踏話頭─老師的話－

用熱情寫出台語文                                       

董峰政/鯤島台語文研究會

即幾冬來小弟有機會佇台灣各所在走傱(cong5闖)推廣母語，無論是學校演講抑是台語師資培訓班講課，我攏一直呼籲「喙講父母話，手寫台語文」的重要性，因為「喙舌佮筆尖」若無法度結作伙，安爾台語是無法度釘根、生澶。但是母語長期的拋荒，一般人連「講母語」都成問題，卜「寫台文」著更加困難囉，這是推搡台語上大的困境佮挑戰。
 　　「台灣意識建立佇本土文化上，本土文化由台語來㕡路」。真濟人一日到暗攏咧喝本土化，但是佇語言的主張煞強調囡仔愈早學「英語」愈好，結局煞造成「講國語袂標準，講英語毋敢開喙，講台語袂輾轉」的現象，這著是無重視「母語的根」的問題。台灣愛行「國際化」這是通人知的代誌，但是卜國際化愛先釘根「本土化」，若無卜安怎佇國際上參人徛起，卜如何爭取一席之地。佇「本土化」當中上重要著是「母語教育」。因為母語的功能除了是一種「溝通的工具」，伊擱較重要的是「文化的傳承」、「思考的方式」、「感情的交流」、「族群的符號」，所以「學習母語」是一種人權的具體表現。

一般人無重視母語，主要原因是予「慣勢」牽咧行，所以開喙合喙慣習講「國語」，另外一個原因是「蠻皮心態」，無體會台語的重要性。其實古聖賢早著教示講：「卜消滅一個國家，先毀掉伊的文化，卜毀掉一個文化，先埋葬伊的語言佮文字」，這是一句值得咱深思的話。

佇台南社區大學開辦以來(200年2月底)，小弟有機會佇社區大學陸續開設「台語概論」佮「社區台語種子教師培訓班」，－冬來，看著學員無論透風、落雨，甚至枵腹肚趕來上課，即款對母語的熱情，真使人感動，督促我佇教學佮教材方面的充實，會使講是「亦師亦友」，對我來講是一種教學，嘛是一種學習。

一冬來，喩用仝款的「熱情」，來從事母語的創作，用阿娘的話寫出對土地的愛、鄉土的情，創作「台語文」、「台語詩」、「台語評論」、「台語歌謠」等。

即碼，佇即坵田園已經看著「母語的稻穗」，咱作伙來共拍噗仔。

(2002. 1. 7董峰政寫佇鼎雅)