台語詩
田無交水無流
田無交水無流 dang hōng-zing
「有唐山公，無唐山媽。」
四百冬前，即塊田園
雖然有卡拋荒
生番熟番徛佇田央
生活自在，日出到黃昏
啥知
渡過烏水溝的唐山公
飄洋過海的紅毛、烏鬼佮阿本仔
攏留落了怹的跤跡
語言、文化佮血統相透濫
按爾，台灣佮中國早着
「一人一家代，公媽隨人在。」
「唐山過台灣，心肝結規丸」
種種歷史的因單
唐山芋仔種佇台灣的田園
變成一條蕃薯、一粒塗豆
改良過五榖、水果…
田園內底滿滿是
台灣成做新品種的樂園
結合做大海洋的文化
台灣夆講是中國的一部分
即款話，親像阿媽生孫─講暢的
其實，台灣佮中國早着
「日頭赤焱焱，隨人顧性命」
「刣豬公無相請，嫁查某囝貺大餅」
四百冬的新婦仔，顧人怨
父母無疼、厝邊無惜
共咱鄙相甲無一塊着
講啥乜「鳥不語，花不香，男無情，女無義」
即碼煞唱聲講，咱攏是一家人，
若無相認？卜共咱搓圓佮捏扁
一寡人頭殼歹去，
「豬頭毋顧，顧鴨母卵」。
半路認老父，喝講咱攏是炎黃的囝孫
其實，台灣佮中國早就
「一代親，兩代表，三代散了了。」
「台灣毋認唐山，金門毋認同安」
認同予異鄉變「故鄉」
主體予故鄉變「原鄉」
咱的歹厝邊─中國
「中國中國花漉漉」
乞食擱下大願，想卜規碗捧
咱無卜擱做殖民地的順民
咱卜做家己的主人
一個有尊嚴的台灣人
台灣卜佇外頭徛起，咱愛
「家己栽一叢，卡贏看別人」
【註】
刣tăi。貺hīng。
搓圓sōr-ĭn。捏扁den-bìn。
喝講hùa(h) gòng。
花漉漉hūe lok-lōk。
(2003.09.19佇家中修改)
【附】
台灣新世紀 董峰政
台灣歷史講透機，心酸目屎撥袂離。
外來政權翱翱纏，毋知家己是啥乜。
民主潮流正當時，是好是歹在家己，
政黨輪替大代誌，政權和平天保庇
毋管芋仔佮蕃薯，落塗生澶是兄弟，
共同扑拚才合理，打造台灣好地基。
台灣迎接新世紀，告別悲情的日子，
抱著希望心歡喜，共同開創好時機。