答喙鼓─台灣歌謠蓮花化身
董
峰
政
安个：人講春寒秋後熱，算來無久著會煞，
君來做田娘做岸，卡贏富貴做大官。(套調桃花泣血記)
(一面唱一面跳舞)
憲个：安个，汝是咧唱啥乜碗糕，即首是啥乜調，我那像毋捌聽過即個調。
安个：拄才我唱的是台灣有史以來，第一首台灣創作歌謠，佇1932年日據時代所發表的，叫做「桃花泣血記」，我共改唱卡輕鬆的調，佮原本迄種悲情的旋律，已經大不相同囉。
憲个：無，原本是按怎唱eo？
安个：原本是描寫一對互相意愛的青年男女，因為受著社會、家庭的反對，袂當結(gat-)作伙，只好用自殺方式來表明心意。所以非常悲情。
人生親像桃花枝，有時開花有時死，花有春天再開期，人若死去無活時。
紅顏自本多薄命，拆散兩人的真情，運命作孽真僥倖，失意斷送過一生。
真是苦袂了，所以我共改卡輕鬆，代表台灣卜告別過去的悲情。
憲个：嗯，講了有道理。啊着啦，安个，聽講汝最近得著台灣歌謠比賽第一名，敢有影？
安个：無錯(無趖)─規欉好好，風吹袂倒。會得着第一名，是因為無啥乜對手的關係，所以目珠瞌瞌着(dorh-)提着(diorh-)頭名！
憲个：臭屁安仔，汝又擱咧臭屁囉，汝即款的跤數(kā-siau)也會着名，這一定是「機關囥佇倉庫」
安个：啥貨？「機關囥佇倉庫」，無，汝是咧講啥乜碗糕？
憲个：我是講這「其中必有緣故」！講正經的，到底是有偌濟人參加比賽？
安个：煞毋知影報名參加的人，攏總干礁(gān-dā-)有兩個人，到比賽的時陣，另外迄個擱落跑棄權，最後伸我一個，毋才會着第一名。
憲个：原來如貓(如此)，即款的代誌，也會來發生！
安个：煞毋知影，即碼少年攏認為唱台語歌「有夠倯(sŏng)」，無啥水準，所以無愛學台語歌，嘛無想卜唱台語歌，所以才會無人報名參加，哈哈，煞予我抾(kiòr-)着第一名。
憲个：汝真正是好狗運。請問，汝的台語歌攏參啥乜人學的(eo)？
安个：我細漢佇庄跤參阿公、阿媽蹛作伙的時，一日到暗攏嘛聽一寡旋律優美的台語歌。聽一下久，感覺愈聽愈好聽，愈唱愈有味，自然地歌詞、旋律著記佇頭殼內。憲个，汝敢會曉唱台語歌？汝上愛聽佗一首？
憲个：安个，聽汝的口氣，有意思卜共(ga-)我挑戰，歹囝囡仔愛「較車gà-cia」來臭銃，我看今仔日，咱兩人着來較(gà-)一下台語歌，拚一下輸贏，看是卜死豬哥抑是卜是豬母。
安个：汝真正是「落車頭無探聽」，食著「好膽藥仔」，竟然敢對我挑戰，真是「七月半鴨仔─毋知死活」、「胡蠅戴龍眼殼─蓋(kàm-)頭蓋面」，看來，我今仔日若無展兩三步仔，煞予汝當做「三跤貓」。
憲个：唱着唱，講講赫濟，我嘛無咧驚汝，今仔日汝即個第一名，我看到時會變做尾仔算來第一名，到時汝着「滿面全豆花」。
安个：今仔日我只好「十二月屎桶─盡拚」，若無予汝輸甲土土土，三字土黏作伙，我看汝是袂甘拜下風的。
憲个：我看咱著來訂一下仔比賽的規則，由家己選一首台語歌曲，請對方唱一段原本的歌詞，紲落來才由選歌曲的人自編歌詞來唱一段，汝看按爾好無(bhoro)？
安个：我看這毋是干礁咧唱台語歌爾爾(nia-niā)，兼考台語歌詞的創作，我是經過鯤島台語訓練班卒業，當然嘛無問題，只驚到時汝「雞喙變鴨喙」？
憲个：規則是我訂的，當然我是有把握，而且我嘛是「府城」台語訓練班出身，毋是「紅目吁(ū)仔─鬥鬧熱」，金光猶原沯(ciang)沯滾。即碼請汝跤碼徛乎在，我卜出招囉，代先請汝唱出府城的代表歌謠「安平追想曲」。
安个：好！「請君為我傾耳聽」
憲个：汝是咧講啥乜「佛仔話」
安个：無啦，我是講請汝耳空摀乎利！
安平追想曲
身穿花紅長洋裝，風吹金髮思情郎，
想郎船何往？音訊全無通，
