正港的台語─華台語對照

Dang-hong-zing 10/22/2002修訂

    「喙講父母話，手寫台灣文」這原本是一件天經地義的代誌(事志)，但是佇台灣煞變成是「天方夜譚」的故事。因為一百外冬來的歷史，台灣受著外來統治者的壓制，佇日據時代(1895年)「日語」成做(ciann⁵-co³)台灣的「國語」，終戰了後(1945年)國民黨政權嘛將「北京語」變做台灣的「國語」，所以毋管是「台語」抑是「客語」、「原住民語」，攏予人(夆hong⁵)當做「鄉土語言」來看待，甚至佇學校場所、政府機關被禁止講方言，因為有即款長期受著壓制、扭曲的語言政策，致使多數人講袂好家己(ti⁷)的母語，現此時的青少年朋友(新新人類)，甚至一句母語嘛袂曉講。台灣先賢連雅堂佇「台灣語典」的自序文內底講：「汝是台灣人，袂使毋知臺灣的代誌」，伊擱講：「我身為台灣人，雖然會曉講台灣話，但是袂曉用母語寫文章，而且有時擱無法度了解台語古漢字的意思，我感覺真見笑。」(註一)當今的台灣人，尤其是少年輩，不但袂曉手寫台語文，甚至嘛袂曉喙講台灣話，咱若無意識著母語一旦失落的嚴重性，從此以後台灣人不但會失去了自主、尊嚴，嘛真緊會變成「失聲」的族群。所以「喙講父母話，手寫台灣文」，是建立台灣為主體性，推展本土文化，上重要的工課。下面我提出幾種的看法，予逐家做參考：

    第一個理由是「台語是會使用來創作个」：用母語來做思考，用台灣話來寫文章，這對佔百分之七十四以上的台語母語人口，是有足大的意義佮鼓勵。「台語敢有字」？這是足濟人的疑問，正確的答案是：「台語大部份是來自於古漢語」，所謂「漢藏語系」的一支，所以當然嘛有「漢字」。舉例來講：「讀冊─讀書)」、「汝、伊─你、他」、「箸─筷子」、「鼎─鍋子」、「走─跑」、「作穡─農事」、「尻川─屁股」、「枵─餓」、「糜─稀飯」、「有身─懷孕」、「早晏─早晚」、「央倩─請託」、「凊飯─冷(剩)飯」、「中晝─中午」、「斟酌─小心」、「細漢─小孩子」、「定定─常常」、「跤手─手腳」、「新婦─媳婦」、「好食─好吃」、「搵豆油─沾醬油」、「吊脰─上吊」、「有空無榫─不適用」、「努力(loo²-lat⁸)─道謝」等攏是，即種字著是所謂的「古漢字」，到即碼猶原囥佇(khng³-ti⁷)咱古早冊佮喙舌內底。

    第二個理由是「用台灣話做主體性」：雖然定定聽人講「台語嘛會通」，其實足濟攏是「袂曉假膨風」，因為多數人，差不多講十句話，三、四句愛轉北京語才會當來表達。比如電腦「網路」、褪「口罩」、汝的「行照」、參加「朗誦」比賽，其中「網路」、「口罩」、「行照」、「朗誦」等字詞著自動轉北京語來講，咱共(ka⁷)稱呼做「半精白仔」台灣話，那(na²)像「雞母屎半烏白」，這著是長期無用台灣話做主體性，所以一寡話講無路來。其實台灣話有足濟傳統典雅的講法，比如：「太太─牽手」、「情人─搭心个(兄)」、「相聲─答喙鼓」、「歇後語─激骨仔話(孽畜仔話)」、「繞口令─盤喙錦/箍喙舌」、「聊天─開講/話仙/破讀(pho³-tau⁷)」、「前言─踏話頭/扮仙/起鼓」、「最後─煞尾/尾齣」、「螢火蟲─火金姑」、「蝌蚪─肚拐仔」、「黑面琵鷺─黑面撓抔(la7-pue1)/飯匙鵝」、「鯨魚─海翁」、「夜鷺─暗光鳥」、「我們─咱、阮」、「老婆─牽手」、「玉米─番麥」、「花生─塗豆」、「口罩─(牛)喙掩仔」、「木棉花─斑芝花」、「壓歲錢─硩(teh⁴)年錢」、「漲潮─滇流」、「退潮─洘流」、「瀑布─水沯*(沖)」…等，咱攏愛用正宗原汁的台灣話，袂使直接對(ui³)北京語翻做台語。目前即款用準的、硬拗的、硬翻的情形，相當的嚴重。袂曉用純正的台灣話來交談，講起--來，這嘛是另外一種台灣人的悲哀。佇台灣即塊島嶼，多數的人口私底下是使用台灣話咧(leh⁰)交談，如果介紹台灣的文化、風土、民情、俗語，用北京語來做口頭的表達，抑是華文的書寫，根本無法度掌握母語的原味佮感情，著親像用國語搬布袋戲，演歌仔戲，是袂孝孤咧(得)。

