
siū
lì 修理 → siū li lì leho 修理理咧(快點修理好)、
iū
cāt 油漆 → iū cat cāt leho 油漆漆咧(快點漆好)、
zing
lì 整理 → cing li lì leho 整理理咧(快點整理好)、
hàu
go 孝孤(吃) → hàu go go leho 孝孤孤咧(快點吃飽)。
(7)雙音節動詞(兩個意思相反的單音節)，兩個動詞詞根分別相疊一遍，即種詞義表示動作一直反覆：
lāi
ki 來去(來往) → lāi lāi kì ki 來來去去(經常有來往)、
cut
rip 出入(進出) → cut cut rip rip 出出入入(進進出出)、
ki lorh 起落(起伏)
→ ki ki lorh lorh 起起落落(起起伏伏)。