【母語的田園】

踏話頭：

空中的聲音．學習的心情

          毋管是1996年創立鄉城台語文讀書會、發起成立菅芒花台語文學會、台語歌詩表演、台語文冊的編著、報紙雜誌的文章發表，抑是佇台仔頂擔任台語文教學，對我來講，攏是另外一種走揣阿娘的話的方式，所以我攏抱著「學習」的心情。我真感謝有迹爾濟佮台語結緣的機會，予我有學習成長的空間。所以若有人稱呼我是台語文的專家、學者、作家，我攏感覺真歹勢，因為我知影台語文正佇咧起步爾爾(nia)，每一個人所捌(bhät)的攏真有限(除了王育德、鄭良偉等少數學者)，尤其是家己有偌濟斤兩，著親像「缺喙个食米粉─看現現」，從來毋敢自稱是別人的台語「老師」，所有對台語文有興趣的人，我攏共(gä)稱呼做台語文的友志。

    雖然，我把握每一種學習台語文的環境佮機會，但是佇2001年的九月，台語文友志定邦兄，向我提出南都廣播電台有意邀請阮共同佇南都開闢一個新的有關母語文化的節目，我雖然有興趣參與，但是我有時間無夠用的壓力(同時我已經擔任台南護專、致遠管理學院、台南社區大學、台南師院台文社、成功大學語言中心台語班兼任台語課程，以及固定拜三下晡佇國中、小的巡迴演講)，恐驚無法度做好節目的內容，所以即件代誌著暫時按下。

    有人問講是安怎卜接赫爾濟工課(kang-küe)，一方面是我的個性歹勢共人推辭以外，上蓋重要的是，想起1998年我佇推搡(säk)母語的理念之下，堅決放棄擔任圖書館主任，並且提出放棄所有超鐘點的時數，予家己有較濟時間來做研究、寫作、推廣教學，簡單講，這是家己的選擇，所以當然有機會、有時間，我著會參與，借用一句俗語叫做「歡喜做，甘願受」。安爾一路行--落來，聽過我的演講、上過我的課的台語文友志，無一萬嘛有八千的國中、小老師佮社會人士，我感覺相當的安慰。

    當我無閒促促(cīh)的時，有一工南都電台台長忠武兄，敲電話來厝裡予我，提出伊想卜開闢文化性、公益性的本土文化的節目，真誠懇表示邀請我參與即個計劃，我一方面有時間的壓力，一方面感心張台長對台語文化的用心，經由內心一番的苦戰了後，最後才做一個初步的決定，答應暫時先做一季(10-12月)的節目，了後才來好好評估、檢討，看是毋是有擱再做落去的價值無？

    2001年12月底，佇一季(küi)的節目(總共13集)卜結束進前，不出我個人所料，因為受著個人時間的限制，所以節目的品質無法度達到我事先設定的目標，所以對「母語的田園」的節目並無想卜繼績做落去的意願。啥知張台長「毋放我煞」，使用一步絕招，邀請一位「外表出色」、「聲音甜蜜」、「做事勤快」、「追求品質」、「做事周至」的阿蓉小姐，來佮我共同主持「母語的田園」，張台長現出即項秘密武器了後，我著無反抗的餘地，只好擱繼續潦落去。

    「空中的聲音─母語的田園」佇名主持人阿蓉的督促佮鼓勵下，著安爾一集一集做落去，想袂到時間過了真緊，已經進行八個月矣，總共有卅五集，因為平時做節目進前，我攏會將內容的重點先書面化，為著卜予聲音佮文字相結合，即碼我著將即35集的內容輯做伙，印做一本講義，一方面將即段時間的開講做一個完整的紀錄，一方面予聽眾會當佮過去所聽的內容做對照，向望對咱的台語文化的推廣盡一份心力。

    「空中的聲音─母語的田園」的輯印，又擱是我抱著「學習的心情」告一個段落佮另外一個新的開始。(本文佇苗栗縣苑裡鎮坪頂國小老師宿舍寫成08/06/2002暝尾)