    第三個理由是「語言是感情交流的工具」：一個人出世了後，佇生活中第一個所接觸的語言著是「母語」，因為母語是由日常生活當中自然形成个，並毋是特別去學習个，所以母語的腔口是無容易改變个、取代个，咱定定聽人講即個人講的是「南部腔」、「北部腔」、「鹿港腔」、「宜蘭腔」、「海口腔」、「澎湖腔」、「關廟腔」等，因為每一種的腔口攏有伊的特色，一聽着知，嘛感覺親切擱心適。比如「蕃薯cu⁵-ci⁵」、「鳥鼠chu²-chi²」、「舉箸ti⁷-tu⁷」、平均「kin¹-kun¹」、「小妹mue¹-me¹」、「雞肉ke¹-kue¹」一聽著知影是南部腔，抑北部腔；「捾菜(sai³)籃，去菜(sai³)市仔，買紅菜(sai³)」，這是台南關廟腔的特色(ch轉s音)。台灣俗語講「離鄉不離腔」，所以有人講：「鹿港人講話無相仝(kang⁵)」，因為鹿港人保留了較完整的泉州音；宜蘭人講話：「酸酸軟軟(suinn1-luinn⁷)，食飯配滷卵(ciah⁸ puinn⁷ phue³ loo² luinn⁷)，食甲光光(kuinn¹)。」因為宜蘭人保留了較(卡)濟的漳洲音。對遮(ui³ cia¹)，咱著會當體會「少(siau³)小離家老大回，鄉音無改鬢毛摧。」的鄉愁，「美不美，山中水；親不親，故鄉人。」的鄉土感情。

    第四個理由是「語言是一種思考的方式」：每一種語言的形成是幾百冬，甚至幾千冬以上，所以每一種語言攏保留了迄個族群深沈的文化。當咱咧(leh⁰)講一種語言的時，著是用迄種語言咧思考，比如：節日的時陣，咱會祝福別人平安、快樂，但是清明的時，無人講「清明節快樂」；仝款嘛無人用台灣話講「阿母，我愛汝」，因為咱無即款的文化，所以著無即款的思考佮講法。另外像英語講：「open the door」，北京語講「開門」，但是用台語來表達著加足豐沛：「開門，門開，門開開，門開開開…」等。講著數量詞有一粒(個)、一爿(半)(ping⁵)、一周(角)(ciu¹)、一條(liau⁵)、一瓣(bang⁷/pang⁷)(如柑仔一瓣)，一屑仔(sut⁴)，分別代表一到十六之一的數量詞。擱比如講：台灣話對煮食，有十種料理的講法：「煠(sah⁸)、煮(cu²)、焄(kun⁵)、煎(cian¹)、炒(cha²)、糋(-cinn³)、滷(loo²)、炕(kong³)、炊(chue¹)、封(hong¹)」，攏有伊無仝款的手路。另外像台灣的俗語有「父母疼囝長流水，囝想父母樹尾風」、「食糖算頓，食水久長」、「初三四月眉意，十五六月當圓，廿三四月暗暝」、「卜去烏影，毋去吊鼎」、「一牽成、二好運、三才情」、「目珠看粿，跤踏著火」，這攏是活跳跳的台灣活，攏是即塊土地的聲嗽，毋過(m⁷-ku¹)若是用北京語來講，抑者是翻做英語，台灣話的原味著走精去，因為每一種語言的思考佮表達的方式有所不同所致。

     頂面幾(kui²)種理由，值得逐家做伙來思考个。1930年台語文前輩黃石輝講：「汝是台灣人，汝頭戴台灣天，跤踏台灣地，目珠(睭)看的是台灣的光景，耳空所聽的是台灣的消息，生活所過的是台灣的經驗，喙舌所講亦是台灣的話句，所以汝愛用感情的筆，來彩繪台灣的文學。」伊擱講：「用台灣話做文、用台灣話做詩、用台灣話做小說、用台灣話做歌謠，描寫台灣的代誌。」古早先賢講：「卜消滅一個國家，先毀掉伊的文化；卜毀掉一個文化，先埋葬伊的語言佮文字」。身為台灣人，咱是不是愛覺醒，來關心家己的母語，當咱的「喙舌佮筆尖合一」的時，也着是台灣人「文藝復興」的開始。

 〔註〕連橫著台灣語典：「汝是台灣人，不能不知臺灣事。」「余臺灣人也，能操臺灣之語而不能書臺語之字，且不能明臺語之義，余深自愧。」