拍開母語教學的門窗

吳百祿/高雄市小港國中校長/2000.07.01

佇即波教育改革中，「教育本土化」佮「教育國際化」會使講是逐家足熟似(sik-sāi)的教改術語。教育本土化的宗旨是促進學生了解家己的生活環境、歷史文物、自然環境、傳統藝術佮文化，紲落來疼惜鄉土，開創光明的遠景。教育國際化宗旨是提升學生的國際視野，開創學生的世界觀；毋過卜達成教育國際化的目標，上蓋重要的代誌愛先落實教育本土化，做好鄉土教育，予學生對(ùi-)熟似佮寶惜即塊土地的環境開始，涵養鄉土情懷，擱進一步培養愛家、愛鄉、愛國、愛世界的人文視野佮廣闊的心胸(hing)。

教育本土化確實誠重要嘛有時代的意義，因此主管教育當局足重視鄉土教育的推動，其中落實到國民中學的部份主要包含：對國中一年級開設「認識台灣」課程(分歷史篇、地理篇佮社會篇)；增設「鄉土藝術活動」科目；佇歷史、地球科學、團體活動、生物、童軍教育、音樂、美術等科目的新修訂課程標準中，共(ga-)各相關的鄉土教材，吸收佇各科教材綱要中，抑者是明定教師應配合各地區的特性，適當應用本土教材作補充資料。

毋過(m gor)，鄉土教育的推動袂使干礁限制佇鄉土教材的增列佮補充，嘛仝款愛重視鄉土語言的研究、整理佮推廣。即碼為著卜走揣阿娘的話，主管教育當局開始重視母語教學，尤其本市謝市長共母語教學列為重要市政建設之一，而且指示教育局積極推動客家語、福佬語佮原住民等語言教學。本校佇八十八年九月奉命指定為本市推動福佬語的重點學校，著積極辦理本市的初級、中級福佬語教學研習會，培育福佬語教學師資。並且舉辦足濟擺有關福佬語教學觀摩會，促進教師福佬語教學知能，經過佇本校掖種(ia zìng)了後，會當佇各校釘根、生澶，向望予咱的子弟早一日來鼻著「母語的奶芳」。

本校一冬來積極辦理福佬語研習，投入真濟心力，謝市長佮教育局曾局長嘛佇八十九年正月蒞校訪視福佬語推廣成效，為本校帶來一陣研究福佬語的風氣。佇即股風氣的帶動之下，本校鄉土語言教學擱卡有活力，阮有信心會成做高雄的模範佮開創母語的風氣。

為著卜教學相長，佇教務孫主任玉燕的策劃下，教學組宋組長鳳英的執行，阮開始著手福佬語鄉土教材的編寫，藉此促進鄉土文學的創作力，落實福佬語教學的執行力，會當予小港國中佇台語的花園內底散發母語的芳味，發揚「台語之美」。

今仔日佇遮特別感謝董峰政教授的指導以及沈嫈緬老師、陳雅君老師、張簡慧宜老師、梁麗珍老師、蔡碧霞老師、黃清興老師、羅淑芬老師的熱情參與，以及教學組宋組長鳳英的協助執行，為本校拍開母語教學的新紀元。

最後，向望各位關心鄉土語言教材的先進，無棄嫌共阮指教佮鼓勵，嘛希望藉著阮對推動母語教育的棉薄之力，會當帶動福佬語豐沛(pōng-pai)創作的成果，予咱逐家鬥陣來塑造台語教學的春天。

校長 吳百祿 謹識