第51講─12/19/2002(拜四)
【標音系統：通用拼音】
主題一：台語開講/話仙/破讀
1謎猜：
1-01無跤會走，無喙會吼，無尻川會捙畚斗─海湧
1-02我的手攬汝的腰，汝的尻川放乎火燒─點薰、食薰
1-03紅布包白布，一喙食一喙吐─(食)甘蔗
1-04半天起一間廳，起甲無「鑿仔」聲。─鳥仔岫
1-05樹頂一塊碗，雨來貯袂滿。─鳥仔岫
1-06九橫六直，孔子公想三日。─晶
1-07一坵田鬆鬆鬆，幾蕊花紅紅紅。─香爐
1-08二姊妹仔，平峘平大，一個佇內，一個佇外。─照鏡
1-09公仔峘，婆仔矮，公仔放尿予婆仔貯(dè)。─漛(tīn)茶
1-10有聽著聲無看著影，有滋味無鹹汫。─放尿
1-11一支矸仔，貯兩粒烏棗，日時開，暝時鎖。─目珠(ziu)
1-12一欉樹仔，兩片葉，斡(uat)來斡去看袂著。─耳仔
2吱(激)骨仔話：
2-01滿面全痘(tiāu)仔子─貓、鱉、豹
2-02虎豹象─欠獅
2-03矮人爬厝頂─欠梯
2-04乞食做忌(gī)─無半撇
2-05十全欠兩味─八珍
2-06一盤魚脯仔─全全頭
2-07保護三藏取經─著猴
2-08胡蠅戴龍眼殼─蓋(kàm)頭蓋面
2-09胡蠅跋落肉燥鼎─滷死
2-10火車行到阿里山─盡磅
2-11缺喙的食米粉─看現現
2-12火燒墓仔埔─薰鬼
2-13甘蔗規枝囓(ke)─無斬節
(三)俗語
3-01先生無佇館，學生起海反。
3-02一隻喙吱吱霆，尻川予人犁田。
3-03無名無姓，去問鋤頭柄。
3-04有錢烏龜坐大廳，無錢秀才通人驚
3-05睏破三領蓆，翁的心肝摸袂著
3-06嫷花佇別人欉，嫷某佇別人房，嫷查囡仔過路人
3-07教豬教狗，不如家己走。
3-08食袂著硞硞綴，食了嫌漚貨。
3-09一某無人知，二某相卸(捨)代。
3-10腹肚若碇(dīng)，目珠皮著冗。
4-0雙關語/倒反話：
4-01食飽未？─汝該(共伊)問看，伊食飽未？
4-02好勢未？─攏好勢矣！
4-03安心仔倒轉去
4-04迄(hit)塊桌的人，攏食無偌久矣！
4-05三人共五目，日後無長短跤話。
4-06目珠「光去」，跛跤「行去」。
4-07有─有o
主題二：答喙鼓
■1234唱袂離
阿安、阿憲上台一鞠躬
憲仔：做「喙內踅踅唸！」的動作
un deux trois quarter cinq
(法語)
安仔：憲仔，我看汝，一支喙咧踅踅唸，到底是咧啥乜碗糕？
憲仔：煞毋知影，我咧練習學講外國話的數字，
1-2-3-4-5(華語) 1-2-3-4-5(英語)
1-2-3-4-5(日語) 1-2-3-4-5(法語)
1-2-3-4-5(德語) 1-2-3-4-5(西班語)
安怎，有驚一趒，無？(驚著--無)。汝看我會當講迹濟種外國話，是毋是加足揚(iāng)。
安仔：勿臭衝(cing)啊！奚干礁是喙舌皮仔外國話，有啥乜稀罕。無，汝唸台語的數字予我聽看覓(māi)？
憲仔：1-2-3-4-5(台語)，迹爾簡單，啥人袂曉，講台語我嘛會通？
安仔：無，汝敢知影台語數字的另外一種唸法？
憲仔：啥乜，台語擱有另外一種講法喔(o)？
安仔：參這也(亦)毋知影，無彩工咧做台灣人。干礁會曉展一寡「番仔話」來假臭衝(銃)(cing)。
憲仔：「有這麼嚴重嗎？」阮兜的人佮學校的老師攏嘛講，會曉外國話較有水準，以後較有出路，台灣話無啥乜好講的？嘛無啥乜稀罕的所在？
安仔：汝真是有所不知？「講予汝捌，喙鬚好拍結」，耳空摀(ò)乎利，注意聽喔：
1-2-3-4-5-6-7-8-9-10(白話音)
另外一種：1-2-3-4-5-6-7-8-9-10(文言音)