伊是行船誅(dū)風浪，
放阮情難忘，心情無地講
想思寄著海邊風，海風無情笑阮戇，
啊…毋知初戀心茫茫。
憲个：嗯！唱了「袂bhài(賣壞)─留好eo」，紲落來嘛請汝斟酌聽。
想起迄日的情形，愛人講阮無正經，
一時心頭凝，目屎滴無停
熱情珠淚被吹冷
即款的情景，實在真不幸
親像海水起大湧，心內猶原捙跋反(bìng)。
啊…毋知何時見光明
(磅一下短命短命，磅一下短命短命)
想起迄日的情景，收著紅單卜做兵，
離別心怎肯，搭心有叮嚀，
叫阮心肝放乎清，
出操真無閒，時間無夠用，
緊急集合三分鐘，隨時準備卜戰爭，
啊…毋知何時會完成
(磅一下短命短命，磅一下短命短命)
安个：過關！真是「烏矸仔貯豆油─無地看」，對(ùi)頭到尾攏押仝韻，無簡單。紲落來，換我卜出招囉！請汝唱出打狗代表性的歌謠「港都夜雨」
憲个：好，請汝恬恬(diam-)聽，毋通驚？
港都夜雨
今日又是風雨微微，異鄉的都市，
路燈青青照著水滴，引阮的悲意，
青春男女毋知自己，卜行佗位去，
啊…漂流萬里，港都夜雨寂寞暝。
安个：唱著，擱有淡薄仔「臭尿潑味」。換我囉！
今夜看著月亮天星，浪漫的城市，
有緣作伙吟唱歌詩，憂秋隨風去，
心情輕鬆歡歡喜喜，過著好日子
啊…快樂暗暝，南瀛風情合人意。
憲个：「嫷！滸(hō)起來滴水」。悲傷的歌調，予汝改一個變做快樂的暗暝，確實有兩步七仔。過關！
安个：安爾唱，擱不止仔心適。紲落來，換我出招囉，請汝唱出「有也花，無也花」。
憲个：那有即款歌，我看是「目珠覷覷cù-cūh」，便所看做hotel；目珠花花，瓠仔看做菜瓜。」
安个：我是刁工激(gik-)「話仔仁」，著是有名的台灣歌謠「雨夜花」。
憲个：即首歌三歲囡仔嘛會曉唱，對我來講，那像「桌頂拈gam」，請聽我唱來。
雨夜花
雨夜花，雨夜花，受風雨吹落地，
無人看見，每日怨切，花謝落塗不再回。
安个：換我唱改編的歌，先唱兒童版，才唱大人版：
〔兒童版〕
春天到，百花開，紅薔薇白茉莉，
即爿幾蕊，迄爿幾枝，美麗景色合人意。
〔成人版〕
卜娶某，卜娶某，娶甲即個痟查某，
目珠吊吊，尻川翹翹，親像雞公嗶噗跳。
卜嫁翁，卜嫁翁，嫁甲即個老大人，
目珠吐吐，喙鬚糊糊，親像會社煙筒箍。
憲个：安个汝著是攏唱唱即款歪歌，莫怪汝飼袂大，
安个：「有這麼嚴重嗎？」，唱歌娛樂解心悶，毋免傷過正經。無？會帶內傷。汝敢擱有啥乜撇步。
憲个：當然嘛有，注意聽！請汝唱「望春風」來聽看覓！
安个：即首袂輸像台灣的「國歌」，啥人袂曉？
望春風
孤夜無伴守燈下，清風對面吹，
十七八歲未出嫁，撞著少年家， 撞著(dng-diorh-)
果然標緻面肉白，啥家人子弟？
想卜問伊驚歹勢，心內彈琵琶。
憲个：我甘願即首是咱的國歌，嘛無愛迄首「煠(sah-)麵、煮麵，穩當妥當，一戰(ziàn)無顧，已經踏檔」做國歌，因為擱卡安怎聽，安怎唱，嘛無法度感受著台灣的精神。勿擱講遐(hia)的「有空無榫。有嘴(sui)無綰(gūan)的話。換我來編即首歌詞：
人生七十才開始，八十無稀奇，
九十街路滿滿是，一百笑嘻嘻。
六十猶原是幼齒，五十是紅嬰， 嬰in
四十睏佇搖笱裡，三十今出世。 笱gŏr 今dan
憲个：若安爾，我毋著猶未出世？即首歌曲改了真趣味。
安个：看來咱兩個實力「差毋多(客家語)」，「棋逢敵手」「半斤八兩」，我看咱擱換一個方式來比賽。汝看按怎？
憲个：我是「水來土淹，兵來將擋」，「半暝仔食凊(cìng/cìn)飯咧等汝」，據在汝來無問題。
安个：看汝激甲親像「土地公毋驚風颱」。
憲个：啥乜意思？
安个：「老神在在」。好，煞落來，咱來用台灣歌謠七字仔調，來改編好無？憲个，汝敢知影台語有啥乜七字仔調？
