蕃薯厝囡仔的跤跡

我出世佇台南縣埔羌頭西勢里「蕃薯厝」的鄉村，這是一個留下了平埔族跤跡(kha1-jiah4)的部落。對細漢一直到讀初中進前，攏佇即個莊跤所在生活成長。故鄉雖然有卡偏僻小可(sio2-kua2)，毋拘離阮兜無夠一百公尺的頭前有一條許縣(萬)溪，細漢的時定定(tiann7-tiann7)去溪仔邊佚陶(chit4-tho5)、拍翸(phah4-phun2)，有時嘛會看著魚仔「逆(gik8)流而上」，阮干礁知影魚仔佇水裡泅(siu5)來泅去，誠逍遙自在。逐日食蕃薯的生活雖然有卡困苦淡薄仔，但是精神上，嘛過了不止仔快樂。佇母語方面，庄裡的人，大細漢囡仔(gin2-a2)，干礁會曉講「正宗原汁」的台灣話，毋捌(bat4)北京話是啥乜碗糕，這是我講母語的源頭。

佇故鄉就讀西勢國小，迄當時的母校佇場所佮班級雖然有卡料小，但是有牽引我行入讀冊即條路的老師─王武雄老師，伊是當初時全校唯一正科班的師範體系出身，對我的鼓勵真大，予我真感念。卒業了後，序大人無惜生活的困苦，儉腸躡肚(neh4-too7)予我有機會逶(ui3)莊跤到府城讀長榮初中佮高中，這是一間長老教會學校，當初時雖然升學率無蓋理想，學生的素質嘛毋是一流，無拘(過)即間學校佇教學各方面攏誠照紀綱(起工khi2-kang1)，所以對我人格的發展，思想的養成有特別的幫贊(贈)。高中畢業了後，考稠(tiaui5)淡江大學外文系，後來擱轉修中文系的課程，所以對中文、外文多少有興趣佮研究。預官退伍了後，佇服務期間去美國進修，得著碩士學位。後來佇前台南家專服務期間，食著好膽藥仔，特別前往國立台灣科技大學參加「大專電腦師資班」進修，得著電腦教師資格的學分佮證書。後來為著卜回饋社區，特別長期輔導三村國小的電腦教育訓練，以及規劃故鄉大灣中學的電腦師資訓練班佮成立台南縣第一座國中圖書自動化的圖書館，得著真好的效果，第一擺體會著啥乜叫做「有路用」的人，帶來了真大的成就感。

出社會了後(1980年)，一直攏佇教育界服務，前後捌佇長榮中學(兼任)、崑山技術學院、台南女子技術學院擔任教學佮行政職務，即碼佇高雄餐旅管理學院學校服務，佇創校的期間一手創立新圖書館，並擔任首任的圖書館主任，目前除了擔任專任老師外，啥乜攏無插，全心佇外口推廣台語文，以「搶救母語」 佮「走揣阿娘的話」的心情佮理念，來做即件母語的工(功)課。

佇學習台語文的過程，予我深深體會著啥乜叫做「台語之美」，台語文的「多樣性」、「古典性」、「音樂性」「文學性」等，攏深深吸引著我，行入「台語文天地」了後，才發現著家己的母語是一塊「文化的活化石」，伊的學問是萬底深坑，予我即個過去干礁(只有)會曉喙唇仔的台灣囡仔，充滿著驚疑佮歡喜，從此改變了我對母語的價值觀，予我有再生的感覺，體會著做一個台灣人會曉講台灣話、寫台灣文，是一件足驕傲的代誌 (事志)。所以即幾冬來，專心投入寫作、演講等推廣的工作。
做一個「蕃薯厝囡仔」，我卜用我故鄉的原音─台灣話，來做我的主體性，來維護我做一個台灣人的尊嚴。所以多年來，對母語種種的努力扑(拍)拚，干礁卜向(ng3)望佇台灣即塊島嶼的四大族群，除了學會曉使用共同話─北京語以外，擱卡重要的是人人會曉「喙講父母話，手寫母語文」，因為一個人袂(be7)曉用家己母語來寫文章表達感情，其實伊著是「母語的文盲」。

〔附錄〕
蕃薯厝5號 作者：董 峰 政
蕃薯厝5號
郵差送批的番號
伊是阮老父做長工
流汗錢疊起來的厝
一間有伸手仔的
台灣厝
細漢一家伙仔趶的岫 (趶u1)(岫siu7)
透風落雨會當覕的大樹 (覕-宓bih4)

蕃薯厝
埔羌頭社內的小庄頭
許縣溪流過的小田庄
是我出世的家園
囡仔時代的記憶攏佇遐
溪仔拍蓬泅 (拍蓬泅phah4-phong7-siu5)
蓖麻園掠蟋蟀
埕斗拍干樂 (干樂─矸轆kan1-lok8)
埕尾拈田蠳 (拈田蠳 liam1-cham5-enn1)
嘛有搖檨仔、挽龍眼仔的
笑聲

大漢的時
佇外口徛起趁食
蕃薯厝的故鄉
不時出現佇夢中
伊是古早的番社
番仔寮、番仔田
是伊的隔壁庄
是故鄉嘛是原鄉

蕃薯厝5號
是我做一條蕃薯仔
永遠的住所
(本詩刊佇台語社通訊-掖種第24期1999.05.15)

【附】蕃薯厝：

蕃薯厝亦寫作「番薯厝」。佇「西勢」東邊的庄頭，早前叫做「番租厝」。永康鄉志─第三章聚落記載：「蕃薯厝」佇西勢東爿，是廣儲西里近中心點。庄名叫「番租厝」，是因為漢人向口埤一帶平埔族人租田耕作「租戶的厝」，後來因為忌即件代誌著轉音叫「蕃薯厝」。
即個庄社大約有三、四百戶，庄民主要是林、董兩姓：庄頭的廟宇是「廣興宮」，服祀「謝府元帥」，俗稱「元帥廟」，創建雍正十三年(一七三五)，廟前有一條溪水叫「許縣溪」，佇同治三年(一八六四)佮光緒十二年(一八八六)淹二遍大水，遭受著嚴重的破壞，所以陸續重建。現此時的元帥廟是一九八○年所建，廟埕曠闊，有二欉大欉榕，對(ui3)廟前看去有山有水，風景優美。

元帥廟早前有六角頭，其中「英仔甲」佮「後庄」已經廢庄，目前所轄是「蕃薯厝」、「西勢」、「新庄仔」、「崙仔頂」等四庄。每年農曆正月廿日「元帥爺生」，廟內各庄頭攏有「分餅」的風俗。

「分餅」風俗的傳說是：一百外冬前，庄民為著祈求生「查甫囡仔」，聚集佇廟內向謝府元帥下願，若會當「一舉得男」，著佇千秋聖誕時搬戲答謝神明，並且「擔餅」分送庄民。所分的餅叫做「水果餅」，簡稱「水餅」，佇逐冬的正月廿日中午以後開始社內家家戶戶分送，分登記有案的「福份餅」佮滿六十歲的「老大餅」兩種，即個風俗一直延續到現在，成做一個特色。