佇本土文化發展的過程中，上重要的是保存各族群的「母語」，過去因為語言政策的偏差，為卜提倡北京話(所謂的國語)，煞(suah4)佇國民義務教育的期間，全面禁止講母語，學生囡仔講家己(ti7)的母語不但受著輕視，而且愛擱罰錢，講阿娘的話親像做毋?(m7-tioh8)代誌，致使目前的青少年朋友，變成了母語失聲的一代。一個族群的下一代，袂(be7)曉講扭掠(liu2-liah8流利)的母語，這不但是一種悲哀，嘛會造成族群認同佮歸屬的危機。請問四百冬前台灣即塊島嶼上大的族群─平埔族，又擱走對陀位(to2-ui7)去？一般人攏以為語言干礁(kan1-ta1)是一種溝通工具，其實就「母語」來講，是有伊足濟意義佮內涵，因為使用母語，?是另外一種「思考」的方式、「文化」的傳承、「感情」的交流、「尊嚴」的維護，嘛是「族群」的符號，所以毋是干礁一種「溝通的工具」爾爾(nia7)。

一個族群的語言，上會當表現特色?(e0)，是伊的「俗語」。俗語不但是一個族群生活經驗的智慧，亦是一個族群的風土民情佮思想信仰的縮影，反映一個族群的特性。所以對(ui3)遮?流傳各所在的「古早話」，予咱的本土文化會當繼續傳承落--去。

台灣即塊島嶼大多數人(佔百分之七十以上)的母語是台語(俗稱閩南話)，台語參現在通行的「國語」(北京話)，攏屬於「漢(藏)語系」，但是嘛有相當無仝的所在。比如：台語佇發音方面，上大的特色是「八音七調」佮「入聲字」的保留，伊不但具備「古典性」，嘛有「音樂性」的特色，俗語講：「講?比唱?較(khah4)好聽」，這會當佇台語得著證明。

台灣的俗語，除了充滿人生智慧佮哲理外，另外配合伊雙聲道(讀書音佮白話音)佮音樂性的特色，予台灣俗語四界看會?、聽會?「押韻」的旋律，那(na2)像一首短短優美的歌詩。比如：「一更窮、二更富、三更起大厝、四更拆袂赴」、「一牽成、二好運、三才情」、「初三四，月眉意。十五六，月當圓；二三四，月暗暝。」?爾優美的俗語，親像天籟(lai7)一般，應該好好發揚光大。目前冊局台灣俗語相關的冊，會使講五花十色，毋拘大多數無注重「系統性」，無重視語言押韻的「音樂性」，無考證用字佮發音的「正確性」、無使用羅馬拼音的「國際性」，使得台灣俗語正宗原汁的滋味，強卜消失去。

為卜(beh4)將台灣俗語發揚光大，筆者佇餐旅學院校長李福登博士的指導下，特別挑選將近五百條有「鬥句」(押韻)的俗語，遮?俗語所強調的是「本土性、在地味、全鬥句」的特性，若遇到外來語亦是較少使用的字時，阮?(tioh4)使用羅馬拼音符號來標記。擱較要緊的是，過去介紹台灣俗語的資料，攏是使用北京語咧做說明，總感覺隔一層膜(mooh8)，感受袂著「鹹酸甜」的滋味，親像「布袋戲」、「歌仔戲」用北京語咧搬，會使講不倫不類，無滋無味。另外足濟人攏以為台語是「有音無字」，袂當用來寫作的，俗語講：「相諍(cenn3)了氣力」，其實這是因為無學習、無接觸所致，所以筆者挑選一百條俗語，一一用母語來思考，用台語來寫，這應該是上好的說明。

目前正是本土文化提倡的時陣，國人重視、學習台語文的人愈來愈濟，相信「喙講父母話、手寫台語文」，即個階段已經來臨了，但願透過「全鬥句的俗語」即本冊的出版，會當為母語的走揣(chue7)盡一點心力。(本文改寫佇2001.05.08大灣)
【附註】毋?(m7-tioh8)：不對。扭掠(liu2-liah8)：流利。陀位：(to2-ui7→tui2/tue2)：何處。干礁(kan1-ta1→kana7)：只有。