憲仔：這有啥乜差別，咱敢有安爾講？
安仔：1-2-3-4-5，是白話音，是咱普通時講話交談的話。比如：我今年13歲。
1-2-3-4-5，是讀冊音，是古早讀冊人，讀古冊所唸的音。比如：阮兜電話：(06)987-5432。所以有人講台語是雙聲道的，喙舌仔有雙港水咧流。
憲仔：我聽汝咧臭彈(蓋)，啥乜雙港水、啥乜雙聲道。我看汝是：「講的比唱的較好聽」。─凊采講講的。
安仔：無錯─歸欉好好。台語著是：「講話若像咧唱歌！」汝恬恬聽，毋通驚，講予汝知影！汝看月娘的「月」，阿月的「月」。落雪的「雪」，阿雪的「雪」。落霜的「霜」，面霜的「霜」。落雨的「雨」，風雨的「雨」。遠方的「遠」，遠路的「遠」。士林的「林」，大林的「林」。汝講台語是毋是雙聲道。擱再講台語有八聲調，比如：
東 黨 棟 督 同 黨 洞 毒
君 滾 棍 骨 裙 滾 郡 滑
衫 短 褲 闊 人 矮 鼻 直
獅 虎 豹 鱉 猴 狗 象 鹿
龜 走 免 緝 猴 走 象 掠
所以「天烏烏」3-2-3 「五千箍」1-2-3 「好佳哉」3-2-1
憲仔：哇，擱真正有樣像咧唱歌呢？台語有迹濟學問喔！
安仔：到今汝才知，今仔日拄著我，算汝有福氣。以後毋通擱講：「台語是粗俗的、無水準的、下(ge)路的，若無著是「毋捌字兼無衛生，放屎無拭尻川。」
憲仔：汝的意思是佇台灣袂曉講滑溜的台語，是無衛生的。若安爾我毋著無啥衛生？是講，安仔，汝哪會赫有衛生，捌赫濟？
安仔：因為阮有佇鄉城台語讀書會拜師學台語。
憲仔：聽--起來汝對台語擱有兩步七仔，那安爾上蓋好，最近阮老師予我一個艱苦代，叫我轉去厝收集一寡囡仔歌，而且愛會曉唱，到時卜代表阮班裡，去禮堂表演予逐家看，我實在真煩惱，汝敢會曉唱台語囡子歌？
安仔：汝又擱問著人矣(ǻ)，講著台語囡仔歌這是「母語的奶芳」，我上合意唱，自細漢哼到今，看是：
天烏烏卜落雨，阿公也夯鋤頭卜掘芋，掘也掘，掘也掘，掘著一尾旋溜嘏…
秀才秀才騎馬哢哢來，佇馬頂跋落來，摔一下真厲害…
打馬膠，黏著跤，叫阿爸，買豬跤，豬跤箍仔滾爛爛，枵鬼囡仔落喙瀾…
我是排骨仔隊，汝嘛是排骨仔隊，胸坎那樓梯，腹肚那水櫃，…
烏面撓抔，飛飛飛，逐冬飛來曾文溪，汝是阮的好人客，阮卜請汝食魚蝦。
一天一天，身軀無洗全全銑，走去溪仔邊洗三篇，毒死鰗仔魚數萬千。
憲仔：哇！偶像，偶像，汝是我心目中台語的local-king吳宗憲。
安仔：切！我才無愛做吳宗憲，伊是迄款：「食袂著涸涸綴，食了嫌漚貨」，不時攏咧想「媠花佇別人欉，媠某佇別人房，媠查囡仔是過路人」，莫怪予人譬相講「食卜死，食卜死，食食無留住址」的薄情郎。
憲仔：哈哈哈，罵得好，罵得好。咱勿學迄款歹模樣。講正經的，安个，汝看即擺，我佇學校禮堂卜表演啥乜囡仔歌較好咧。
安仔：我看著用佮數字有關的囡仔歌，來做汝表演的主題，安爾較有特色，一定會轟動的。
憲仔：我知，我知！著親像
小學生
一年的空空，二年的孫悟空，三年的吐劍光，
四年的膨風，五年的上帝公，六年的閻羅王。
阿婆也
一二三，阿婆去洗衫。四五六，阿婆去斗六。
七八九，阿婆去海口。十十一十二，阿婆沃雨走袂離。
一放雞
一放雞，二放鴨，三分開，四相疊，五搭胸，
六拍手，七圍牆，八摸鼻，九扭耳，十抾起。
一个炒米芳【佚陶歌】
一个炒米芳，二个炒韭菜，三个沯沯滾，四个炒米粉，五个走去睏，
六个食較穩，七个分一半，八个徛咧看，九个流喙瀾，十个倒咧蠕。
拍汝千拍汝萬，拍汝一千零五萬。
安仔：嗯！袂頇顢，反應誠緊，予人會阿咾得。毋過汝唸唱的，攏是逐家卡熟似(sāi)的囡仔歌，較無稀罕，我來教汝卡有變化、卡心適的囡仔歌。愛注意聽喔！
