喝 場

徐秀如 11/30/2001

來來來，緊來緊看，慢來減看一半，有買多謝，無買感謝，有合意的喝聲，無合意的邊仔徛(kia)。

今仔日本人來到貴寶地，毋是卜來扑拳頭，嘛毋是卜來賣膏藥，毋是卜來共恁推銷「蠻牛」，更加毋是卜叫逐家褪「口」「罩」一下！講到遮，逐家一定感覺真奇怪，即個人敢是神經大細條，打死結擱兼縛「啾啾」，毋是毋是，恁攏總共我誤會矣，奚是今仔日出門的時陣，阮阿母有交代，伊講咱貴寶地的朋友是蓋可愛，實在有夠巧，會曉打電腦、彈鋼琴、跳「健康操」，擱兼食「麥當勞」，實在是蓋爻蓋爻，交代一個問題，叫阮來請教恁逐家，雖然阮是一個頇顢、飯桶、天真、活潑、美麗又擱古錐的姑娘仔，毋過(gu)阿母交代的問題，阮嘛毋敢放乎袂記得。講規晡，講甲喙角全波，講甲烏仁轉白仁，西瓜煞看做是塗豆仁，講甲轟動阿里山，驚動萬巒豬跤，到底阮阿母交代的是啥乜問題咧？若講著阮阿母即個問題，真正是非常的寶貴，各位好朋友仔，恁著好好仔共記，對恁的未來絕對是一件福氣。煞毋知影阮母仔交代阮著共恁問啦，伊講：各位朋友仔，啊恁講台語敢會通？袂通無要緊，來食即罐「母語大補丸」，即罐青瞑e^o食落「光去」，跛跤e^o食落「行去」，癮痀e^o食落「直去」，食了絕對予汝精氣神十足，有氣力來學台語，人講食酒蓋毋好；講著薰火就焯；講著繳人著去；講著檳榔人著呸，啊若講台語，第一好，媽孫溝通無煩惱，通人都呵咾，一般講到遮，攏愛來一寡噗仔聲，鼓勵我講跡久擱袂喙礁，恁毋通看我即罐細甲罐仔，那親像無啥，人阮即罐真正是頂港有名聲，下港上出名，知名度透府城，捌貨的人攏嘛規箱搬，規箱夯(giă)，夯轉去，配白滾水，照三頓tui，汝若嫌無味，也挺好燉魚燉肉，燉粉鳥擱燉斑鴿，在汝揀，在汝ga，按怎配攏好食，逐家買轉去試食，若無影，我的擔予汝拆，我徛遮在汝打，袂閃袂徙(sùa)，講跡久，即罐到底愛外濟，敢著愛一千？毋免，敢著愛五百？毋免，一罐算汝二仔五，兩罐算汝三百箍，規箱搬，一箱二四罐，算汝兩千五，買有著俗有著，買無著真煩惱，今仔日卜來佮各位相交陪，買滿五百箍，送汝兩粒雞胿(gui)仔，轉去騙囡仔脯，超過一千箍，擱送汝真珠、珮(puah)鍊轉去送恁某，汝一個人買，阮規家共恁照顧甲好勢，現買現趁，緊來喔！