憲个：我當然嘛知。無，卜那敢踮遮(diàm-zia)參汝喋(tih)規晡，汝是毋通看我「殕殕(pu-pù)」，無，我是會看汝「霧霧」。比如：「心酸酸」、「雙雁影」、「三聲無奈」、「五更鼓」、「六月茉莉」、「宜蘭人」、「南風謠」、「台東調」、「花宮苑」、「狀元樓」、「留傘調」等攏嘛是，講予汝捌，喙鬚好拍結。
安个：參這汝也知，真是無簡單。即碼，咱著選「七字仔調」的台灣歌謠，先由對方唱原本的歌詞，才擱由家己唱改寫的歌詞。即碼，請汝唱「雙雁影」。
憲个：「大丈夫dăi-riò-bhu」無問題：
秋風吹來落葉聲，單身賞月出大埕，看見倒轉雙雁影，傷心卜吼驚人聽。
鴻雁那會迹自由，雙雙迎春又送秋，因何人生袂親像，秋天若來阮憂愁。
安个：通過，請聽我所改編的「「雙雁影」
母語毋講真正害，主人毋做做奴才，即款情形為啥代，外來政權來阻礙
政黨輪替頭一擺，珍惜民主愛忍耐，族群相處著和諧，創造台灣新時代
憲个：過關，換我出招，請汝唱「搭車調」：
安个：多謝汝的牽成提拔，請聽：
〔搭車調〕
台北搭車漸漸歇，舉頭看見鶯歌石，坐在車內一直搖，干礁愛人看袂著。
彰化嘉義過了後，古都台南已經到，心內一時亂嘈嘈，何時佮娘會透流。
台南坐到高雄港，佮人落車心茫茫，今日雙人分西東，日後望娘相疼痛。
憲个：歌詞有「古都、台南」「港都、高雄」真有意思。擱來，請聽我改編的歌詞：
台灣原本南島族，滿山遍野梅花鹿，五榖果子滿山谷，生活簡單真幸福。
台灣真是好所在，氣候溫和人人愛，景色美麗通人知，朋友相招作伙來。
南瀛徛起的所在，囝孫一代過一代，台南四界全人才，建設家園同齊來。
安个：猶原無法度拚峘下呢，我看最後無用即帖「白虎湯」，是無法度解決代誌。
憲个：「白虎湯」？啥乜(mih)叫白虎湯」，我知影有「四神湯」！
安个：「四神湯」？煞毋知影汝想卜孝孤嘟（du）。？「白虎湯」當做「四神湯」，真正是「阿婆仔放尿─大差」；「三十八加零點五─三八甲有伸」。
憲个：無，是啥貨？毋著，講來聽看覓(māi)咧！
安个：「白虎湯」著是所謂「強心劑」，最後的撇步。
憲个：我知影，著是「拚生死」的意思。總講一句著是「拚輸贏」，好，做汝來無問題。
安个：即碼，我卜用阮老爸囡仔時代做學生的時無唱袂使(bhe-sài)，所以上蓋流行的國語歌「反共抗俄」，即首歌是過去的執政黨用來洗腦用的歌，阮老父擱講：早前寫作文的時，毋管寫啥乜題目，最後攏愛用「消滅共匪，解救大陸苦難同胞」，真是笑詼代。
憲个：人(lāng)我即碼寫作文，攏嘛用「愛台灣，愛鄉土」做收尾。
安个：好矣，話屎減講寡，即碼著來唱迄(hit)首「反共抗俄」的歌曲。，
反共抗俄〔華語版〕
打倒俄寇，反共產，反共產。消滅朱毛，殺漢奸，殺漢奸
收復大陸，解救同胞，服從領袖，完成革命
三民主義復興，中華民國復興
中華復興，民國萬歲，
中華民國萬萬歲
安个：按怎？敢有法度對答！
憲个：我早著食凊飯等汝囉，斟酌聽，詳細聽：
自由民主萬歲 【台語版】
台灣寶島，愛和平，愛和平。維護正義，除特權，除特權
全民團結，保護台灣，提倡人權，完成建國
實行主權在民，自由民主興旺
自由興旺，民主萬歲
台灣人民萬萬歲 (同反共抗俄調)
安个：改了好，有台灣人的骨氣。以台灣家己做主體性。好，著看汝為台灣爭一口氣的面子上，今仔日我甘拜下風，願意做第二名。予「台灣」做第一名。
憲个：著(diorh)，台灣第一名。
〔合唱〕
台灣台灣我愛汝
台灣台灣我愛汝，我愛汝一個，
世界伊的內底，只有汝一個。
爸爸媽媽我愛汝，恁攏是我个。
世界伊的內底，台灣是咱的。
林律安，蔡正憲落臺一鞠躬。
(編寫佇2003.08.01)