十二生肖
一鼠做頭名，二牛駛犁兄；三虎bè山崎，四兔遊京城，
五龍皇帝命，六蛇予人驚，七馬走兵營，八羊食草嶺，
九猴爻翻車，十雞啼三聲，十一狗顧門埕，十二豬真好命。
初一早
初一早，初二巧。初三睏甲飽。初四接神。初五界開，
初六舀肥。初七七元。初八完全。初九天公生。初十有食食。
十一請囝婿。十二查某囝轉來拜。十三食泔糜仔配芥菜。
十四結燈棚。十五上元暝。 (結gat)
憲仔：哇，好聽，好聽，「攏無跳針」，一下手著唸到十五，有夠厲害，而且聽起來，擱感覺誠有意思。
安仔：這無算啥！我擱會曉對(ūi)1唱到33。攏毋免摻著其他的話句。
憲仔：聽汝咧講古，敢有可能？ (敢gan/gam)
安仔：汝毋信，請斟酌聽：(交響詩3-10)
1-2-3-4-5-6-7-8-9-10-11-12 今日又是風雨微微微異鄉的都市，
13-14-15-16-17-18-19 路燈青青照著水滴引阮的悲意
20-21．22-23 青春男女，毋知自己
24-25-26 卜行佗位去？
27-28-29 啊-----漂流萬里
30-31-32-33 港都夜雨寂寞暝
憲仔：我投降認輸矣！參按爾也會變成一首歌。
安仔、憲仔：表演到遮，落臺一鞠躬。
主題三：台語現代詩
跋繳的運動埕
董 峰 政
爽股票佇台灣誠時行 (giăn)
一日常常千外億咧輸贏 (iăn)
股票市場那像跋繳的運動埕 (diăn)
買入賣出傱來傱去無時定 (diān)
行情逐日起落心驚惶 (hiăn)
緊張甲強卜無性命 (bhiān)
講奚是食人的大本營 (iăn)
台灣的股票出名通京城 (siăn)
厝邊隔壁好親情 (ziăn)
穡頭卜做無心情 (ziăn)
明牌世界咧探聽 (tian)
股票名喙無靈聖 (sian)
嘐韶話講規厝埕 (diăn)
結局攏無影 (iàn)
輸甲叫阿娘 (liăn)
無采工咧拍拚 (bian)
一寡政客歪哥心不正 (zian)
烏金勾結夭壽囝 (giàn)
移山倒海一件過一件 (giān)
家己恬恬賣甲規山坪 (piăn)
選舉的時買票著有拚 (bian)
崩盤的時陣才大細聲 (sian)
叫咱逐家毋免驚 (gian)
銀行借錢擱輸贏 (iăn)
汝看
迄款跋繳的運動埕 (diăn)
敢通擱去遐踅踅行 (giăn)
主題四：台語的語法─疊字詞(形容詞)
(1)單音節形容詞加上疊字補語，有加強形容詞詞義的功能
燒滾滾 ( sior gun gùn)、(滾燙)
冷吱吱 ( ling gī gi) (冷極了)
紅記記(āng gì gi) (紅通通)
紅嗊嗊(āng gòng gong ) (紅通通)
紅帕帕(āng pà pa ) (紅通通)
臭mō mo (càu mō mo) (臭死了)
臭gōn gon
(càu gōn gon)
(臭烘烘)
甜bhut bhūt (dīn bhut bhūt) (甜極了)
冗戽戽 (ling hò ho) (鬆垮垮)
雄biah biāh (hiōng biah/biak biāh) (凶暴的樣子)
青損損 (cēn sun sùn) (臉色蒼白的樣子)
青乓乓 (cēn biàng biang) (臉色蒼白的樣子)
(2)兩個疊字的詞根構成的「四音節形容詞」，有供體、貶損的詞義：
lī
li lak lāk 哩哩落落(邋邋遢遢) 、
mī
mi màu māuh □□□□(凹凸不平的樣子)、
gī
gi gōr gŏr 羈羈gōr-gŏr'(糾纏不清)、
ki
ki dor dor 去去倒倒(顛三倒四)、
hī
hi hò ho 稀稀戽戽'(不細心)、