少年人的心聲(修訂稿)

江佩芳/五福國中

大人定定咧怨嘆：即碼少年愛傸無卜(bhe-)討趁。出門若拍毋見(pàng-giⁿ)，入門恬啾啾(ziù-ziūh)；毋是電腦網路拍袂離，着是電話手機講規暝，搰力佚陶(cit-tŏr)無地比，揣人la-le(拉咧)作趣味。揀食揀穿揀輕可，工課毋做賴賴趖(sŏr)，逐工擱咧喝艱苦，無攬無拈(bhōr lam bhōr ne)袂倚(ua-)靠。拄著問題所想的步數：毋是歪膏揤斜(cih-cuah)，着是戇頭戇面激怐怐(kò-ko)。

大人不時嫌阮爛，講阮頇顢擱貧憚，毋(m)捌代誌傷幼稚，跤軟手軟無志氣。喙裡踅踅念(seh-seh liām)講規堆，人生道理滿滿是，總講一句，四界危險袂使去，無卜鼓勵阮去試。阮着規氣激槌槌(tŭi)，予怹無閒甲半小死。

大人勸阮迹大漢，食穿毋免擱予人操煩。阮着提錢妝乎媠，頭毛電甲金熠熠(sīh)，去食漢堡啉咖啡。轉來怹煞吐大氣(kui)，管衫管褲管胭脂，嫌講落肚臍擱落大腿，紲落頭毛若螺絲，橫直逐項攏無合意，嫌東嫌西嫌甲死。

毋是故意來激氣，是怹看阮無起。連鞭講阮像大人，會使自由去活動(dāng)，毋過(gor/gu)驚阮跤步錯，事事項項放袂落。又擱愛聽怹放屁，親像囡仔咧相隨，逐項代誌聽怹裁決，教示記心才會使。阮着毋知按怎是，心情沉重無了時。厝裡恬恬免相諍，外口佮人鬥陣好作伙，朋友體貼無地揣，話天擱說皇帝；抑是四界烏白踅，免惹序大人發性地，逐項放乎麻西麻西，繼續傸落去上好勢。

一人講一項，無人講相仝 江佩芳

大人定定佇怨嘆：即馬少年愛爽無討賺。出門若拋去，入門恬（cit4 cit42）；毋是電腦網路扑袂離，著是電話手機講規暝，矻力佚陶無底比，揣人拉咧作趣味。揀食揀穿揀輕可，工課毋做懶懶趖，逐天閣咧喝艱苦，無攬無拈袂偎靠。拄著問題想撇步：不是歪膏揤斜目喙笑，著是憨頭憨面激怐怐。

序大不時嫌阮爛，講阮頇顢閣貧憚，無捌代誌傷幼稚，跤軟手軟無志氣。喙裡什念講規堆，人生道理滿滿是，逐位危險袂適去，毋敢放手乎咱試。阮著歸氣激槌槌，乎怹無閒做甲死。

父母勸阮遮大漢，食穿毋免人來銓，阮著提錢妝乎媠，頭毛電甲金熠熠，去食漢堡啉咖啡，轉來怹煞喘大氣，管衫管褲管胭脂，連鞭這物件無元氣，紲落頭毛若螺絲，反正逐項毋甲意，嫌東嫌西嫌卡死。

毋是故意來結氣，是怹先看阮毋起。連鞭講阮像大人，會使自由去發欉，毋拘驚阮跤步錯，事事項項放不落。又閣愛阮聽怹的喙，親像囝仔咧相隨，逐項代誌愛怹裁，教示記心才會使。阮著無知安怎是，心情沉重無了時。厝裡恬恬免相諍，共人話仙講詳細，朋友體貼無地揣，作夥講天閣講地；抑是四界烏白踅，免惹序大發性地，逐項放乎馬紗馬紗，逐工去爽尚好勢。