|
記「鯤島本土文化園地」(台語文) |
|
撰文：董峰政 |
|
「認識台灣」目前是社會各界討論的話題，會使講是一門「顯學」。過去台灣的教育有足(ziok)大的偏差，佇大中國主義的情結之下，咱台灣的讀冊囡仔(ghin-à)，對中國二千外冬的歷史人物，親像熟似人(sik-sai-lăng)，但是對台灣四百冬來的歷史祖先，卻親像生分人(sēn-hun- lăng)，毋知影家己的源頭，致使台灣人干礁(gān-dā)知影家己是「炎黃子孫」，煞無了解家己真正的身分是「唐山公佮平埔媽」結合的後代。滯佇(dùa-di)台灣熟似遙遠的「長江、黃河水」，卻不知(dī)「台江、運河水」。咱的青少年輩，會曉講足標準的北京語，但是無法度完全使用家己的母語(閩南話、客家話、原住民話)來參厝內的序大─阿公、阿媽開講，家庭的親情倫理受著嚴重的破壞。歌謠只唱「中華民國頌」、「梅花」，卻不知「寶島頌」、「菅芒花」。文學只讀古早的「詩經」，嘛毋知台灣文學有優美的「台灣國風─褒歌」…。總講一句，生活佇台灣即塊島嶼的子弟，頭殼內貯(dè)的攏是「十三天地外」的物件，台灣人親像活佇水上一般，隨風漂浪，莫怪足濟人對即個(zit-ē)家園無認同，對即塊(zit-dè)土地無疼心，台灣無法度成做一個「命運的共同體。」原因著是人民對台灣本土文化的認識無夠所致。 因為頂面所講的因素，所以予我想著用目前上蓋流行的電腦網路，來推廣本土文化的知識，透過「首頁」(Homepage)多媒體的表現方式，予有興趣的人，會當佇網路頂懸(gǔan)揣(cue)著有關本土文化的資料，所以特別製作「鯤島台語文化園地」，整理編寫一寡「歷史、歌謠、褒歌、童謠、歌仔冊、古蹟。台語文作品…」等單元，提供有心人、有興趣的人參考研習之用。 今仔日「鯤島台語文化園地」正式對外發表，內底的資料量其大約有五十萬外字左右。我的向望(ng-bhāng)是，透過即個網路的推出，來證明台灣是有文化的、台灣文化是有水準的，台灣文化的古老性、典雅性、豐富性，是袂當容允予別人隨便來輕視的。逐家重新來認識台語文的媠(sùi)，並且共同來發揚台灣本土文化，予卡濟人來認同台灣。若按爾，咱卜建立以台灣為主體性的文化，著毋(m)是咧做眠夢囉。 「鯤島台語文化園地」首頁的製作過程，蕭淑華小姐一直咧鬥跤手，伊出足濟時間佮精神佇美工方面，即個首頁會當完成，會使講完全伊是上大功勞者。另外感謝南都電台張忠武台長、蔡宛蓉小姐、文森、阿勝、電算中心萬金生主任、圖書館劉庸英小姐等，所提供技術支援佮精神鼓勵，並且記佇我心肝內底。最後向望有興趣的朋友，有閒的時會當入來園地行行看看。多謝！努力(lo-lat)！ |