台灣佇日據時代抑者擱(koh4)較早的滿清時代，厝裡重視教育的教庭，所謂「萬般皆下品，唯有讀書高」，攏會想辦法將囡仔(gin2-a2)送去「私學仔(私塾)」讀冊，當初時到底是讀啥乜冊？用啥乜來發音的？若初級啟蒙的時期，主要是讀「千字文」、「昔時賢文」、「三字經」、「百家姓」、「弟子規」、「幼學故事瓊林」、「千家詩」、「唐詩三百首」「千金譜」等啟蒙的讀物，囡仔因為記持(ti5)好，加上內容押韻鬥句，所以會當逶頭到尾像唸冊歌一般記佇頭殼內。等到某一個程度了後，才繼續唸讀「論語」、「孝經」、「詩經」等四書五經的經典，因為是讀古冊，所以發的音攏用「讀書音」，又名「文音」、「孔子白」，比如「近朱者赤，近墨者黑」，「赤」(chik4)佮「黑hik4」用文音讀才有押韻，佫比如「事久見人心，路遙知馬力」其中「久見人」「知馬力」分別有文白音的讀法。即款音佮咱一般日常交談講的音(俗稱白話音)無相仝(kang5)，所以愛經過學習才會曉唸讀。但是過去的私學仔有一本卡特別的啟蒙讀物「千金譜」卻是用白話音來唸讀的，這是誠(ciann5)罕見的讀物。可惜，到了國民政府統治台灣了後，為著卜大力推行所謂「國語」的政策，致使過去「漢學仔」所唸讀、默誦的讀物，就覕(bih4躲)佇壁角，無受人的重視，這是足可惜的代誌。

為著卜(beh4)推廣過去漢學仔所使用的一寡啟蒙讀物，方便學者研讀學習，所以先整理「千字文」、「昔時賢文」、「三字經」、「千金譜」等四本讀物，分別注羅馬拼音，只要會曉羅馬拼音的人，就會當家己佇厝裡學習，抑者是綴(tue3跟)錄音帶來唸，我相信佇足短的時間，著會曉唸讀。我整理遮?(這些)啟蒙讀物，主要是卜提供予國中、小的老師，向(ng3)望會當做為本土文化的教材，予咱下一代的子弟，認識、了解傳統的物件，安爾(an-ni)本土文化才會當繼承落--去。

目前的羅馬字雖然有幾外種的版本，但是有一個共同的特色，攏逶(ui3)「教會羅馬字」(簡稱教羅)來的，教羅佇台灣使用的歷史已經有一百外冬，嘛是目前佇台灣上蓋普遍的羅馬字。但是為著卜配合資訊化的來臨，所以台灣語文學會，做了簡單的修正，被稱呼做TLPA(Taiwan Language Phonetic Alphabet)，即套音標佇民國八十七年元月，經教育部發文推荐予各級學校來使用。所以即本冊，?(toh8)暫時採用TLPA的拼音符號，來標記所有的漢字。
最後，即本冊會當順利來完成，卜特別感謝高雄市國光中學許淑慧老師佇羅馬音標輸入的協助，以及餐旅學院的劉庸英小姐、蕭淑華小姐鬥跤手內容佮音標的校對，當然高雄市教育局郭金池股長，小港國中吳百祿校長、孫玉燕主任、宋鳳英組長的協助佮鼓勵，尤其長期舉辦初級、中級班的「台語師資培訓班」相當辛苦，佇遮嘛卜表示我的感謝。

【又記】
佇我推廣台語文的過程中，高雄市小港國中台語師資研習班、高雄市鹽埕國中台語師資研習班、高雄市光武國小台語師資培訓班、台南縣柳營民眾服務社台語師資研習班佮國立台南社教館台語研習班等攏使用過即本「漢學仔冊精選」的初稿，一般反應真好。即碼，我重新校對內容，並增加新的資料，卜正式來出版，向望對台語有興趣的人，共同來耕作即塊母語的田園。

(董峰政寫於2001年1月30日)