好酒才會沈甕底─母語支援人員的心聲
基隆市 閩南語研習班學員 紀 春 綢
佇四、五月的時陣 , 拄好全國攏為著SARS的疫情驚甲毋敢出門 , 避甲無路通好去，我煞雄雄接著台灣母語教師協會舉辦研習班的通知單，感覺有一點仔驚惶，佇即個(ē-)時陣，有真濟活動攏停落來，連國中學科測驗嘛延期，即時陣來辦活動，敢擱有人卜(bhe)參加？講實在話，我有小可懷疑！
報到迄一工，予人感覺真意外，來參加的人員赫爾濟，我會參加是因為我知影母語協會創立的宗旨佮功能，母語協會一年來一直為阮即陣「定位不明」的教學支援人員咧爭取佮拍拚，予阮才有機會踏入校園，共母語的花欉種落去，傳承予下一代的囡仔兄，赫濟人無顧著予人傳染的危險來參加，可見逐家攏足認真、足拍拚。
佇我接著閩南語支援人員檢定通過證書的時陣，著親像先人下一道聖旨仝款，卜乎干單伸一點仔氣絲的母語緊救活起來，若無，代表咱台灣即塊土地佮族群的語言著強卜化去矣，所以搶救母語是袂當擱再拖落去。
依我個人來講，佇舊年師範大學結訓了後，為著卜擱卡充實，我相連紲參加十外個研習會，包括閩南語廣播營、布袋戲研習營、電腦研習會、雞𡦃仔研習營、兒童歇熱歇寒閩南語營，研習班、進修班我敢大聲共全國的學生家長講阮逐家攏非常認真，非常拍拚，絕對無「誤人子弟」。
佇歇熱進前有一年仔的囡仔問我：二年e有卜教無(bhoro)？我猶無知影是毋是有機會擱教落去，囡仔煞足天真e，對我講：老師，汝若無教二年e，我卜留落來讀一年仔，按爾著會當上閩南語課”，我聽著即句話真感動，毋知卜按怎回答才好！向望有關單位予阮安定的教學環境，才袂每學期結束進前，著愛煩惱後學期敢擱有機會教母語？
九年一貫的課程是活潑、多元化的教學，教育改革的跤步袂使停落來，即擺的研習，佇時間無濟的情形下，攏是針對著課堂上直接的需求來講課，不斷的創新佮求進，講師將累積多年的教學經驗來分享予逐家，著親像將激數十年的好酒搬出來請逐家啉仝款，, 希望會當繼續激出擱卡芳、擱卡好啉的好酒，一直激落去。’