二、統治者消滅被統者的語言：
咱掀開古今中外的歷史，有一個足好見證，著(toh8)是所有的統治者攏想盡辦法卜禁止、消滅被統治者的語言，汝看當年普法戰爭了後，普魯士佔領洛林、亞爾薩斯著即時禁止上法語課，相信逐家對都德(Daudet)「最後一課」(註二)的文章印象誠深。另外對台灣來講嘛是仝(kang7)款，日本人統治台灣的時，為卜推行皇民化運動，積極推行「國語家庭」，卜來消滅台灣各族群的母語。終戰了後，國民黨來台灣接收政權，嘛是用仝款的步數來推行所謂「國語」，用罰錢、掛狗牌等無所不至的手段來禁止講方言，這是一種無疼心、殘忍的做法。統治者的目的，著是卜(beh4)消滅被統治者的文化，方便壓制佮統治。因為母語著是一個族群文化的活化石，所以母語一旦消失去，一個族群著袂記得家己(ti7)的根源，喪失認同佮歸屬，俗語講：「母語若失聲，啥人是咱阿娘？」

三、讀冊人重視別人的語言，看輕家己的母語
自古以來，對家己無信心的族群，怹的讀冊人、知識份子攏會拚命去學別人的強勢語言。比如：過去佇歐洲羅馬的讀冊人，拚命學「希臘文」，後來才回歸確立家己「拉丁文」的主體。文藝復興時代，意大利的文人，拚世學「拉丁文」，一直到但丁用家己的母語義大利文創作「神曲」，才建立意大利文的主體性。英語的命運嘛是仝款，十四世紀以前受過教育的英國人，自認「英語」是無水準的語言，所以拚命學「法語」、「拉丁語」。有一位英國懷克利夫(Wycliffe1382)傳教士，將拉丁文聖經翻譯做英文，結果引起英國教會的憤怒，被關禁監牢，後來甚至遭受鞭屍的命運。明治維新進前，日本的讀冊人，並無認同家己的假名(kana)，韓國的學者嘛看不起家己的「諺文」，攏拚命學「漢文」，安爾才會當顯示家己的地位。即款的現象佮即碼的台灣人拚命使用「華文」、「英文」感覺較有水準攏仝一個道理，這攏是自卑的心態。依語言學家的講法，一個人加捌(bat4)一種語言，著加一粒頭殼，所以學別人的語言是好代誌，是值得鼓勵?(的)。但是對一個台灣人來講，有一個足重要的前提是：愛先會曉「喙講父母話，手寫台灣文」，用家己的母語來學別人的語言，毋是用學來的「北京語」擱來學外國語，加轉一輾(lian3)，莫怪台灣人學外語加足辛苦。換一句話來講：用家己的母語做主體性，來學外國語，卡緊學，卡好學。咱若直接用台語來學日語，汝會發現有足濟雷同的所在，比如：便所、便當、料理、注射、注文、手續、專門、玄關、郵便局、不度、見本等。甚至英語嘛仝款，比如：提去─take it；轉─turn；呼─call；陣─team；路─road；濕─seep；費─fee；協─help；燒─sear；予─for；號─howl；鈴─ring；滇─teem…等趣味的相通。

四、母語的多功能性
母語到底有啥乜重要性，值得咱下命共(ka7)搶救、走揣(chue1)。對語言有基本常識的人攏知影，「母語」不但是一種溝通的工具，擱是一種感情的交流、文化的傳承、思考的方式、族群的符號、表達的利器，上重要的是「尊嚴的維護」佮「自信心」的建立。所以有台灣意識的人，攏想盡辦法卜(beh4)創造母語的環境，抱括「語言平等權」、「母語教育權」的爭取。但是長期(1895-1996)受外來政權統治的台灣人民，受者習慣的「制約」，母語的認知漸漸麻痺，變成「蠻皮新婦」，攏掠準語言干單(礁)是一種溝通工具爾爾(耳耳)，所以攏用較滑溜的國語來表達，母語的表達能力因此漸漸喪失。一旦口頭表達的能力有所不足，書面寫作的能力著更加無可能。其實一個讀冊人若無法度用家己的母語寫作，毋管伊有偌峘(kuan5多高)的學歷，伊猶原是「母語的文盲」。所以對母語觀念的改變，成做母語是毋(m7)是會當釘根、生澶的關鍵。
•收話尾
對(ui3)頂面所舉的例，咱會當做一個結論：當咱的知識份子佮讀冊囡仔，攏會曉「喙講父母話，手寫台灣文」、「喙舌佮筆尖合一」的時，著是台灣人「文藝復興」、「台灣意識」、「自主尊嚴」，「建立自信心」一個重要的指標。

最後，我個人會行入台語文的天地，完全愛感謝年紀老邁的阿媽─董汪糖女士，若毋是因為伊保留了正宗原汁的「台灣話」，引起我的注意佮興趣，我著無即款的機緣，欣賞百花盛開的台語花園、五榖豐收的母語田園。另外，我的牽手，嘛予我足大的鼓勵佮幫贈(贊)。即本冊會當順利出版，我卜特別感謝怹二位女姓。(2001年921大地動二週年)

「註解」
註一：廉恥，顧炎武撰：「我有一兒，年已十七，頗曉書疏。教其鮮卑語及彈琵琶，稍欲通解，以此伏事公卿，無不寵愛。」
註二：「最後一課」的作者都德(Alphonse Daudet.1840-1897)法國寫實派小說戲劇作家。即篇文章上早出現佇胡適先生所翻譯的「短篇小說」(上海亞東圖書館版)。內容是透過法國亞爾薩斯被普魯士佔領進前的最後一日，一個小學生認真學法文課的心情，寫出當初時法國人被佔領的無奈。